Ўзбекча конвертация: Олиш бору, бериш йўқ
Банклар долларни нақд оляпти, лекин нақд cотмаяпти, фақат конверсион VISA карточкаларига чекланган миқдорда тушириб беряпти. Карточкадан доллар чиқариб олиш эса Ўзбекистон ичида имконсиз.
Шохобчаларда навбатлар камайди
Тошкентдаги Асака банк шохобчасига доллар алмаштиргани борган тадбикор Озодлик билан суҳбатда 6 сентябр куни шохобча олдида навбат бир кун аввалгига қараганда камайганини айтди:
- Конвертация долларни олишга эркин бўляпти, сотишга эмас. Ҳозир 9 мингдан ошиқроқ долларни алмаштиришда паспорт керакмайди, деяпти. Лекин, банкдан доллар олайлик десак коверсион картага туширади. Ҳисобасак жуда фоизлари билан қимматга тушаётган экан бу. Шунинг учун ҳозир кўпчилик қора бозор яхши эди, деяпти. Ҳозир одамлар анча камайиб қолди банклар олдида, - дейди тошкентлик тадбиркор.
Андижонлик тадбиркор Ҳаётуллоҳ Байбаев: "Андижондаги банклар доллар сотиб оляпти, иш вақти 9:00 дан 22:00гача".
"Қора бозор"да доллар нархи банкдагидан ўзиб кетди
Ўзбекистон "қора бозори"да саррофлар 1 АҚШ доллари учун 8170 сўм таклиф этмоқда.-Доллар олиш 8150 сотиш 8170 сўм бўляпти, - деди Тошкентнинг Чорсу бозоридаги саррофлардан бири. Бу Ўзбекистон банклари таклиф этаётган нархдан баланд. Ўзбекистон расмий банки 1 АҚШ доллари учун 8100 сўм нарх белгилаган. -Банкларда доллар сотмаяпти, шунинг учун одамлар хавфли бўлса ҳам "қора бозор"га келяпти. Бу ерда ҳар куни облава, лекин "қора бозор" ишлаяпти, - дейди ўзбекистонлик сарроф.
