O‘zbekistonda hokimlar bundan buyon kuniga ikki soat ijtimoiy tarmoq foydalanuvchilaridan tushgan savollarga javob berishlari lozim. Bunday vazifa prezident Shavkat Mirziyoyev tomonidan 14 iyul kuni Toshkentda o‘tkazilgan videoselektor yig‘ilishi avvalida qo‘yildi.
“Hokimlarga shunday topshiriq: ertalab bir soat – 8 dan 9 gacha, kechqurun 9 dan 10 gacha ijtimoiy tarmoqlardan tushgan savollarga mukammal javob berasizlar. Xalqimiz hamma narsani bilishi kerak”, degan prezident Mirziyoyev.
Bundan buyon har ish kunining 2 soatini ijtimoiy tarmoqlarda o‘tkazadigan hokimingizga bugun qanday savol bergan bo‘lardingiz?
OzodNazar bu savolni, kunning boshqa savollari qatorida, farg‘onalik ikki bloger: Dima Qayum va Bahodirxon Eliboyevlarga berdi.
