Тошкентдаги сайлов участкаларидан бирида халқаро кузатувчи мониторинг ўтказди.
Глобал ва стратегик тақиқотлар маркази директори, покистонлик истеъфодаги подполковник Холид Таймур Акрам 548-сайлов участкасига борди.
Twitter тармоғида эълон қилинган видеода кузатувчи, участкага келаётган сайловчиларнинг қандай регистрация қилинаётгани, қанча сайловчи бору, қанчаси овоз бериб бўлгани билан қизиқди.
1644 сайловчидан 395 нафари овоз бериб бўлгани ҳақида, участка раҳбари берган ҳисоботни, покистонлик кузатувчи "жуда яхши", деб қайд этди.
Европада хавфсизлик ва ҳамкорлик ташкилоти номидан борган кузатувчилар гуруҳи, ҳозирча сайлов участкаларидаги мониторингга оид суратларни эълон қилмоқда.
Чилонзор туманидаги 313-сайлов учаскасига борган голландиялик кузатувчилар эса, участка расмийлари билан бирга, рақсга ҳам тушди.
ЕХҲТнинг Демократик институтлар ва инсон ҳуқуқлари бўйича бюросининг кузатувчилар миссияси эса оралиқ ҳисоботида номзодлар ўртасида рақобат йўқ, юзма-юз мунозара кураши кўзга ташланмайди, дея хулоса қилганди.
ЕХҲТнинг махсус координатори Рейнхольд Лопатка Ўзбекистондаги сайлов жараёнининг яхшиланганини қайд этган.
Gazeta.uz нашрининг ёзишича, Лопатка: "Сизлар тўғри. йўлдасизлар, лекин бу охирги қадам эмас", деган. Камчилик сифатида эса бир сайловчининг қутига 2 та бюллетень ташлаганига гувоҳ бўлганини қайд этган.
Бундан ташқари, у маъмурий ресурсларнинг ишлатилиши бўйича қонунчиликда қатъий талаблар белгиланмагани, баъзи партиялар рўйхатга олинмаганини қайд этган.
Мустақил Давлатлар Ҳамдўстлиги (МДҲ) Парламентлараро ассамблеяси кузатувчилари билан брифинг бўлиб ўтди.
Унда қатнашган кузатувчи - Россия Федерацияси Федерал Мажлисининг Федерация Кенгаши халқаро ишлар бўйича қўмитаси раисининг ўринбосари Мухаметшин Фарит Мубаракшевич: "Умуман олганда, сайлов халқаро стандартларга мос ўтди", деди.
"Таассуротларимнинг энг асосийси - бу яхши кайфият. Тушлик пайтига келиб сайлов участкаларида 50%гача сайловчилар овоз беришди. Кўплаб сайловчилар мамлакатда оддий халқ интилишларига жавоб берадиган туб ўзгаришлар, ислоҳотлар амалга оширилаётганини таъкидламоқда. Президентликка номзодлар умуман олганда ўзбек халқининг кутилмаларига мос дастурларни илгари суришди - бу ижтимоий масалалар, иқтисодий ривожланиш билан боғлиқ кўплаб муаммолардир", деб таъкидлади Мухаметшин.