Киевда мародёрлар “огоҳлантиришсиз зарарсизлантирилади”
Киев мэри Виталий Кличко пойтахтда “ваҳима чиқариш учун” ҳаракат қилган мародёрлар ҳарбий ҳолатдан келиб чиққан ҳолда “огоҳлантиришсиз зарарсизлантирилади”,-деб билдирди.
“Таъкидламоқчиманки, мародёрларни ҳарбий ҳолат қонунларига асосан огоҳлантиришсиз зарарлантирадилар! Киевликлар, шубҳали шахсларни, мародёрларни кўрсангиз дарҳол ҳуқуқ-тартибот органларига ва ҳарбийларга мурожаат қилинг”,-деди Кличко.
Айни пайтда Киевда комендантлик соати бекор қилинди. Аммо жамоат транспорти қисқартирилган тартибда ишламоқда. Шундан келиб чиққан ҳолда, Кличко аҳолини зарурат бўлмаса уйдан чиқмасликка чақирди.
Зеленский: Қурол ишлатишни биладиган маҳкумлар қамоқдан озод қилинади
Украина президенти Владимир Зеленский 28 февраль кунги видеомурожаатида “аҳлоқий жиҳатдан оғир, аммо мудофаа жиҳатидан фойдали” қарор қабул қилинганини билдирди.
“Ҳарбий ҳолат шароитида жанговар ҳаракатлар иштирокчилари – реал жанговар тажрибага эга бўлган украиналиклар – қамоқдан бўшатилади ва ўз айбларини урушнинг энг қайноқ жабҳаларида ювиш имкониятига эга бўлади. Яна айрим шахслар – аксил-террор амалиётлари иштирокчиларидан ҳам барча санкциялар олиб ташланади. Ҳозир асосий нарса - мудофаа”,-деди Зеленский.
Украина Бош прокурори президент баёнотидан сўнг жиноят ишлари бўйича ўтаётган барча қурол-аслаҳа, техника, ёнилғи ҳибсдан чиқарилганини ва армияга берилганини билдирди. Унга кўра, ҳарбийларга ҳозиргача 10 минг тонна ёнилғи, бронетехника ва қурол етказиб берилди.
Россия рублининг қиймати кескин тушиб кетди
28 февралда Россия банкларида 1 АҚШ доллари 100-110 рублдан, 1 евро 115-120 рублдан сотила бошланди. Россия Украинага уруш очгунига қадар 1 доллар 80 рубль, 1 евро 90 рубль атрофида эди.
Россия нашрлари қатор банкларда хориж валютасини сотиб олиш имконсиз бўлаётганини, кўп жойларда нақд рубль ҳам танқис бўлаётганини ёзмоқда. Айрим банклар олдида эса узундан узоқ навбатлар пайдо бўлди.
Валюта бозоридаги инқирознинг олдини олиш учун Россия Марказий банки устама ставкаси 9 фоиздан 20 фоизга кўтарди. Марказий банк фоиз ставкасининг оширилиши рубль қадри тушишининг олдини олади, деб ҳисобламоқда.
Украина ТИВ: Путинга қарши коалицияга 84 давлат қўшилди
Украина Ташқи ишлар вазирлиги Киев ташаббуси билан ташкил этилган Путинга қарши коалицияга 84 давлат қўшилгани тўғрисида маълумот берди.
“Украина дипломатияси Россия босқинига қарши Халқ урушида Украинани қўллаб-қувватлаш учун мисли кўрилмаган даражадаги антипутин коалициясини жалб қила олди. Бугунги кунда бу коалицияга 84 давлат ва 13 та халқаро ташкилот қўшилди. Россия катта йўқотишларга дучор бўлмоқда. Бу фақат бошланиши холос”,- деб иқтибос келтирди вазирлик матбуот хизмати Украина ташқи ишлар вазири Дмитрий Кулеба сўзларидан.