Украина вакиллари Запорожье АЭСи россиялик ҳарбийлар назорати остига ўтганини айтмоқда
Запорожье АЭСи россиялик ҳарбийлар назорати остига ўтди – улар маъмурий бино ва ўтиш жойида юрибди. Украиналик ҳарбийлар орасида қурбон бўлган ва жароҳатланганлар бор. Бу ҳақда Украинанинг “Энергоатом” ширкати вакиллари маълум қилишган.
Айни пайтда АЭС ходимлари энергоблокларда ишлашда давом этмоқда.
Атом электр станцияси Россия қўшинлари назорати остига ўтганини Украина Ядро энергиясини бошқариш бўйича давлат инспекцияси ҳам тасдиқлаган. Инспекция вакиллари Запорожье АЭСи ҳудудида олтита энергоблокдан ташқари қайта ишланган ядровий ёқилғи омбори ҳам борлиги, унга шикаст етиши радиоактив моддалар тарқалишига сабаб бўлиши мумкинлигидан огоҳлантиришган.
Чехияда миграция инқирози туфайли фавқулодда ҳолат тартиби амал қила бошлади
Чехияда Россиянинг Украинага бостириб кириши ортидан юзага келган миграцион инқироз туфайли шу йилнинг 4 мартидан фавқулодда ҳолат тартиби амал қила бошлади.
Чехия ҳукумати сайти орқали тарқатилган маълумотга кўра, бу чора украиналик қочқинларга ёрдамни ошиғич мувофиқлаштириш учун ҳукумат, ҳудудлар, муниципалитетлар ва бошқа субъектларга кўмаклашиш мақсадида амалга оширилмоқда.
“Биз украиналик қочқинлар ва уларга бевосита ёрдам бераётганлар учун фавқулодда ҳолат тартибини эълон қиляпмиз, бу Чехия фуқаролари учун жорий этилган фавқулодда ҳолат эмас”, дея изоҳ берган бош вазир Петр Фиала.
Seznam Zpravy нашри хабарига мувофиқ, фавқулодда ҳолат эълон қилинишига Украинадан кўплаб қочқин келгани сабаб бўлган. Чехия Ички ишлар вазирлиги бу мамлакатдан бор-йўғи 5 минг чоғли қочқин келишини кутган эди, бироқ ҳозир ҳар куни шу миқдорда қочқин келмоқда.
Фавқулодда ҳолат тартиби 30 кун давом этади. Бундан ташқари, Чехия ҳукумати Украинага бундан буён берилажак гуманитар ёрдам кўлами ҳамда Мудофаа вазирлиги бюджетини 1 миллиард кронга кўпайтиришни маъқуллаган. Мазкур маблағ Чехия армияси учун ўқотар қурол сотиб олишга сарфланиши айтилмоқда.
Запорожье АЭСида чиққан ёнғинни бартараф қилишга муваффақ бўлинди
Украина Фавқулодда вазиятлар хизмати Запорожье АЭСида рўй берган ёнғин қуршаб олингани, аланга майдони икки минг квадрат метрни ташкил этгани ҳақида маълум қилди.
Хизмат қайдича, ёнғин чоғида, дастлабки маълумотларга кўра, қурбон бўлган ва жабрланганлар йўқ.
Украина расмийлари иддаосига кўра, 4 мартга ўтар кечаси Россия қўшинлари Запорожье АЭСини ўққа тутганлар. Ҳужум натижасида энергоблоклардан бирининг яқинида ва ўқув-машқ корпусида ёнғин юзага келган.
Украина Фавқулодда вазиятлар хизмати АЭСнинг учинчи блоки ягона энерготизимдан узиб қўйилгани ҳақида маълум қилишган. Киев вақти билан тонгги соат 3 да АЭСдаги олтита блокдан фақат биттаси ишлаётгани билдирилган.
Запорожье АЭСидаги ёнғин ортидан Зеленский Байден ва Жонсон билан телефон орқали сўзлашди
Украина президенти Владимир Зеленский Запорожье атом электр станциясидаги вазият юзасидан АҚШ президенти Жо Байден билан телефон мулоқоти ўтказди. Оқ уй қайдича, Байден мазкур масалани АҚШ ядровий хавфсизлик вазирининг ўринбосари Жилл Хруби билан ҳам муҳокама қилган.
Бу орада Буюк Британия бош вазирининг матбуот хизмати Борис Жонсон ҳам Зеленский билан АЭСдаги вазият юзасидан музокара ўтказгани ҳақида маълумот тарқатди. Жонсон матбуот хизматига кўра, Британия Запорожье АЭСи ўққа тутилгани муносабати билан ошиғич тарзда БМТ Хавфсизлик кенгаши йиғилишини чақиради.
“Президент Путиннинг ўйламасдан қилаётган ҳаракатлари эндиликда тўғридан-тўғри бутун Европа хавфсизлигига таҳдид солмоқда”, дейилган бош вазир пресс-офиси баёнотида.
Аввалроқ Украинанинг “Энергоатом” ширкати Запорожье АЭСи бош директори в.б. Игорь Мурашовдан олинган маълумотга таянган ҳолда мазкур АЭС ядровий хавфсизлиги учун таҳдид туғилганини маълум қилган эди.
“Биз қўлимиздан келган барча ишни қиляпмиз, бироқ ёнғин давом этмоқда, ўт ўчирувчилар ўтказилмади. Катта хавф бор. Станцияда жанговар ҳаракатлар дамо этяпти. Реакторлар хавф остида”, дея қайд этган И. Мурашов.