Украиналик қочқинлар сони 1,5 миллион кишига етди
БМТнинг Қочинлар иши бўйича Олий комиссари Филиппо Гранди Россия Украинага бостириб кирганидан сўнг ўтган 10 кун ичида 1,5 миллион украин қочқинга айлангани тўғрисда маълум қилди.
“Бу Иккинчи жаҳон урушидан сўнг Европада юзага келган ўта тез ривожланаётган миграция инқирозидир”,-деб билдирди Гранди.
Россия ҳарбийлари Киевдан эвакуация қилинаёган тинч аҳолига ўқ отди
Россия ҳарбийлари Киев вилоятининг Ирпень шаҳрида эвакуация қилинаёган тинч аҳолига ўқ отди. Бу ҳақда Озодлик радиоси украин хизмати мухбири хабар берди.
Озодлик мухбирининг айтишича, Россия ҳарбийлари отган ўқдан камида уч киши, жумладан, 2 нафар бола ҳалок бўлди. Бир киши оғир яраланди. Мухбир рус ҳарбийлари эвакуация қилинаётган тинч аҳолига миномётдан ўқ отганини айтмоқда. Мазкур маълумот ҳозирча мустақил манбалар томонидан тасдиқланмади.
Сўнгги кунларда Киев атрофидаги Ирпень, Буча, Гостомель, Бородянка, Васильков, Ворзель шаҳарлари Россия томонидан узлуксиз бомбардимон қилинмоқда.
Олмаотада Россиянинг Украинага бостириб киришига қарши намойиш ўтказилди
Қозоғистоннинг энг йирик шаҳри бўлган Олмаотада 6 март куни Россиянинг Украинага бостириб киришига қарши намойиш ўтказилди.
Озодлик радиоси қозоқ хизмати мухбирининг воқеа жойидан хабар беришича, “Сариарқа” кинотеатрининг ортидаги истироҳат боғида ўтган намойишда бир неча юз киши иштирок этган. Улар Украина байроғини кўтариб, “Яшасин Украина”, “Урушга йўл йўқ”, "Путин, Ҳаага, қамоқ” каби шиорларни ҳайқириб турди.
Митингда сўзга чиққанлар “эртага Украинадаги каби воқеалар Қозоғистонда ҳам содир этилиши мумкин”, деган таҳминларни айтишган.
Намойишчилар Қозоғистон ҳукумати БМТда Россияга қарши овоз бермаганини танқид қилдилар. БМТда Россиянинг Украинага ҳужум қилишига қарши резолюцияни 193 давлатдан 141 таси қўллаган, Россия, Беларусь, Шимолий Корея, Эритрея, Сурия қарши овоз берган, Ўзбекистон, Қозоғистон, Қирғизистон ва яна 32 давлат бетараф қолган.
Украинанинг қатор шаҳарларида Россиянинг диверсия-разведка гуруҳлари қўлга олинди
Украина Хавфсизлик хизмати Киев, Днепр, Харьков ва Закарпатьеда Россиянинг диверсия-разведка гуруҳлари қўлга олингани тўғрисида хабар берди.
Хабарда таъкидланишича, Донецк вилоятида украин ҳарбийларига қуролли қаршилик кўрсатган диверсия-разведка гуруҳи асирга олинди. Улар Россия Украинага уруш очишидан бир кун олдин Қримдан кириб келгани аниқланди.
Киевда Беларусь ва Россия фойдасига тарғибот олиб борган “ака-ука пропагандистлар” ушланган. “Улар Россия ва Беларусь махсус хизматлари билан тиғиз ҳамкорлик қилганига оид исбот-далиллар мавжуд”,-дейилади билдирувда.
Харьков вилоятида эса рус ҳарбийларига ўқ отишни мувофиқлаштириб турган шахс қўлга олинган. Расман билдирилишича, у Россия ҳарбийларига ҳарбий объектлар ва стартегик инфраструктура тўғрисида ахборот етказиб берган. Айни пайтда қўлга олинган шахс “рус реактив артилериясини атайлабдан тинч аҳоли яшайдиган ҳудудларга ўқ отишга йўналтириб турган ва бунинг оқибатида ўнлаб тинч аҳоли ҳалок бўлган”.