Бердянск расмийлари россиялик истилочилар билан ҳамкорлик қилишдан бош тортди
Украинанинг Запорожье вилояти Бердянск тумани Россия қўшинлари томонидан эгаллаб олинган, полиция бўлими тарқатиб юборилган.
Бердянск ишғоли чоғида бир киши ҳалок бўлган, яна бир киши яраланган. Маҳаллий транспорт фаолият кўрсатмаяпти, дея маълум қилган Бердянск туман маъмурияти.
“Шаҳар расмийлари истилочилар билан ҳамкорлик қилишдан бош тортишди”, дейилган хабарномада.
Беларусда якшанба куни Россиянинг Украинага қуролли ҳужумига қарши акцияга чиққан 800 киши тутиб кетилди
Беларусда 27 февраль куни 800 киши қўлга олинган. ИИВ маълумотига кўра, милиция норозиларга қарши мамлакат Жиноят кодексининг 342-моддаси (“Жамоат тартибини қўпол равишда бузадиган хатти-ҳаракатларни уюштириш ва уларга ҳозирланиш ёки уларда фаол иштирок этиш”) бўйича иш қўзғатган.
Якшанба куни пойтахт Минск ва Беларуснинг бошқа шаҳарларида Россиянинг Украинага бостириб киришига қарши оммавий норозилик чиқишлари бўлиб ўтган. Акциялар Лукашенко ташаббуси билан Конституцияга ўзгартишлар киритишга оид референдумда овоз беришнинг асосий кунига тўғри келиб қолган.
Украина Мудофаа вазирлиги Россия шу пайтгача 5300 чоғли аскарини йўқотганини билдирди
Россия армияси шахсий таркиби кўрган талафот 28 февраль тонгидаги ҳолатга кўра тақрибан 5300 кишини ташкил қилган. Бу ҳақда Украина мудофаа вазирининг ўринбосари Анна Маляр маълум қилди.
Вазирлик маълумотига кўра, 24 февралдан 28 февралгача Россия армияси 29 та учоғи, 29 та вертолёти, 191 та танки, 816 та ҳарбий зирҳли машинаси, 74 тўпи, битта “Бук” русумли зенит-ракета мажмуаси, 21 та “Град” тизими, 291 та автомобили, 60 та цистернаси, 3 та дрони, 2 та қайиғи, 5 та ҳавога қарши мудофаа тизими ҳамда 5300 чоғли ҳарбийсидан айрилган.
Россия Мудофаа вазирлиги 27 февраль куни илк бор ўз армияси Украинада талафот кўрганини тан олган, бироқ бу борада бирор рақам келтирган эмас.
Украина делегацияси музокара ўтказиш учун украин-беларусь чегарасига келди
Украина делегацияси Россия билан музокара ўтказиш учун украин-беларусь чегарасига вертолётда етиб келди. Делегация парламентдаги “Слуга народа” фракцияси раиси Давид Арахамия, мудофаа вазири Алексей Резников, президент маъмурияти бошлиғи маслаҳатчиси Михаил Подоляк ва бошқа қатор расмийлардан иборат.
Музокараларнинг асосий мавзуси - ўқ отишни зудликда тўхтатиш ва Украина ҳудудидан Россия қўшинларини чиқариш.