Харьковда Миллий университет факультетларидан бири ракета зарбасига нишон бўлди
Украина ички ишлар вазирининг маслаҳатчиси Антон Герашченко Харьковда Миллий университет Социология факультетининг биноси ёнаётганига оид видеони ёйинлади.
Мазкур бино чоршанба куни эрталаб ракета зарбасига нишон бўлган полиция бошқармаси биноси жойлашган кўчанинг нариги томонида эди.
Маҳаллий аҳоли шаҳарда портлашлар содир бўлиб тургани, улар тундан бери тинмагани ҳақида айтмоқда.
Россия Мудофаа вазирлиги Украинанинг Херсон шаҳри эгалланганини иддао қилди
Россия Мудофаа вазирлиги Херсон шаҳри ўз қўшинлари томонидан эгаллаб олингани ҳақида баёнот тарқатди. Украина жанубида жойлашган 300 минг кишилик вилоят маркази уруш бошланганидан бери Москва иддаосича эгаллаб олинган энг йирик шаҳар бўлди.
Украина томони шаҳар бой берилганини тасдиқлаганича йўқ, шаҳар мэри Фейсбукда “биз ҳали ҳам Украинамиз”, деб ёзган.
Украинанинг Херсон вилоятида жанглар 24 февралдаёқ бошланган. Эртаси куни россиялик ҳарбийлар стратегик аҳамиятга эга Антонов кўпригини эгаллашга муваффақ бўлишган.
1 март куни мэр Игорь Колихаев шаҳарнинг маъмурий маркази қамалда қолгани, бироқ ҳали ҳам украиналик расмийлар назорати остида эканини билдирган эди.
Украина Россия аскарлари орасидаги талафотлар 5840 кишига етганини билдирди
Украина Мудофаа вазирлиги 2 март ҳолатига кўра, Россия қўшини тортган талафотлар тўғрисда маълумот берди. Билдирилишича, уруш бошланганидан бери Украинада Россиянинг 5840 аскари ўлди, яраланди ва асирга олинди
Бундан ташқари шу кунгача Россия 211 танк, 862 зирхли техника, 85 замбарак, 40 реактив ўқ отиш тизими, 9 ҳаводан ҳимоя тизими, 30 самолёт, 31 вертолёт, 355 автомашина, 2 та қайиқ, 60 цистерна ва 3 дронни йўқотган.
1 март куни Россия Мудофаа вазирлиги олти кунлик жанглар давомида Украинанинг 1325 ҳарбий объекти, 395 танки ва бошқа зирхли техникаси, 59 та ракета тизими ва 179 та замбарак ҳамда миномётлар йўқ қилинганини билдирган.
Энергодар аҳолиси Россия қўшинини шаҳарга киритмади
Украинанинг Энергодар шаҳри аҳолиси Россия ҳарбийларини шаҳарга киритмагани тўғрисида шаҳар мэри Дмитрий Орлов маълум қилди.
Энергодарда Европадаги энг йирик Запарож АЭСи жойлашган. Мазкур АЭС ишчи-ходимлари рус ҳарбийлари йўлини тўсиб қўйган.
“Биз рус ҳарбийларига АЭС ва шаҳар ишончли ҳимоя остида эканини маълумот учун етказдик. Аҳоли уларни шаҳарга бир қадам ҳам киритмаслигини таъкидладик. Улар позициямиздан хабардор бўлишди ва ўз раҳбариятига ҳисобот бериш учун жўнаб кетди”,-деди мэр рус ҳарбийлари билан бўлиб ўтган учрашув тўғрисида.
Россия ҳарбийлари ва маҳаллий аҳоли вакиллари ўртасидаги учрашув маҳаллий вақт билан соат 15:00 (Тошкент вақти билан соат 20:00) да ўтказилади.
“Вазият ўзгариб кетиши мумкин! Ҳамма нарсага тайёр туринглар!”,-деб огоҳлантириди аҳолини Дмитрий Орлов.