Макрон россиялик пропагандистларни ёлғончиликда айблади
Франция президенти Эммануэль Макрон 2 март куни француз халқига қилган мурожаатида Россияни Европада янги урушни бошлаган агрессор, деб атади.
“Бу уруш, айримлар айтаётганидек, НАТО ва Ғарб билан Россия ўртасидаги зиддият маҳсули эмас. Украина НАТОнинг базалари ҳам, қўшинлари ҳам йўқ”, дея билдирган Франция президенти.
Макрон Россия пропагандасининг Москва гўё “Украинада миллатчиликка қарши жанг олиб бораётгани”га оид иддаосини “ёлғон” деб атаган.
“Бу ёлғон, бу нацизмга қарши курашган Россия тарихи ва Украина тарихини топташдир”, дея қайд этган Эммануэль Макрон.
БМТ: Уруш бошланганидан буён 1 миллион одам Украинани тарк этди
Россия босқини бошланганидан бери Украинадан 1 миллион одам чиқиб кетган. Бу ҳақда Бирлашган Миллатлар Ташкилоти маълумот тарқатди.
Польша президенти Анжей Дудага кўра, унинг мамлакатига 500 мингга яқин украиналик келган.
Венгрия чегарасини 100 мингдан зиёд киши кесиб ўтган, яна бир неча ўн минг киши Молдова, Руминия ва Словакияга чиқиб кетган.
Украинадан эвакуация қилинган ўзбекистонликларни юртига қайтариш учун еттита рейс амалга оширилди
Украинадан Польшага эвакуация қилинган ўзбекистонликларни ватанига қайтариш бўйича еттита махсус қатнов амалга оширилган.
Транспорт вазирлиги маълумотига кўра, еттинчи рейс 2 март куни Тошкент вақти билан соат 18:45 да Катовице аэропортидан парвоз қилиб, 3 мартга ўтар кечаси соат 00:30 да пойтахт аэропортига қўнган.
Вазирлик мазкур рейс билан Украинадан эвакуация қилинган 181 нафар ўзбекистонлик юртига қайтарилганини қўшимча қилган, бироқ Польшадан умумий ҳисобда қанча ўзбекистонлик олиб келинганига аниқлик киритган эмас.
Россияда брокерлардан валюта харид қилаётганлар бундан буён 30 фоиз қўшимча пул тўлайди
Россия Марказий банки брокерлар зиммасига доллар, евро ва фунт стерлинг харид қилаётган жисмоний шахслардан қўшимча 30 фоизлик комиссия пули олиш мажбуриятини юклашга оид қарор қабул қилди.
Регуляторнинг “Интерфакс” агентлигига берган изоҳига кўра, комиссия “банклар ва брокерлар ўртасидаги рақобат шартларини тенглаштиради, чунки банклар валюта сотиш ва харид қилиш ўртасидаги spread’ни ишга солиш имкониятига эга”.
Янги тартиб 3 март куни Москва вақти билан соат 09:00 дан бошлаш кучга кирган.
Аввалроқ Марказий банкнинг мазкур кўрсатмаси ҳақида “ВТБ Брокер” ва “Атон” инвестиция ширкатлари маълум қилишган эди. “Атон” вакилларига кўра, бу чора МБ қарори бекор бўлгунича амалда бўлади.
Чоршанба (2 март) куни Москва биржасида евро курси тарихда биринчи марта 122 рублга, доллар курси эса 109 рублга кўтарилган. Россия валютаси қадри рус қўшинларининг Украинага бостириб кириши ортидан санкциялар жорий қилиниши манзарасида тобора пасайиб бормоқда.