Киев вилоятидаги Ирпень шаҳри орқали эвакуация қилинаётган тинч аҳоли.

Россия Украина шаҳарларини вайрон қилмоқда. Урушнинг ўн иккинчи куни

феврал 27, 2022

Россиянинг Украинага босқини давом этмоқда. БМТга кўра, Россия босқини бошланганидан бери Украинани тарк этганлар сони 1 миллиондан ошган.
БМТга аъзо 193 давлатдан 141 таси Россиянинг Украинага босқини қораланган резолюцияни қўллаб овоз берди. Ўзбекистон овоз беришда қатнашмаган.
Сингапур Россия банкларига қарши санкциялар киритди ва икки томонлама маҳсулотларни экспорт қилишни тақиқлади.
Samsung Россияга маиший техника,телефонлар ва чиплар етказиб беришни тўхтатди.
"Роскомнадзор" Facebook ва Тwitterни блоклади.
АҚШ, ЕИ, Буюк Британия ва бошқа кўплаб мамлакатлар Москвага қарши янги-янги иқтисодий санкцияларни жорий қилмоқда. Европа рус учоқларига осмонини ёпди, Туркия эса Босфор бўғозини Россия ҳарбий кемалари учун ёпиб қўйди.
Германия Европа Иттифоқи санкцияларига тушган асли ўзбекистонлик миллиардер Алишер Усмоновнинг 156 метрли яхтасини ҳибс қилди.
38 давлат Украинадаги эҳтимолий уруш жиноятларини тергов қилишни сўраб Ҳаагадаги Халқаро жиноят судига мурожаат қилган.

"Росавиация" авиакомпанияларга хорижга парвозларни тўхтатишни тавсия қилди

Россиянинг Федерал ҳаво транспорти агентлиги "Росавиация" чет эл реестрида бўлган самолётларга эга авиакомпанияларга хорижга парвозларни 6 март соат 00. 00 дан ва чет элдан парвозларни 8 март соат 00. 00 дан тўхтатишни тавсия қилади.

Чекловлар ҳаво кемаларини ҳибсга олиш ёки ушлаб туриш хавфи бўлмаган Россия авиакомпанияларига ва Россия билан ҳаво қатновини чекламаган мамлакатларнинг хорижий авиакомпанияларига таъсир қилмаслиги айтиляпти.

Тошкентдаги украин элчиси россияпараст телеканалларни ёпишни сўради

Ўзбекистонлик журналист Марина Козлова Украинанинг Ўзбекистондаги фавқулодда ва мухтор элчиси Микола Дорошенко билан.

Ўзбекистоннинг Украинадаги фавқулодда ва мухтор элчиси Микола Дорошенко Ўзбекистон Ташқи ишлар вазирлигига “Украинадаги уруш ҳақида ёлғон хабар тарқатаётган телеканалларни ёпишни сўраб” нота юборган.

Бу ҳақда элчи Ўзбекистондаги мустақил Yep.uz нашрига берган интервьюсида маълум қилди.

Ўзбекистон ТИВнинг Тошкентдаги украин элчиси сўровига жавоби маълум эмас.
Аммо АОКА қошидаги Ўзбекистон Оммавий коммуникациялар масалалари бўйича марказ 4 март куни Yep.uz нашри асосчиси, мустақил журналист Марина Козоловага талабнома йўллаб, ундан Украина элчиси билан суҳбатни “24 соат давомида” олиб ташлашни талаб қилган.

Марказ мақолада шафқатсизликни тарғиб қилувчи фото ва видео метериаллар аниқланганлигини важ қилиб келтирган.
Аммо журналист АОКАнинг талабини бажаришдан бош тортган. Бу ҳақда у ўзининг Фэйбук саҳифасида ёзди.

ОАВ: Италияда Алишер Усмоновнинг кўчмас мулки ҳибс этилган

Италия ҳукумати россиялик миллиардер Алишер Усмонов ва кремлпараст телебошловчи Владимир Соловёвнинг мулкини мусодара қилган. Бу ҳақда Италияда чиқадиган етакчи нашрлардан бири La Repubblica хабар берди.

Нашрнинг ёзишича, Соловёвнинг Комо кўлидаги иккита вилласи, Усмоновнинг эса Сардиниядаги вилласи ҳибсга олинган.

Усмонов ва Соловёв Россиянинг Украинага бостириб кириши сабабли Европа Иттифоқининг санкциялар рўйхатига киритилган.

Аввалроқ La Repubblica Италия молия полицияси санксиялар рўйхатидаги бошқа шахслар – россиялик тадбиркорлар Алексей Мордашов ва Геннадий Тимченконинг яхталарини, шунингдек, Думанинг собиқ депутати Олег Савченконинг Тосканадаги вилласини мусодара қилгани ҳақида хабар берган эди.

Украинада Россиянинг икки ҳарбий учоғи уриб туширилди

Россиянинг Су-34 самолёти Чернигов яқинида, яна бир самолёт Николаев яқинида уриб туширилди, дея хабар бермоқда Украина ахборот воситалари. Учувчилар асирга олинган.

Давомини ўқинг