Байден Конгрессдан Украинага ёрдам учун 37,7 миллиард доллар сўради

АҚШ президенти Жо Байден 15 ноябрь куни Конгрессга Украинага ёрдам сифатида 37,7 миллиард доллар ажратиш тўғрисида сўров киритди. Мазкур маблағнинг 21 миллиард долларига украин армияси учун қурол сотиб олиш назарда тутилган.

Олти ой олдин Конгресс Украинани қўллаб-қувватлашга 40 миллиард доллар ажратган эди. Байден маъмурияти расмийларига кўра, бу пулнинг 18 миллиардига Украина учун қурол сотиб олинган.

Байденнинг сўрови Конгресснинг амалдаги таркиби томонидан кўриб чиқилиши лозим. Ҳозирда Конгресснинг ҳар икки палатасида кўпчиликни демократлар ташкил қилмоқда. 2023 йилнинг 3 январидан эса янги таркибдаги Конгресс иш бошлайди. Унда Вакиллар палатасида кўпчиликни республикачилар ташкил этиши, Сенатда эса демократлар асосий ўринни эгаллаши кутилмоқда. Республикачилар партияси вакилларининг бир қисми Киевга кенг кўламли ёрдам кўрсатилишини қўлламайди.

НАТО Польшадаги ракета портлашларини муҳокама қилади

НАТОга аъзо давлатлар вакиллари 16 ноябрь куни Украинага отилган ракеталар Польша ҳудудига келиб тушганини муҳокама қилади. Мазкур йиғилиш Польша илтимоси билан ўтказилмоқда.

Reuters агентлигининг билдиришича, йиғилиш НАТО низомининг 4-моддасига асосан ўтказилмоқда. Бу моддага биноан НАТОга аъзо давлатлардан бирортаси “ўзининг ҳудудий яҳлитлиги, сиёсий мустақиллиги ёки хавфсизлиги”дан ҳавотир билдирган тақдирда, мана шундай йиғин чақириш ҳуқуқига эгадир.

15 ноябрда Польшанинг Украина билан чегара яқинида иккита ракета портлаган. Дастлабки маълумотга кўра, икки киши ҳалок бўлган. Associated press агентлигининг АҚШ разведкасининг исми ошкор этилмаган юқори мартабали мулозимларига таяниб хабар беришича, ракеталар Польша ҳудудига учган ва улар Россияга тегишли.

Бу ҳодиса ортидан Польша президенти Анжей Дуда қатор ҳукуматлар раҳбарлари, жумладан, АҚШ президенти Жо Байден билан телефон мулоқоти ўтказди. Суҳбат давомида Жо Байден “АҚШ НАТОдаги иттифоқдошлари билан якдил” эканини айтган ва Польшага ракета портлашларини тергов қилишда кўмак кўрсатишга тайёрлигини билдирган.

Россия Мудофаа вазирлиги рус ракеталарининг Польша ҳудудига қулагани ҳақидаги хабарларни "вазиятни кучайтириш учун атайлаб қилинган провокация" деб атади.

Польшада ракета портлашлари ортидан Миллий хавфсизлик кенгаши фавқулодда йиғилиш ўтказди

Польша ҳукумати сешанба куни Украина билан чегара яқинидаги ҳудудига иккита ракета тушгани ҳақидаги хабар ортидан фавқулодда йиғилиш ўтказди.

Варшава портлашларда Польшанинг икки фуқароси ҳалок бўлганини тасдиқлади, бироқ ҳодисага айнан нима сабаб бўлгани ва ракеталар қаердан келган бўлиши мумкинлиги ҳақида ҳозирча баёнот бермади.

Учрашувдан сўнг Польша ҳукумати вакили Пётр Мюллернинг айтишича, Варшава НАТО низомининг 4-моддаси, яъни алянс доирасида ўз аъзоларидан бирини хавотирга солаётган таҳдид бўйича маслаҳатлашувларни бошлаш имкониятини кўриб чиқмоқда.

Мюллер воқеа юзасидан қўшимча изоҳ беришдан бош тортди. Польшанинг Radio ZET радиостансияси биринчи бўлиб ракета ҳодисаси ҳақида ўз манбаларига таяниб хабар берди ва ракеталар Россияники эканлигига аниқлик киритмади.

Бироқ кейинроқ Associated Press агентлиги Америка разведкасининг номи ошкор этилмаган юқори мартабали амалдорларига таяниб, ракеталар Россияга тегишли эканлиги ҳақида ёзди.

Кечқурун Польша ҳукумати қўшинларни шай ҳолатга келтираётганини эълон қилди.

Россия Мудофаа вазирлиги Россия ракеталарининг Пшеводува ҳудудига қулагани ҳақидаги хабарларни "вазиятни кучайтириш учун атайлаб қилинган провокация" деб атади.

Украина президенти Владимир Зеленский кечки баёнотида Россия ракеталари Польшада портлаганини айтди.

"Бугун Россия ракеталари Польша ҳудудига урилди, одамлар ҳалок бўлди. Барча украиналик биродарларнинг ҳамдардликларини қабул қилинг " деди Зеленский

Польша ҳудудига "Россия ракеталари" тушди

Сешанба куни Польшанинг Украина билан чегара яқинида иккита ракета портлаган. Дастлабки маълумотга кўра, икки киши ҳалок бўлган. Бу ҳақда Польша радиоси ва Associated press агентлиги хабар берди.

Агентлик АҚШ разведкасининг исми ошкор этилмаган юқори мартабали мулозимларига таяниб хабар беришича, ракеталар Полша ҳудудига учган ва улар Россияга тегишли.

Польшанинг “Radio ZET”радиостанцияси хабарига кўра, ракеталар Пшеводов қишлоғида портлаган.

Портлашлар ортидан Польша ҳукумати хавфсизлик ва мудофаа қўмитасининг фавқулодда йиғилишини ўтказмоқда, деб ёзади “Gazeta Wyborcza”. Баъзи польшалик журналистлар бу рус ракеталари эканлигини даъво қилмоқда. Бироқ, улар Украина ҳаво мудофаасининг С-300 ракеталари бўлиши ҳам мумкин.

Ҳодиса ҳақидаги маълумотни Латвия мудофаа вазири Артис Пабрикс ҳам тасдиқлади.

"Польшалик қуролли биродарларга ҳамдардлик билдираман. Россиянинг жиноий режими ракеталарни учирмоқда, улар нафақат Украина фуқароларига, балки Полшадаги НАТО ҳудудига ҳам келиб тушди", - деб ёзди Пабрикс Twitter саҳифасида.

Пшеводов қишлоғи Украинанинг Львов вилояти билан чегарасидан беш километр узоқликда жойлашган.

Россия сешанба куни Украина шаҳарларини яна ҳужумга тутди. Уларнинг асосий мақсади - энергетика инфратузилмаси объектларини яксон қилиш. Украина президенти девони маълумотларига кўра, энергия таъминоти тизимига ракета ҳужумларидан сўнг Украинада 7 миллионга яқин хонадон электрсиз қолган.