Зленский БМТдан Россияга қарши кескин чора кўришни сўради
Украина президенти Владимир Зеленский Бирлашган Миллатлар Ташкилоти Хавфсизлик Кенгашига Россиянинг инфратузилма обектларига ҳужумлари юзасидан мурожаат қилиб, Россия ҳаво ҳужумларини тўхтатиш учун чора кўришни сўради.
Кеча Россиянинг Украина бўйлаб берган оммавий ракета зарбалари натижасида Киевда атом элэктр станциялари тўхтатилди ва бир қанча тинч аҳоли вакиллари ҳалок бўлди.
“Биргина бугуннинг ўзида 70 та ракета келиб тушди. Бу терроризмнинг русча формуласи. Барча ракеталар бизнинг энергетика инфратузилмамизга қарши йўналтирилди. Шунингдек, турар-жой бинолари, касалхоналар, мактаблар, транспортларга ҳам зарар етди. Россиянинг террори нафақат Украинада, балки қўшни Молдовада ҳам блекаутга сабаб бўлди”, деди Зеленский БМТ Хавфсизлик Кенгашига қилган онлайн видеомурожаатида.
Украина дунёдан кечаги ҳаво ҳужумларига "жуда қатъий муносабат" билдирилишини кутмоқда, дея қўшимча қилди Зеленский.
Россия БМТ Хавфсизлик Кенгашида вето ҳуқуқига эгалигини ҳисобга олинса, кенгаш Зеленский мурожаатига жавобан бирор чора кўриши даргумон.
Зеленский Россияни унинг ҳаракатларига оид ҳар қандай қарорга овоз бериш ҳуқуқидан маҳрум қилишга чақирди:
“Биз бир халқаро террорчининг тутқуни бўла олмаймиз. Россия энергия генераторини биз учун БМТ Низомидан ҳам муҳимроқ воситага айлантириш учун қўлидан келганини қилмоқда."
АҚШнинг БМТдаги доимий вакили Линда Томас-Гринфилд “Путин Украина халқини азоблаш учун келаётган қишдан яққол қуроль сифатида фойдаланмоқда"дея фикр билдирди.
Россия президенти "мамлакатни совуқда қолдириб, бўйсундиришга ҳаракат қилмоқда", дея қўшимча қилди АҚШ дипломати.
Россиянинг БМТдаги доимий вакили Василий Небензя эса бунга жавобан Зеленскийнинг видеомурожаати кенгаш қоидаларига зид эканлигидан шикоят қилиб, Украина ва унинг Ғарбдаги иттифоқдошлари томонидан янграган айбловларни “асоссиз таҳдид ва ультиматумлар” дея рад этди.
Небензя, Украина ҳаво ҳужумидан мудофаа тизимининг Россия ракеталарига қарши отган ракеталари Украина инфратузилмасига ҳамда тинч аҳоли ҳудудларига қулаб зарар етказганини иддао қилиб, Ғарбни Украинага ҳаво ҳужумидан мудофаа тизимлари етказишни тўхтатишга чақирди.
Зеленский: Украина иссиқлик ва сув билан таъминловчи "енгилмас марказлар"ни ташкил қиляпти
Россия қишда элeктр станциялари ва бошқа иншоотларни ишдан чиқарадиган бўлса, украиналиклар асосий коммунал хизматлар юзасидан “енгилмас марказларга” мурожаат қилишлари мумкин, дея маълум қилди Владимир Зеленский.
"Биз бутун мамлакат бўйлаб аҳолини қўллаб-қувватлашга қаратилган янги лойиҳамиз - "енгилмас марказлар"ни ёълга қўйишда давом этяпмиз. Ҳозиргача 4000 та шундай марказлар барпо этилди, яна кўплари қурилиш жараёнида. Агар Россия яна оммавий зарбалар беришни бошласа ва бир неча соат ичида элeктр қуввати тикланмаслиги аниқ бўлса, шунда бу енгилмас марказлардан фойдаланамиз”.
Россиянинг оммавий ракета ҳужумлари натижасида бир вақтнинг ўзида 10 миллион украиналик узоқ вақт давомида элeктр қувватидан узилиб қолди. Украина миллий элeктр тармоқлари оператори етказилган зарар миқдори жуда катта эканлигини билдирди.
“Ишончим комил, бир-биримизга ёрдам бериш орқали барчамиз биргаликда бу қишдан ўта оламиз”, деди Зеленский ўзининг тунги видеомурожаатида.
Украина ҳукумати шу ой бошида Россия кучлари чиқиб кетган Херсон шаҳрида ҳам худди шундай фавқулодда ёрдам пунктларини ташкил қилган эди. Шаҳар марказида ташкил этилган бундай пунктларда одамлар келиб телефонларини қувватлантиришган.
Рим папаси Украинанинг урушдан тортаётган азоб-уқубатларини Совет давридаги геноцидга уриниш билан қиёслади
Рим папаси Франсиск украиналиклар бугун босқиндан азият чекаётганини таъкидлар экан, урушни Совет раҳбари Иосиф Сталин 1930 йилларда халқни очарчиликка дучор қилган “даҳшатли геноцид”га қиёслади.
Франсис бу ҳақида Авлиё Питер майдонида минглаб одамлар олдида қилган чиқишида гапирди.
"Келаётган 26 ноябрда Сталин томонидан сунъий равишда юзага келтирилган 1932-33 йиллардаги очарчилик қурбонларини хотирлаймиз. Келинг, ушбу геноцид қурбонлари ва миллионлаб украиналиклар учун ибодат қилайлик. Бугун босқиндан азият чекаётган болалар, аёллар, қариялар учун ибодат қилайлик.”
Юзлаб йиллар давомида украин тили ва украин маданияти, миллий ўзига хослигининг ҳар қандай кўриниши дастлаб Россия империяси, кейинчалик Совет давлати томонидан йўқ қилиб келинди.
Россия февраль ойида Украинага бостириб кирганидан бери Рим папаси Франсис деярли барча оммавий чиқишларида Украинани тилга олиб келади ва уруш ядро қуролидан фойдаланиш хавфини кучайтираётганини ҳамда бу назорат қилиб бўлмайдиган глобал оқибатларга олиб келишидан огоҳлантириб келади.
Ўтган ой папа Россия президенти Владимир Путиндан Украинадаги "зўравонлик ва одамларни ўлдириш"ни тўхтатишни сўради.
Херсонликларнинг газ ва чироқсиз бир куни
Украина жанубидаги яқинда озод қилинган Херсон аҳолиси оловда овқат пишириб кун кечирмоқда. Шаҳар ҳали ҳануз электр, сув ва иситиш тизимисиз қолмоқда.
Украина Херсондан чекинган рус кучлари муҳим инфратузилма обектларига зарар етказгани ҳамда шаҳарни электр, сув ва газ таъминотисиз қолдирганини айтмоқда.
"Бир неча ҳафтадан бери элэктр токи йўқ. Ювиниш ва кир ювиш учун сув йўқ. Мен кечки 7 ларда уйга келаман, ўчоқда пиширилган овқатни ейман ва ухлашга ётаман", деди Сергей исмли маҳаллий аҳоли вакили.
Бир гуруҳ қўшнилар биргаликда ўзларида бор маҳсулотларни қўшиб шўрва тайёрлашмоқда. Баъзилар овқатни пишириш учун ўтин теришга кетган.
Яна бир маҳаллий турғун Валерия Хайдтнинг айтишича, жамоавий руҳ одамларга қийинчиликларни енгишга ёрдам бериб, уларга умид бахш этмоқда.
"Ҳар ким қўлидан келганича ёрдам беради, биз ҳам ёрдам берамиз. Биз бирга яшаймиз. Ҳозир на иш, на пул йўқ. Боримизни ўртага ташлаб, овқат қиляпмиз. Ҳаммамизнинг фарзандларимиз бор".
Хайдт ва унинг қўшнилари Рождество ва Янги йил арафасида шаҳарда асосий коммунал хизматлар тикланишига умид қилмоқда.
"Электр ва сув таъминотни тиклаш устида иш олиб борилаётганини айтишди. Умид қиламизки, ҳаммаси Янги йилга қадар тикланади. Электр токи ва сув энг зарурий эҳтиёж. Қай тарзда овқат пиширишимиз муҳим эмас, муҳими омон қолишимиз”, - дейди Сергей.