Зеленский: Украина иссиқлик ва сув билан таъминловчи "енгилмас марказлар"ни ташкил қиляпти
Россия қишда элeктр станциялари ва бошқа иншоотларни ишдан чиқарадиган бўлса, украиналиклар асосий коммунал хизматлар юзасидан “енгилмас марказларга” мурожаат қилишлари мумкин, дея маълум қилди Владимир Зеленский.
"Биз бутун мамлакат бўйлаб аҳолини қўллаб-қувватлашга қаратилган янги лойиҳамиз - "енгилмас марказлар"ни ёълга қўйишда давом этяпмиз. Ҳозиргача 4000 та шундай марказлар барпо этилди, яна кўплари қурилиш жараёнида. Агар Россия яна оммавий зарбалар беришни бошласа ва бир неча соат ичида элeктр қуввати тикланмаслиги аниқ бўлса, шунда бу енгилмас марказлардан фойдаланамиз”.
Россиянинг оммавий ракета ҳужумлари натижасида бир вақтнинг ўзида 10 миллион украиналик узоқ вақт давомида элeктр қувватидан узилиб қолди. Украина миллий элeктр тармоқлари оператори етказилган зарар миқдори жуда катта эканлигини билдирди.
“Ишончим комил, бир-биримизга ёрдам бериш орқали барчамиз биргаликда бу қишдан ўта оламиз”, деди Зеленский ўзининг тунги видеомурожаатида.
Украина ҳукумати шу ой бошида Россия кучлари чиқиб кетган Херсон шаҳрида ҳам худди шундай фавқулодда ёрдам пунктларини ташкил қилган эди. Шаҳар марказида ташкил этилган бундай пунктларда одамлар келиб телефонларини қувватлантиришган.
Зленский БМТдан Россияга қарши кескин чора кўришни сўради
Украина президенти Владимир Зеленский Бирлашган Миллатлар Ташкилоти Хавфсизлик Кенгашига Россиянинг инфратузилма обектларига ҳужумлари юзасидан мурожаат қилиб, Россия ҳаво ҳужумларини тўхтатиш учун чора кўришни сўради.
Кеча Россиянинг Украина бўйлаб берган оммавий ракета зарбалари натижасида Киевда атом элэктр станциялари тўхтатилди ва бир қанча тинч аҳоли вакиллари ҳалок бўлди.
“Биргина бугуннинг ўзида 70 та ракета келиб тушди. Бу терроризмнинг русча формуласи. Барча ракеталар бизнинг энергетика инфратузилмамизга қарши йўналтирилди. Шунингдек, турар-жой бинолари, касалхоналар, мактаблар, транспортларга ҳам зарар етди. Россиянинг террори нафақат Украинада, балки қўшни Молдовада ҳам блекаутга сабаб бўлди”, деди Зеленский БМТ Хавфсизлик Кенгашига қилган онлайн видеомурожаатида.
Украина дунёдан кечаги ҳаво ҳужумларига "жуда қатъий муносабат" билдирилишини кутмоқда, дея қўшимча қилди Зеленский.
Россия БМТ Хавфсизлик Кенгашида вето ҳуқуқига эгалигини ҳисобга олинса, кенгаш Зеленский мурожаатига жавобан бирор чора кўриши даргумон.
Зеленский Россияни унинг ҳаракатларига оид ҳар қандай қарорга овоз бериш ҳуқуқидан маҳрум қилишга чақирди:
“Биз бир халқаро террорчининг тутқуни бўла олмаймиз. Россия энергия генераторини биз учун БМТ Низомидан ҳам муҳимроқ воситага айлантириш учун қўлидан келганини қилмоқда."
АҚШнинг БМТдаги доимий вакили Линда Томас-Гринфилд “Путин Украина халқини азоблаш учун келаётган қишдан яққол қуроль сифатида фойдаланмоқда"дея фикр билдирди.
Россия президенти "мамлакатни совуқда қолдириб, бўйсундиришга ҳаракат қилмоқда", дея қўшимча қилди АҚШ дипломати.
Россиянинг БМТдаги доимий вакили Василий Небензя эса бунга жавобан Зеленскийнинг видеомурожаати кенгаш қоидаларига зид эканлигидан шикоят қилиб, Украина ва унинг Ғарбдаги иттифоқдошлари томонидан янграган айбловларни “асоссиз таҳдид ва ультиматумлар” дея рад этди.
Небензя, Украина ҳаво ҳужумидан мудофаа тизимининг Россия ракеталарига қарши отган ракеталари Украина инфратузилмасига ҳамда тинч аҳоли ҳудудларига қулаб зарар етказганини иддао қилиб, Ғарбни Украинага ҳаво ҳужумидан мудофаа тизимлари етказишни тўхтатишга чақирди.
Украиналиклар жангда ўлдирилган санъаткор билан видолашди
Украиналиклар 24-ноябр куни рус босқинчиларига қарши курашда қатнашган ва шарқий фронтда снайпер томонидан ўлдирилган 26 ёшли балетчи учун мотам тутдилар.
Киевдаги Миллий опера театри ходими Вадим Хлупянец Донецк вилояти шарқидаги стратегик аҳамиятга эга Бахмут шаҳри яқинидаги жангда ҳалок бўлди.
Аскарлар унинг тобутини театрга олиб боришди, у ерда санъаткорлар ва ходимлар Вадим билан хайрлашиш учун саф тортдилар. Маросим тугаб, тобут олиб кетилаётганда уни охирги марта олқишлашди.
Вадимнинг қўмондони Денис Попов мотам тутувчиларга мурожаат қилиб, уларга: "Украинанинг энг яхши ўғиллари ўлмоқда", деди.
Хлупянец Донецкда туғилган ва уруш бошида Украина Қуролли кучлари сафига кўнгилли бўлиб қўшилган эди.
Россиянинг ракета зарбаларидан кейин Украина ҳудудлари электрсиз қолди
Қиш арафасида Москва Украинанинг энергетика обектларини нишонга олиб, ишдан чиқармоқда. Оммавий ҳужумлар пайтида камида олти киши ҳалок бўлгани айтилди.
Фавқулодда ёрдам бригадалари кечаги бомбардимонлардан сўнг ярадорларни Киевдаги касалхонага олиб борган, бироқ касалхонада ҳам электр таъминоти узилган.
Шифохона ходимлари генераторлардан фойдаланишига тўғри келмоқда.
Евген Лапшин, шифокор:
“Шифохонада ҳозир сув таъминоти ўчган. Бироқ бизда сув захираси бор. Олдиндан тайёргарлик кўриб қўйгандик"
Киев чеккасидаги Вишгородга ракета келиб урилиши натижасида камида беш киши ҳалок бўлган, ўнлаб одамлар яраланган.
Беш қаватли бинонинг юқори қавати зарбадан кейин бир соат вақт ўтиб аланга ичида қолган. Ўт ўчирувчилар ёнғинни бартараф этиш учун жалб қилинган. Бинонинг бешала қаватидаги хонадонларга шикаст етган.
Анна Волочай, маҳаллий турғун:
“Турмуш ўртоғим ҳужжатларимиз қаердалигини сўради. Мен жуда қўрқиб кетдим. Ишдан югуриб келдим. Иш жойим шу яқин атрофда. Хайриятки, эрим яхши экан, жароҳатланмаган. Ҳаммаси яхши бўлишига умид қиламан. Бинодан ярадорларни олиб кетишаётганини кўрдим. Улар ҳозир тирикми ёки йўқ билмайман, лекин умид қиламанки, ҳаммаси яхши бўлади."
Киев вилояти маъмурияти бутун Киев вилояти, бутунлай элeктр таъминотисиз қолгани ва сув таъминотига ҳам жиддий шикаст етганини маълум қилди. Бундай вазият Украинанинг бошқа қисмларида ҳам кузатилмоқда.