“Уни тирик қолдиришмаслигини билардик”. Харьковда Россия оккупацияси чоғида ўлдирилган ёзувчи Владимир Вакуленко дафн этилди

Харьковда 49 ёшли украин адиби Владимир Вакуленко дафн этилди. У Россия оккупацияси вақтида Изюм яқинида ўлдирилган эди. Оиласи ярим йил деганда номсиз оммавий қабрлар орасидан унинг жасадини топиб, тупроққа қўйди.

Владимир Вакуленконинг онаси оёқда базўр турган бўлса-да, ўғлининг портретини қўлидан қўймайди.

“Тангри кечиримли бўлишга ўргатади, аммо мен қотилларни асло кечирмайман. Бундан сўнг қотиллар аниқланиши ва жазога тортилишига умид қилиб яшайман. Энг муҳими, ўша кунларга етсам бас. Мен шу умид ва орзу билан яшайман”, дейди Елена.

Владимир Вакуленко Харьков вилоятининг Изюм шаҳри яқинидаги Капитоловка қишлоғида туғилган ва истиқомат қилган. Россия кенг кўламли уруш бошлаганида у кетмасликка, қишлоқда қолишга қарор қилади.

“Володяни бу ердан кетишга жуда кўп қистадик: ижтимоий тармоқлардан ёздик, қўнғироқ қилиб ҳам айтдик. Чунки босқинчилар уни тирик қўймаслигини тушунардик. Лекин у “Йўқ, мен бу ерда керакман, бу ер менинг юртим, кетмайман”, деб туриб олди”, дейди марҳум ёзувчининг қўшниси.

Владимир қандай ўлганини ҳали тергов аниқлаши керак. Унинг жасади Изюм яқинидаги оммавий қабрлар орасидаги 319-сонли қабрдан топилди. Яқинлари Владимир бир умр Украинага содиқ бўлганини айтишар экан, душманлар уни қидириб келишини кўнгли сезарди, дейишади. Ўғирлаб кетишларидан бир кун олдин ёзувчи эсдаликларини уй ёнидаги боғчага кўмиб қўйган экан. Ёзувчи ва волонтёр Виктория Амелина уларни ковлаб олди. Эсдаликлар мазмуни эълон қилинганича йўқ, аммо дўстлари уларни чоп этиб, музейга қўйишни режалашмоқда.

Путин: Украинадаги ҳарбий амалиёт узоқ давом этадиган жараёнга айланиши мумкин

Россия президенти Владимир Путин ўзи “махсус ҳарбий амалиёт” деб атаётган Украинадаги уруш узоқ давом этадиган жараёнга айланиши мумкинлигини айтди. Шунингдек, у Россия томонидан Украинанинг қатор ҳудудлари аннексия қилинганини “сезиларли ютуқ” сифатида эътироф этди.

Путин бу ҳақда 7 декабрда президент қошидаги Инсон ҳуқуқлари кенгаши аъзолари билан ўтган учрашувда гапирди. Кенгаш аъзоларининг асосий қисми Кремль сиёсатини тўлиқ қўллайдиган шахслардир.

“Азов денгизи ҳам Россия Федерациясининг ички денгизига айланди”,- деган Путин рус императори Пётр I ҳам Азов денгизига чиқиш учун курашганини таъкидлади.

Путин “ҳарбий амалиёт” бошланишини эълон қилар экан Украина ҳудудини аннексия қилиш мақсади борлигини айтмаган эди. Украинанинг 4 вилояти аннексия қилинишини жаҳон ҳамжамияти қоралади. Украина бу ҳудудларни озод этишда давом этмоқда.

Путин учрашувда “махсус амалиёт” деган сўздан ташқари “уруш” деган сўзни ҳам ишлатди. Унга кўра, “урушни Украина ҳукумати 2014 йилда бошлаган”.

Россия президенти ядровий уруш таҳдиди ошиб бораётганини таъкидлар экан, Москва ядровий қурол қўлламаслигига кафолат бермади. “Биринчиси қўлламаса, демак, иккинчиси ҳам қўлламайди”, деди Путин “биринчиси” деганда Ғарбни назарда тутган ҳолда. Унга кўра, Россия ҳукумати “ҳали ақлдан озгани йўқ ва ядровий қурол билан устара каби муомала қилмоқчи эмас”.

Айни пайтда Путин Россия миллий манфаатларни дастлаб тинч йўл билан ҳимоя қилишга ҳаракат қилишини, агар бу натижа бермаса “барча имкониятларни ишга солишини” айтди.

Зеленский Украинадаги уруш 2023 йилда тугаши мумкинлигини айтди

Украина президенти Владимир Зеленский уруш 2023 йилда тугаши мумкинлигига умид билдирди.

“Мен украиналиклар янги йилда, аммо тинч замонда, энг таъсирли одамларга айланишига ишонаман”, деди Зеленский Politico нашрига берган интервьюсида. Мазкур нашр украин президентини Европада йилнинг энг таъсир кўрсатган шахси сифатида эълон қилган эди.

Зеленский интервьюсида Украинага ва украиналикларга “бу оғир паллада кўмак кўрсатаётган барча дўстларга” миннатдорчилик билдирди.

Аввалроқ АҚШда чиқадиган Time журнали 2022 йилда Владимир Зеленский ва Украина руҳини “йил одами” деб эълон қилганди. Журнал президент Зеленский ва украиналикларга бағишланган репортажни ҳам чоп қилган.

Ўзбекистон Путиннинг "газ иттифоқи"га қўшилмайди

Ўзбекистон Россия билан газ бўйича тижорий шартномалар имзолашга тайёр, бироқ Москва таклиф қилган Россия ва Қозоғистон иштирокидаги уч томонлама газ иттифоқига қўшилиш ниятида эмас.

Бу ҳақда Reuters агентлиги Ўзбекистон Энергетика вазири Жўрабек Мирзамахмудов сўзларига таяниб хабар берди.

Вазир 7 декабрь куни журналистлар билан мулоқот чоғида Тошкент “ҳеч қачон газ эвазига сиёсий шартларга рози бўлмайди”, деб айтган.

Москва ва Тошкент Россия газини қўшни Қозоғистон орқали етказиб бериш бўйича музокаралар олиб бормоқда, бироқ “бу техник шартнома бўлади” ва “иттифоқ дегани эмас”, дея таъкидлаган Мирзамахмудов.

Айни пайтда Россия президентининг матбуот котиби Дмитрий Песков уч томонлама газ иттифоқи ғояси фақат иштирокчиларнинг тижорат манфаатларини кўзлаб ишлаб чиқилаётгани ва бу борадаги ишлар давом этаётгани ҳақида баёнот берди.

"Ҳеч ким сиёсий шартлар эвазига газ ҳақида гапирмаяпти, бу иттифоқни яратиш ғояси контекстида ҳам муҳокама қилинмаган. Биз, албатта, тижорат ҳақида гапираяпмиз. Бу давлатлар манфаатларига қаратилган ҳаракатлар”, - деди Песков.

Қишнинг совуқ кунларида Ўзбекистон ёқилғи тақчиллигини бошдан кечирмоқда ва ҳатто Хитойга кунига олти миллион кубометр газ экспортини тўхтатишга мажбур бўлган.

Аввалроқ Ўзбекистон билан газ иттифоқини яратиш ташаббуси Россия ва Қозоғистон президентлари – Владимир Путин ва Қосим-Жўмарт Тўқаев томонидан муҳокама қилинган эди. Бироқ экспертлар фикрича, иккиламчи санкциялар таҳдиди туфайли на Остона, на Тошкент бундай иттифоқдан манфаатдор эмас.