Кунлар яна совийди: ҳафта ўртаси қор ёғади
Ўтган ҳафта кунлар нисбатан исиб, одамлар энергетик бўҳронни бироз унитгандай бўлганди.
Бироқ бу ҳафта яна ҳаво ҳарорати пасайиб, ёғингарчилик кузатилиши мумкин.
«Ўзгидромет» хабарига кўра, 20 декабрдан бошлаб мамлакатнинг шимолий ҳудудларида совуқ антициклон кириб келиб, қор ёғиши мумкин.
21 декабрдан эса мамлакатнинг бошқа ҳудудларида ҳам ҳаво совиши кузатилади ва ёмғир ҳамда қор ёғиши мумкин. Кечаси ва эрталаб туман тушиб, йўлларда яхмалак кузатилади.
ZIMISTON-UZ XABARLARI. 4-qism: “Ҳукуматнинг жазо кампанияси хўжакўрсинга қилинмоқда”
Булоқбошида газ идораси бошлиғи ҳибсга олинди
Мирзиёев 15 декабрдаги йиғилишда электр ва табиий газ тармоқларига ноқонуний уланиш ҳамда ўғрилик ҳолатларига маҳаллий раҳбарларни шерикликда айблаган эди.
Мирзиёевнинг ушбу танқидидан бир неча соат ўтиб, Андижонда Булоқбоши туман газ таъминоти бўлими бошлиғи Ш.Ш. қўлга олингани маълум қилинди.
Kun.uz нашрига кўра, Ш.Ш. тумандаги тўйхоналар, ошхоналар, кафеларнинг газ қувурларига ноқонуний уланиб олишига рухсат берганликда гумон қилинмоқда.
Бу каби қама-қамалар сони кўпайиши кутилмоқда. Сабаби мамлакат бўйлаб электр ва газ бўйича оммавий рейдлар ўтказилмоқда. 12 декабрдан бери рейдлар натижасида минглаб қонунбузилишлар аниқлангани хабар қилинди.
Шу пайтгача ҳукуматнинг жазолаш камапанияси натижасида «Ҳудудгаз Тошкент» филиали директори Музаффар Алиев ва яна уч мулозим ҳибсга олинди. Ундан аввал свет учун масъул бўлган тўрт амалдорга ҳайфсан берилган эди. Сурхондарёда ҳам бир гуруҳ мулозимларга қарши жиноят иши очилган.
Лондондаги Central Asia Due Diligence таҳлил маркази директори Алишер Илҳомов ҳукуматнинг жазолаш кампаниясини “оммани юпатиш ва ҳукумат чора кўраётганини намойиш этиш учун қилинган”, деб ҳисоблайди.
Бойсунда йўл тўсилди
Тармоқларда тарқалган видеода Сурхондарёнинг Бойсун тумани «Газа» маҳалласида газ ва электр етишмовчилигига қарши норозилик намойиши бўлгани айтилди.
Зимистон.уз блогига ушбу видеони пайшанба куни жўнатган манбага кўра, воқеа 11 декабрда кечқурун содир бўлган.
Воқеадан хабардор бойсунликка кўра, видеони тасвирга олиб, тармоқларга тарқатган шахсларга нисбатан ҳозирда босим бўлмоқда. Ушбу видеони эълон қилган бир қанча Телеграм каналларидан видеони ўчириб ташлашга мажбурлаш ҳолатлари бўлгани ҳам иддао қилинди.
Айни пайтда Бойсун туман ҳокимлигининг Озодликка тақдим қилган маълумотномасида, “Газа” маҳалласидаги ушбу воқеага электр ва газ муаммоси сабаб бўлмагани қайд қилинган.
Ҳокимлик иддаосича, шу куни видео тасвирга олинган жойда жойлашган иккита газ қуйиш шохобчаси олдида навбат кўпайгани оқибатида катта йўлда машиналар тирбандлиги юзага келган.