Фарғонада газ узилганига норозилик билдирган Albus заводи ишчилари қамалди
Фарғона вилояти Ўзбекистон тумани “Шўрсув” маҳалла фуқаролар йиғини ҳудудида жойлашган Albus гипс ишлаб чиқарувчи заводи ишчилари газ узилганига норозилик билдиргани учун қамалди.
Фарғона вилоят ички ишлар бошқармасининг билдиришича, ишчилар “ўзбошимчалик билан жамоат тартибига қарши норозиликларни уюштирган”ликда айбланиб, 5-10суткадан маъмурий қамиоқ жазосига ҳукм қилинди.
Вилоят ИИБга кўра, 29 ноябрь куни Albus заводи аҳолига табиий газни кўпроқ етказиб бериш мақсадида олдиндан тузилган шартнома шартларига асосан газдан узиб қўйилган.
6 декабрь куни Фарғонада газ узиб қўйилгани ортидан ўн минглаб одамлар ишсиз ва даромадсиз қолаётгани оид видео ижтимоий тармоқларда тарқатилган эди.
Фарғона ИИБ расмий билдирувида бу ҳолат “6 декабрь куни заводнинг 20 нафар ишчилари юқоридаги ҳолатни нотўғри талқин қилиб, ўзбошимчалик билан жамоат тартибига қарши нозориликларни уюштирган”, деб талқин қилинган.
“Мазкур ҳолат юзасидан Ўзбекистон туман ИИБ томонидан заводнинг жами 7 нафар ишчиларига нисбатан Маъмурий жавобгарлик тўғрисидаги кодекснинг 183-моддаси (майда безорилик) ҳамда 201-моддаси (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) билан ҳужжатлар расмийлаштирилиб, суд органига тақдим қилинган.
Жиноят ишлари бўйича Ўзбекистон туман суди 07.12.2022 йил куни ҳуқуқбузарларнинг 1 нафарига 10 сутка, 6 нафарига 5 суткадан маъмурий қамоқ жазоси тайинлаган”, дейилади расмий билдирувда.
Энергетика тармоғининг айрим раҳбарлари қамоққа олинди
«Ҳудудгаз Тошкент» директори Музаффар Алиев, «Янгийўл тумангаз» раҳбари Умид Тўйчиев ва «Гулистон туман электр тармоқлари корхонаси» собиқ раҳбари Фурқат Шодмонқуловга нисбатан жиноят ишлари очилди ва улар эҳтиёт чораси сифатида қамоққа олинди.
Бу ҳақда 11 декабрь куни президент администрацияси раҳбари Сардор Умурзоқов раҳбарлигида аҳоли ва иқтисодиёт тармоқларини энергия ресурслари билан мутаносиб таъминлаш масалалари бўйича Республика штабининг навбатдаги йиғилишида Бош прокурор Ниғматилла Йўлдошев маълум қилди.
Бош прокурорга кўра, улар қатор қонунбузарликларда ва масъулиятсизликда айбланмоқда. Бош прокурор улар айнан қандай қонунбузарликларда айбанаётгани тўғрисида маълумот бермади.
“Газета уз”нинг ёзишича, Бош прокурор билдирувидан сўнг Сардор Умурзоқов: “Агар бошқа ҳудудлардаги масъуллар ҳам бундан тўғри хулоса чиқармаса ва қонунбузилиш ҳолатларига йўл қўйса, уларга ҳам албатта худди шундай жиноий иш қўзғатилади”, — деб айтган.
Қандай қишлаяпсиз?
Ис газидан 5 кунда жами 10 киши ўлди: Бухорода бир оиланинг 5 аъзоси, Тошкент вилоятида 3 киши, Хоразмда 2 киши вафот этди. Бу расман тасдиқланган.
Қарийб бир ҳафтадан бери бутун Ўзбекистон бўйлаб электр ва газ тақчиллиги кузатилмоқда. Ҳукумат аҳолининг газ ва электр таъминотини яхшилаш мақсадида чоралар кўришни бошлаган, ишлаб чиқариш корхоналари газдан узилиб, аҳолига газ босими кўпайтилаётгани айтилмоқда.
Аммо ҳукумат аҳолининг норозилигини пасайтиришда фақат иқтисодий чоралар билан чекланиб қолаётгани йўқ. Фарғонада маҳаллий корхонанинг газдан узилишига норозилик билдирган ишчилардан 7 нафари жамоат тартибига таҳдид солишда айбланиб, 10 суткага қамалди.
Озодлик энергетик бўҳронга оид вазият акс этган хабарларни ZIMISTON-UZ блогига жамламоқда. Сиз қандай қишлаяпсиз? Шароитингизни видеога олиб, Озодликка Телеграм орқали + 420 724971539 рақамига йўлланг. Вазиятни биргаликда кузатамиз!
