30-mart kuni Birlashgan Arab Amirliklari sudi 2024-yilning noyabr oyida isroillik ravvin Svi Koganni o‘ldirishda ayblangan uch nafar O‘zbekiston vatandoshini o‘lim jazosiga hukm qildi.
O‘zbekiston Tashqi ishlar vazirligi sudlanuvchilarning apellyatsiya qilish imkoni mavjudligini eslatdi.
TIV: Bu hali yakuniy hukm emas
O‘zbekiston Tashqi ishlar vazirligi Amirlik sudi uch o‘zbekistonlikni o‘lim jazosiga hukm qilganini tasdiqladi.
Tashqi ishlar vazirligi matbuot kotibi Ahror Burhonovning mahalliy nashrlarga bildirishicha, o‘limga hukm qilingan uch O‘zbekiston vatandoshida apellyatsiya qilish imkoni mavjud:
"Bu hali yakuniy hukm emas. BAAda o‘lim jazosi hukmi ustidan avtomatik ravishda apellyatsiya qilinadi va Federal Oliy sudning jinoyat ishlari bo‘yicha kollegiyasiga yuboriladi".
WAM axborot agentligi 30-mart kuni Abu Dabi sudi 40 yashar ravvin Svi Koganni o‘ldirishda ayblangan uch o‘zbekistonlikning o‘lim jazosiga hukm qilingani haqida xabar berdi:
“Abu-Dabi Federal apellyatsiya sudi Davlat xavfsizlik palatasi bir ovozdan ayblanuvchilarni Isroil va Moldova fuqaroligi bo‘lgan Svi Koganning o‘g‘irlanishi va o‘ldirilishida aybdor deb topdi. Uch nafar ayblanuvchi o‘lim jazosiga hukm qilindi, ayblanuvchilarga yordam bergan to‘rtinchi sudlanuvchi esa umrbod qamoq jazosiga hukm qilingan”.
To‘rtinchi sudlanuvchi shaxsiga oid ma’lumotlar ma’lum emas. Uning qaysi davlat fuqarosi ekani noma’lum.
Avvalroq Birlashgan Arab Amirliklari Ichki ishlar vazirligi ravvin o‘limida ayblanib, ushlangan uch o‘zbekistonlikning ism-sharifini e’lon qilgan.
Bular, 29 yashar Mahmudjon Abdurahim o‘g‘li Kenjaboyev, 34 yashar Azizbek Komilovich Ismoilov va 29 yashar Olimboy Tohirovich Davlatyorov.
"Sudlanuvchilar qiynoq ostida ayblovlarni tan olishgandir?"
Fransiyadagi Markaziy Osiyo inson huquqlari tashkiloti rahbari Nadejda Atayeva BAAda uch o‘zbekistonlikka qarshi o‘tgan mahkamaning shaffof o‘tmagani sabab ko‘plab savollar javobsiz qolganidan xavotir bildiradi:
"Ravvin o‘limida ayblanganlarga berilgan jazo jinoyatga yarashadek tuyulishi mumkin, biroq sud ushbu shaxslarni qanday asosda aybdor deb topgani jamoatchilikka qorong‘i.
O‘zbekiston tomoni uch sudlanuvchi O‘zbekiston vatandoshlari ekanini tasdiqladi. Biroq bu yerda javobsiz savollar anchagina. Mahkamada O‘zbekiston diplomatik missiyasi vakillari ishtirok etganmi? Sudlanuvchilarga huquqiy ko‘mak ko‘rsatish uchun harakat qilindimi? Sud jarayoni qanday kechdi? Sudlanuvchilarning ko‘rsatmalarini kim tingladi? Bu shaxslar haqiqatan ham ushbu jinoyatda aybdormi yoki yo‘qligini jamoatchilik qanday bilishi mumkin? Balki sudlanuvchilar qiynoqlar ostida ayblovlarni tan olishgandir? Bu shaxslar jinoyatni bo‘yniga olgan taqdirda ham, ularning qonunga xilof harakatlarini isbotlovchi dalillar sudga taqdim etilishi kerak edi. Mana nima uchun bu kabi mahkama jarayonlari shaffof o‘tishi juda muhim".
Motivlar noma’lum qolmoqda
Isroil va Moldova fuqarosi bo‘lgan ravvin Svi Kogan 2020-yildan buyon BAAda istiqomat qilib, yahudiylarning “Xabad Lyubavich” ortodoksal diniy harakatini tamsil etib kelgan. U o‘tgan yilning 21-noyabr kuni yo‘qolib qolgan va oradan uch kun o‘tib Al-Ayn shaharchasida uning jasadi topilgan.
Uch o‘zbekiston vatandoshi ravvin o‘limidan so‘ng Turkiyada ushlanib, Amirlikka topshirilgan.
Ayni paytda jinoyat motivlari ma’lum emas. O‘zbekiston Tashqi ishlar vazirligi va O‘zbekistonning Dubaydagi bosh konsulxonasi shu paytgacha bu borada biror ma’lumotni ochiqlamagan.
Amirlik sudi ayblanuvchilarni “terrorchilik niyatida qasddan odam o‘ldirishda ayblagan”.
Isroil Bosh vaziri Binyamin Netanyaxu qotillikni «antisemit terroristik harakat» deb atagan. Isroil Kogan yahudiy bo‘lgani uchun nishonga olinganini aytib keladi.
Ravvin o‘limida ayblanib, uch o‘zbekistonlikning ushlanishi ortidan BAAda yashayotgan o‘zbek muhojirlariga qarshi reydlar o‘tkazildi.
Jumladan, o‘tgan yilning 25-noyabr kuni Dubayda o‘tkazilgan reydda bir guruh o‘zbekistonliklar ushlanib, deport qilindi. Besh nafar o‘zbekistonlikka qarshi ekstremizm bilan bog‘liq jinoyat ishi qo‘zg‘atildi. Hozircha bu o‘zbekistonliklarning keyingi taqdiri ma’lum emas.
Ravvin o‘limidan so‘ng O‘zbekiston vatandoshi bo‘lgan erkaklarning BAAga kirishi qiyinlashdi. 30-noyabr kuni o‘nlab o‘zbekistonlik Abu Dabiga kiritilmasdan Toshkentga qaytarildi.
