Мисрда исроиллик сайёҳлар минган автобус ўққа тутилди
Ижтимоий тармоқлар ва телеграм-каналларда Мисрнинг Искандария шаҳрида исроиллик сайёҳларни олиб кетаётган автобус ўққа тутилгани ҳақида маълумотлар тарқалмоқда. Дастлабки маълумотларга кўра, уч киши ҳалок бўлган
Исроил ТИВ бу хабарни тасдиқлади. Вазирлик маълумотига кўра, икки нафар исроиллик ва уларни кузатиб бораётган йўлбошловчи мисрлик ҳалок бўлган.
Тасдиқланмаган хабарга кўра, автобусга полициячи ёки аскар ўқ узган.
Исроил ҳарбийлари Ливанга артиллерия зарбалари берилгани ҳақида хабар берди
Исроил мудофаа кучлари (ИДФ) Ливанга артиллерия зарбалари берилгани, у ердан Исроилга қарата ўқ узилгани ҳақида хабар берди, дея хабар беради Рейтерс.
Вайронагарчилик ва қурбонлар ҳақида ҳозирча маълумотлар йўқ.
Рейтерс агентлигининг учта манбасига кўра, Исроил Ливандан отилган снарядлар Исроилнинг Беэр - Шева шаҳридаги ҳарбий позициясига тушганидан кейин жавоб қайтара бошлаган.
Ливаннинг Ҳизбуллоҳ гуруҳи Исроилга миномёт ҳужуми учун жавобгарликни ўз зиммасига олди: “Фаластин қаршилик кучлари билан бирдамликда бир неча жангариларимиз бугун эрталаб Ливаннинг босиб олинган Шева фермалари яқинидаги сионистлар армиясининг учта позициясига ҳужум қилди”, дейилади гуруҳ баёнотида.
Исроилда фавқулодда ҳолат эълон қилинди, мамлакат бош вазири содир бўлаётган воқеаларни уруш деб атади ва захирадагиларни сафарбар этишни эълон қилди.
Фаластин мухторияти президенти Маҳмуд Аббоснинг айтишича, Фаластин халқи “Исроил ҳужумларидан ўзини ҳимоя қилиш” ҳуқуқига эга.
Ғазо аҳолиси Фаластин-Исроил ўртасидаги сўнгги можаролар фонида ҳимоясиз қолди
Ғазодаги новвойхоналар ва озиқ-овқат бозорлари олдида узун навбатлар ҳосил бўлди. Фаластинликлар юзага келган ноаниқ бир шароитида, ун, нон, сут ва консерва каби озиқ-овқат маҳсулотларини ғамлашга ҳаракат қилмоқда.
Сўнгги тўқнашувлар катта талафотларга сабаб бўлди. Ҳар икки томондан камида 800 киши ҳалок бўлгани айтилмоқда.
«Биз портлаш овозларидан уйғондик, ҳамма жойда қўрқув ва ваҳима. Фаластин кўчаларида одамлар саросимада қолган. Буёғига нима бўлишини ҳеч ким билмайди», - дейди Ғазода яшовчи Хайтам Ал-Ҳелоу.
Жанглар тинч аҳоли учун хавф туғдиришига қарамай, Ғазодаги кўпчилик Фаластин кучларини қўллаб-қувватлашини билдирди.
«Мен бу ерга оилам учун озиқ-овқат ва жиҳозлар сотиб олишга келдим. Биз қаршилик ҳаракатини қўллаб-қувватлаймиз ва улар билан бирдаммиз. Ҳаммамиз улар Қуддус шаҳрига муваффақиятли етиб боришларига умид қиламиз», - дейди ғазолик Абу Муҳаммад.
Ҳамас исломий қаршилик ҳаракати ҳарбий қаноти қўмондони Муҳаммад ал-Даиф шанба куни Исроилга қарши «Ал-Ақсо тўфони» деб номланган ҳарбий операция бошланганини эълон қилди.
Ҳамас расмий вакили Ҳазем Қосим, операция Исроилнинг Ғазо ва Ғарбий Соҳилдаги фаластинликларга қарши давомли ҳужумларига жавоб эканлигини билдирди.
Ҳамаснинг қуролли Ал-Қассам бригадаси Исроилнинг Фаластин минорасига уюштирган ҳаво ҳужумига жавобан Тел-Авивга 150 та ракета учиргани ҳақида хабар берди.
Ҳамас бир қанча исроиллик зобит ва аскарларни қўлга олганини, улар «хавфсиз жойда» сақланаётганини қўшимча қилди.
Исроил Энергетика вазири Исроил Катс, Ҳамас ҳужуми ортидан Ғазога электр таъминотини тўхтатилишини айтди.
Фаластин Президенти Маҳмуд Аббос фавқулодда йиғилишда Фаластин халқи Исроил кучлари ва кўчманчилардан ўзини ҳимоя қилиш ҳуқуқига эга эканини айтган.
Нетаняху ҲАМАСдан «қасос» олишга ваъда берди
Исроил бош вазири Бенямин Нетаняху Фаластин жангариларининг Исроилга ҳужумидан сўнг, ҲАМАСдан «қасос олишга» ваъда берди. ҲАМАС гуруҳининг 7 октабр куни Исроилнинг қатор шаҳарларига ракеталар билан қилган ҳужумида 200 дан ортиқ исроиллик ҳалок бўлди, кўп сонли исроилликлар асирга олинган.
«Ҳамас барчамизни ўлдирмоқчи. Улар болалар ва оналарни ўлдираётган душман. Улар байрам қилаётган фуқароларимизни, болаларни қирғин қилди. Бугун содир бўлган воқеа Исроил тарихида бўлмаган ва бу бошқа такрорланмаслигига ишонаман. Бу бутун ҳукуматнинг қарори. Исроил мудофаа кучлари зудлик билан ХАМАСнинг имкониятларини йўқ қилиш учун бор кучини ишга солади. Биз уларни йўқ қиламиз ва улар бошимизга солган қора кун учун қаттиқ қасос оламиз”, деди Исроил бош вазири Бенямин Нетаняху.
Нетаняху видеомурожаатида ҲАМАС исроиллик асирларнинг ҳаёти учун жавобгар бўлишини ва Исроил фуқароларига жабр қилган ҳамма билан ҳисоб-китоб қилишини айтди.
Исроил ҳам ҲАМАСнинг ҳужумига жавобан Ғазога ракеталар ёғдирди. 250 дан ортиқ ғазолик ҳалок бўлган.
ҲАМАС ҳужумга Исроилнинг Ғарбий Соҳил, Қуддус ва Исроил қамоқхоналаридаги фаластинликларга қарши кучайган зулмлари сабаб бўлганини даъво қилмоқда.