Исроилда ўқиётган ўзбекистонлик талабалар Ўзбекистонга қайтарилди
Исроилдаги Холон технология институтида (ХТИ) таҳсил олаётган ўзбекистонлик талабалар 15 октябр куни Тошкентга учиб келди.
Бу ҳақда Ўзбекистоннинг Исроилдаги элчихонаси ўзининг Телеграм канлида хабар берди.
Хабарда ёзилишича, талабаларнинг ўқишини онлайн форматда давом эттириш бўйича институт билан келишувга эришилган. Бу талабалар математика, юқори технологиялар, сунъий интеллект каби соҳаларда таҳсил олишган.
Элчихона, ХТИ, Мирзо Улуғбек номидаги Миллий университетга, Бухоро ва Самарқанд давлат университетлари, шунингдек, “Ўзбекистон ҳаво йўллари” АКга талабаларни Ўзбекистонга жўнатишда ёрдам берганлиги учун миннатдорчилик билдирган..
Эрон Исроил-ҲАМАС урушига аралашишга тайёрлигини билдирди
Эрон ҳукумати, агар Ғазо бўлгасини ўққа тутиш тўхтатилмаса, Исроил ва ҲАМАС ўртасидаги урушга аралашишга тайёрлигини билдирди.
The Jerusalem Post хабарига кўра, Теҳрон Исроилни БМТ орқали хусусий тарзда огоҳлантирган. Исроил қўмондонлиги Эроннинг аралашуви Ливан жануби ва Суриядаги “Ҳизбуллоҳ” радикал гуруҳи томонидан “иккинчи фронт” очиш бўлади, дея тахмин қилмоқда.
Шанба куни Эрон ташқи ишлар вазири Ҳусайн Амирабдуллоҳиён Байрутда БМТнинг Яқин Шарқда тинчлик масалалари бўйича координатори Тор Веннесланд билан учрашди.
Шундан сўнг у ҲАМАС етакчиларидан бири Исмоил Хония билан кўришган. Вазир ҲАМАС ҳужумларини “Фаластин ерларини озод этиш йўлидаги тарихий ғалаба” деб атаб, гуруҳ билан ҳамкорлик давом эттирилишига ваъда берган.
“Исроил ҳарбий жиноятлар ва геноцидни дарҳол тўхтатмаса, вазият назоратдан чиқиши ва оғир асоратларга олиб келиши мумкинки, бунинг жавобгарлиги БМТ ва унинг Хавфсизлик кенгаши зиммасига тушади”, деб ёзди Х ижтимоий тармоғида Эроннинг БМТдаги вакили.
Исроилнинг БМТдаги вакили Гилад Эрдан, Амирабдуллоҳиён билан учрашгани ва Эроннинг радикал исломчиларга дастак бераётганини қораламагани учун Виннесландни қаттиқ танқид қилди.
“У билан қўл сиқишган экансиз, қўлингизда қолган исроиллик гўдаклар қони доғларини ювиб ташлашни унутманг”, деб ёзди у.
Бу орада Исроил Ғазо бўлгасида ҲАМАС жангариларини қириб ташлаш учун кенг кўламли ерусти амалиёти ўтказишга ҳозирланмоқда.
Бўлга тинч аҳолисига жанубга, Миср чегараси яқинига кўчиб кетиш тавсия қилинган. Ўн минглаб одамлар аллақачон уйларини тарк этишган.
Миср томондан Ғазо бўлгаси билан чегарада гуманитар ёрдам ортилган юк машиналари карвони турибди, бироқ Миср ўзининг ягона назорат-ўтказиш масканини очгани йўқ.
АҚШ Исроил соҳилларига иккинчи авиаташувчи гуруҳни жўнатди.
Блинкен: Саудия валиаҳд шаҳзодаси билан учрашув «жуда самарали» ўтди
АҚШ давлат котиби Энтони Блинкен Саудия Арабистони валиаҳд шаҳзодаси Муҳаммад бин Салмон билан Ар-Риёдда «жуда самарали» учрашув ўтказганини билдирди.
Исроил ҲАМАС назоратидаги Ғазо секторига қуруқликдан ҳужум қилшга тайёрланар экан, Вашингтон можарони бостиришга ҳаракат қилмоқда.
АҚШ расмийнинг Рейтерсга айтишича, бир соатга яқин давом этган учрашув валиаҳд шаҳзоданинг шахсий қароргоҳида бўлиб ўтган.
«Давлат котиби Қўшма Штатларнинг ҲАМАС террорчилик ҳужумларини тўхтатиш, барча гаровга олинганларни озод қилиш ва можаро ёйилишини олдини олишга қатъий эътибор қаратишини таъкидлади», АҚШ давлат департаменти матбуот котиби Мэттю Миллер
АҚШ давлат котиби Саудия валиаҳд шаҳзодаси билан Исроил Ғазога қуруқликдан ҳужумга ўтишга тайёрланаётган кескинлик фонида учрашди.
Ғазо касалхоналари ярадорлар билан тўлиб тошди
Исроил ва Ҳамас ўртасидаги тўқнашувда яраланган фаластинликларнинг Ғазодаги шифохоналарга оқими давом этмоқда.
Ярадорлар сони ортиб бораётгани сабабли, Жаҳон соғлиқни сақлаш ташкилоти Ғазо секторига зудлик билан инсонпарварлик ёрдамини етказишга чақириб, Ғазо соғлиқни сақлаш тизими издан чиқиш ёқасида эканидан огоҳлантирди.
Тинимсиз бомбардимонлар Дайр ал-Балаҳдаги ал-Ақсо шаҳидлари касалхонаси сингари шифохоналарни оғир аҳволга солиб, тинч аҳоли ва тиббиёт ходимларининг ҳаётига хавф солмоқда.
Ғазодаги касалхонада аянчли манзара. Баъзилар замбилда ётган ҳолда олиб келинган. Яна бошқалар эса қўлларида қонга беланган гўдакларини кўтариб турибди. Йўлакларда ярадор болалар йиғлайди.
"Касалхонага олиб келинган ярадорлар қирғин қилинди. Ўнлаб оилалар қирғин қилинди. Олиб келинган ярадорлар касалхона сиғимидан ортиб кетди. Бу бизнинг имкониятларимиздан ташқари. Беморларни коридор ва қаватларда даволашни бошладик. Бу жуда хавфли", дейди шифокор Халил Алдагран.
Ғазо шимолидаги Камол Эдван шифохонаси шифокорларига эвакуация қилиш буюрилган, бироқ янги туғилган чақалоқларнинг ҳаётини сақлаб қолишга ҳаракат қилаётган шифокорлар бундан бош тортмоқда.
Шифокор Ҳуссам Абу Сафиянинг айтишича, болаларни эвакуация қилиш "уларга ўлим жазосини бериш" дегани, кўп бола турли касалликларни даволовчи вентилятор ва инкубаторларга уланган:
“Ушбу палатада олтита каравот бор ва кўриб турганингиздек, барча тўшаклар тўла. Изоляция хонасидан ташқари, бандлик даражаси 100 фоиз атрофида. Кўриб турганингиздек, барча ҳолатлар фарқ қилади. Исроил буни хоҳлайдими? Бу болалар қаерга олиб кетилади? Бу уларнинг айби эмас. Болалар шифохонасида муҳим палаталар, жумладан, Ғазо шимолидаги ягона реанимация бўлими мавжуд. Кўриб турганингиздек, бу палатада сунъий нафас аппаратига уланган болалар бор, энди биздан касалхонани эвакуация қилишни сўрашди, бу болаларни қаерга эвакуация қилишимиз керак. Бу болалар аппаратга уланган ва уларни кўчириш мумкин эмас. Бу болаларни кўчириш улар учун катта хавф туғдиради”.
Фаластин Соғлиқни сақлаш вазирлиги кечаги ҳисоботида бир кун ичида Исроил ҳаво ҳужумларида камида 400 киши ҳалок бўлгани ва 1500 дан ортиқ одам жароҳатланганини маълум қилди.
Расмий статистик маълумотларга кўра, можарода 28 нафар фаластинлик тиббиёт ходими қурбон бўлган.
Вазирлик маълумотларига кўра, Ғазода ҳозирга қадар 2215 киши ҳалок бўлган, 8714 киши жароҳатланган.