Ғазодан қочган одамлар Миср чегарасига тўпланмоқда
БМТ байроғи остидаги юк машиналари Ғазо-Миср-Исроил чегарасига йўл олган.
Дастлаб юк машиналари Ғазо-Миср чегарасидаги Рафа ўтказиш пунктига кетаётгандек кўринди, бироқ кейинчалик машиналар Керем Шалом Миср-Исроил чегара пункти томон йўл олди.
Мисрнинг Синай ярим оролида бир неча давлатлардан Ғазога юборилган юзлаб тонна инсонпарварлик ёрдами сақланмоқда.
Рафа чегара пости Мисрнинг Синай ярим ороли ва ҲАМАС назоратидаги Ғазо секторига ўтадиган ягона ўтказиш пункти ҳисобланади.
Ғазони тарк этиш истагидаги фаластинликлар ҳам Миср билан чегарадаги Рафа пунктига йиғилмоқда. Анклавга ёрдам киритиш бўйича дипломатик ҳаракатлар олиб бормоқда.
Мисрдаги хавфсизлик манбалари, чет эл паспортига эга одамлар Ғазодан чиқиб кетиши ва анклавга гуманитар ёрдам киритилиши учун оташкесимга эришилганини билдирди. Аммо Исроил Бош вазири Бенямин Нетаняху идораси буни рад этди.
Исроил одамларни Ғазодан чиқиб кетишга, ҲАМАС эса чиқмасликка чақирди
Исроил ғазоликларни жанубга кўчишга чақирди. 2 миллиондан ортиқ киши қамал остида қолган анклавнинг юз минглаб аҳолиси аллақачон кўчган.
"Ғазо шаҳри аҳолиси, сизларга яна мурожаат қиламан, ҲАМАС ўз жонингизни қутқаришингизга қаршилик қилмоқда, биз жанубга кетишингизга рухсат берамиз. Ўз хавфсизлигингиз учун Ғазо шаҳри ва унинг атрофидаги барча ҳудудларни тарк этинг. Жанубга Наҳал Ааза томон ҳаракатланинг. Бу ҳудудда омон қолишингиз учун шароит бор" , деди Исроил ҳарбийси Даниел Ҳагари.
Ғазо секторини бошқараётган ҲАМАС эса одамларни уйларини ташлаб кетмасликка чақирмоқда.
ҲАМАС жангарилари 7 октябр куни Исроил шаҳарларига ҳужум қилиб, 1000 дан ортиқ одамнинг умрига зомин бўлди ва ўнлаб исроилликни гаровга олди. Қонли ҳужумдан кейин Исроил жангари гуруҳни йўқ қилишга ваъда берди.
Ғазонинг тор ва гавжум кўчаларида вазият ёмонлашяпти, Исроил ҳаво ҳужумлари қурбонлари сони ортиб боряпти. Жасадлар музлатгичли юк машиналарда сақланмоқда, чунки уларни касалхоналарга олиб бориш жуда хавфли, қабристонлар эса тўлиб кетган.
Расман: Ғазода 199 нафар исроиллик гаровда ушлаб турилибди
Исроил армияси матбуот котиби адмирал Даниел Ҳагари журналистлар билан бўлиб ўтган брифинг чоғида Ғазода ўт очишни тўхтатишга эришилмагани, Исроил қамалдаги Ғазо анклавига ҳужумларини давом эттираётганини айтди.
Ҳагарининг қўшимча қилишича, Ғазода камида 199 нафар гаровга олинган исроиллик бор. Ҳозиргача Ғазода 291 нафар исроил аскари ҳалок бўлган. Ҳалок бўлганлар жами исроиллик сони 1500га яқинлашган.
Ҳагари Эронни Ҳизбуллоҳга ҳужум қилишга буйруқ берганликда айблади.
«Ҳизбуллоҳ Эрон кўрсатмаси ва кўмаги билан Ғазодаги уруш ҳаракатларидан чалғитиш учун Исроил чегарасига бир қатор ҳужумларини амалга оширди», Исроил армияси матбуот котиби Даниел Ҳагари.
Ғазода ҳалок бўлганлар сони 2750га етди
ҲАМАС назоратидаги Ғазо сектори тун бўйи бомбаланди, аҳоли бу тўққиз кунлик тўқнашувдаги энг даҳшатлиси бўлганини айтмоқда. 16 октябрь, душанба куни Ғазо секторининг жанубий қисми ҳам бомбаланди.
Хон Юнис шаҳарида яшовчи 45 яшар Суҳайл Бакирга кўра, тунги ҳужумда унинг қўшниси болалари билан бирга қурбон бўлган:
“Мен ҳар куни у одамнинг ёнидан ўтиб, у билан сўрашардим, у болалари билан яшарди, тунда уларнинг устига ракета тушди. Биз даҳшатдан уйғониб кетдик, ташқари чиққанимизда уларнинг ҳаммаси бўлак-бўлак бўлиб кетганди. Қутқарувчилар бульдозер билан жасадларни вайроналар остидан зўрға олиб чиқишди".
Душанба куни Исроил Ғазо жанубида ўт очишни тўхтатиш келишувига риоя қилинмаганини айтди. Аммо Мисрдаги хавфсизлик манбалари айтишича, хорижликларнинг Ғазони тарк этиши ва у ерга ёрдам етказилиши учун келишув имзоланган эди.
Исроил 7 октябрь куни Ҳамаснинг мисли кўрилмаган ҳужумига жавобан Ғазони бомбалай бошлаганидан бери минглаб ғазоликлар, жумладан, шифокорлар ва қутқарувчилар ҳалок бўлди.
Ғазо Соғлиқни сақлаш вазирлиги маълумотига кўра, 7 октябрдан бери Исроилнинг Ғазо секторига уюштирган ҳужумларида 2750 фаластинлик ҳалок бўлган, 9700 нафари яраланган.