Исроил Ғазода кутилаётган амалиётнинг бекор қилиниши шартларини очиқлади
Исроил армиясининг Ғазо секторида кутилаётган қуруқликдаги амалиёти фақат ҲАМАС жангарилари гаровдаги барча кишиларни озод қилиб, қуролларини ташлаганидагина бекор қилиниши мумкин. Бу ҳақда Исроил армияси расмийси Жонатан Конрикус Австралиянинг ABC корпорациясига берган интервьюсида билдирди.
“Агар ҲАМАС фуқаролар орқасига беркиниб ўтирган ерларидан чиқиб, гаровда бўлган фуқароларимизни қайтариб, ҳеч қандай шарт қўймасдан таслим бўлса, ўшанда уруш тугайди”, деган Конрикус.
Унга кўра, бу урушдан мақсад бошқа ҳеч қачон исроилликларга таҳдид қила олмаслиги ва 7 октябрдаги каби босқинни такрорламаслиги учун ҲАМАСни йўқ қилишдир.
Исроил мудофаа вазири Йоав Галлант ҲАМАСга қарши ҳарбий кампания “бир, икки, уч ой”га чўзилиб, радикал гуруҳни тўлалигича йўқ қилиш билан якунланишини билдирган.
“Бу бизнинг Ғазодаги сўнгги маневр амалиётимиз бўлиши керак, сабаби ундан кейин ҳеч қанақа ҲАМАС бўлмайди”, дея қўшимча қилган у. Галлант Исроил ҳарбий-ҳаво кучларига ташаккур изҳор этиб, кейинги босқич, яъни қуруқликдаги амалиёт “яқинда бошланиши”ни қайд этган.
Амалиётнинг қачон бошланиши ҳали аниқ эмас. Аввалроқ қуруқликдаги амалиёт ҲАМАС томонидан тутиб турилган гаровдагиларни озод қилиш ҳақида музокара олиб боришга вақт бериш учун АҚШ илтимосига кўра кечиктирилгани маълум қилинган эди.
The New York Times нашрининг ўз манбаси сўзларига таянган ҳолда ёзишича, ҲАМАС томонидан икки нафар америкаликнинг озод қилиниши АҚШни Ғазо секторидаги қуруқликдаги амалиёт бошланишини ортга суришни қаттиқроқ талаб қилишга мажбур қилган. Нашрнинг музокаралар жараёнидан хабардор манбаси ҲАМАС амалиёт бошланиши гаровдагиларнинг озод қилиниши эҳтимолини камайтириши ҳақида огоҳлантирганини айтган.
ЦАХАЛ Ғазо секторида 212 киши гаровда ушлаб турилганини айтмоқда
Қатор мамлакатларда террорчи ташкилот деб топилган ҲАМАС гуруҳи жангарилари Ғазо секторида 7 октябрь кунги ҳужум чоғида қўлга олинган камида 212 кишини гаровда ушлаб туришибди. Бу ҳақда Исроил армияси расмий вакили Даниэль Хагари маълум қилди. Бу рўйхатга аввалроқ озод қилган асли исроиллик икки америкалик аёл Жудит Раана ва унинг қизи Натали кирмайди.
Хагарига кўра, 212 киши деган хулоса якуний эмас. Ҳарбийлар бедарак йўқолганлар ҳақида янги маълумотларни олишда давом этишмоқда.
Аввалроқ ЦАХАЛ Ғазода 210 нафар асир ушлаб турилганини маълум қилган эди.
Гаровдагилар сони доимий равишда ортиб бормоқда. Бундан ташқари, Ғазо секторида ҳаракатланаётган бошқа қуролли гуруҳлар ҳам одамларни гаровда тутиб турган бўлиши мумкин. 14 октябрь куни ЦАХАЛ матбуот хизмати ҲАМАС жангарилари 120 дан зиёд тинч аҳоли вакилини гаровда ушлаб тургани ҳақида маълумот тарқатган эди. Орадан икки кун ўтгач, вазирлик гаровдагилар сони камида 199 нафар эканини қайд этган. 19 октябрь куни улар сони 203 нафаргача ошган. ЦАХАЛ маълумотига кўра, улардан қарийб 30 нафарини болалар, 10-20 нафарини эса қариялар ташкил этади.
Гаровда тутиб турилганлар орасида икки фуқароликка эга кишилар, шу жумладан россияликлар ҳам бор.
Ўтган ҳафта Ўзбекистоннинг Исроилдаги элчихонаси Исроил Ташқи ишлар вазирлиги ва полицияси маълумотига таянган ҳолда, ҲАМАС ҳужумлари оқибатида “Ўзбекистонда туғилган ва 90-йилларда репатриация дастурига мувофиқ Исроилга кўчиб келган беш нафар киши ҳалок бўлган”и ҳақида маълум қилган эди. Элчихона ўз мурожаатида ҳалок бўлган бу одамлар “амалдаги Ўзбекистон фукаролик паспортларига эга эмас”лигини урғулаган.
Исроил расмийлари чегарадаги мисрликлар позицияси танкдан "тасодифан нишонга олинган"ини билдирди
Ғазо сектори аҳолиси учун гуманитар ёрдам юки юкланган машиналарнинг иккинчи карвони 22 октябрь куни Рафаҳ чегара пунктининг Миср томонига ўтган. Бу ҳақда маҳаллий хавфсизлик хизматлари ва гуманитар тузилмалардаги манбалар маълум қилишган.
Колонна чегара пунктида пайдо бўлганидан кўп ўтмай, гувоҳларга кўра, у ерга яқин жойда портлаш содир бўлган. Миср томонидан “тез ёрдам” машиналари етиб келгани ҳақида эшитилиб турарди, дея қайд этган Reuters агентлиги. Қатор маълумотларга кўра, ҳодиса чоғида етти киши яраланиб, касалхонага етказилган.
Исроил ҳарбийлари танклардан бири тасодифан ўқ отиб юборгани ва снаряд чегара яқинидаги мисрликлар объектига бориб текканини маълум қилишган. Исроил содир бўлган воқеа юзасидан таассуф билдирган ва ҳодиса юзасидан текширув ўтказилишини қўшимча қилган.
Рафаҳ чегара пункти Миср чегарасидаги Ғазо секторига асосий кириш-чиқиш пункти бўлиб, у ер ҳозирда Исроилнинг тўлиқ қамали шароитида Фаластин ҳудуди аҳолисига юк етказиш бўйича уринишлар марказига айланган.
Исроил бу қамални ҲАМАС радикал гуруҳи жангарилари мамлакатга 7 октябрь куни кенг кўламли ҳужум бошлаганидан кейин эълон қилган. Исроил раҳбарияти секторда 2007 йилдан буён ҳокимиятни ўз қўлида тутиб келаётган ҲАМАСни бутунлай йўқ қилиш ниятини билдирган. Гуманитар ташкилотлар ва дунё лидерлари Исроилни фуқаровий объектлар зарба беришдан сақланишга чақириб келишмоқда.
АҚШ бўйлаб Ғазодаги фаластинликларни қўллаб-қувватлаб намойишлар бўлмоқда
21-октябр, шанба куни юзлаб намойишчи икки ҳафта олдин Ҳамаснинг Исроилга ҳужуми ортидан Ғазога зудлик билан ўт очишни тўхтатишни талаб қилиб, АҚШнинг турли шаҳарлари кўчаларига чиқди.
“Бугун биз бошдан кечираётган нарса, Фаластинда содир бўлаётган воқеалар Фаластин халқига қарши геноциддир. Бу инсон ҳуқуқлари масаласи. Бу диний масала эмас. Шундай қилиб, агар сиз адолат ёки ҳаётнинг бошқа томонида бўлсангиз, сиздан чиқишингизни сўраймиз ва агар сиз кўчаларда юраётган минглаб одамни кўрсангиз, уларнинг тўлаётган солиқлари том маънода геноцидни қўллаб-қувватламайди”, дейди намойишчилардан бири Аида Маскис.
Намойишчилар Тампа, Жексонвилл, Лос-Анжелес ва Бруклин шаҳарларида “Озод Фаластин” деб ҳайқирган, баннерлар ва Фаластин байроқларини ҳилпиратган.
“Мен ўзим фаластинлик бўлмасам-да, бу ерда кўп одамлар фаластинлик бўлмаслиги мумкин деб ўйлайман, лекин биз фаластинликларнинг азоб-уқубатлари учун шу ердамиз. Улар ишғол остида, апартеид режими остида. Уларнинг азобларини эса бутун дунё билади. Афсуски, икки томонлама стандартлар мавжуд”, дейди намойишчи Тарек Авруб.
Ҳамас жангарилари Ғазо секторида камида 212 кишини гаровда ушлаб турибди, деди Исроил мудофаа кучлари матбуот котиби Даниел Ҳагари. Бу рўйхатга аввал озод этилган Жудит Раанан ва унинг қизи Натали кирмайди.
Ҳагарининг фикрича, бу рақам якуний эмас. Ҳарбийлар бедарак йўқолганлар ҳақида янги маълумотларни олишда давом этмоқда.