Миср чегарани очганидан сўнг Ғазодан камида 300 хорижлик чиқиб кетди
Миср 1 ноябрда Ғазо билан чегарасини очганидан сўнг камида 300 нафар чет эллик бўлгани тарк этди. Бу ҳақда Reuters Миср хавфсизлик хизматидаги манбалари ва Фаластин мансабдорига таянган ҳолда хабар берди.
AFP ва CBS News ҳам Ғазо бўлгасини бир неча юз киши тарк этгани ҳақида хабар қилган эди.
Аввалроқ Ғазони назорат қилаётган ҲАМАС бўлгадан чиқиб кетишга рухсат берилган 500 чет эллик ва иккинчи фуқароликка эга бўлган фаластинликлар рўйхатини эълон қилган эди. Бироқ бу рўйхатда АҚШ ва Россия фуқаролигига эга бўлган шахслар йўқ.
Ғазодан чет элликларни эвакуация қилиш ишлари яқин кунларда яна қайта жонлантирилиши кутилмоқда.
Исроилнинг билдиришича, ҲАМАС ҳужумлари оқибатида 1400 киши ҳалок бўлган. 250 киши ўғирланиб, Ғазо ҳудудига олиб кетилган.
Ғазо расмийлари эса Исроил зарбалари оқибатида 8,5 минг киши ўлганини, уларнинг учдан икки қисми аёллар ва болалар эканини айтмоқда.
Бу маълумотларни мутсақил манбалардан тасдиқлатиш имконияти мавжуд эмас.
Исроил Ғазодаги Жабалия қочқинлар лагерига ҳужум қилганини тасдиқлади
Исроил 31 октябрда Ғазодаги Жабалия қочқинлар лагерига ҳужум қилганини тасдиқлади. Исроил армияси расмийларининг билдиришича, қочқинлар лагерига зарба беришдан мақсад ҲАМАСнинг юқори лавозимли қўмондонларидан бирини жисмонан йўқ қилиш бўлган.
Ғазо Соғлиқни сақлаш вазирлиги Исроил ҳужуми оқибатида камида 50 киши ҳалок бўлганини ва 150 киши яраланганини билдирди. Хабарларда, лагерни Исроил ҳарбий самолётлари бомбардимон қилгани айтилади.
Воқеа жойига борган AFP мухбири Жабалиядаги вайроналар остида камида 47 кишининг жасади чиқариб олингани ҳақида хабар берди.
Исроил армияси вакили Даниэль Хагари Жабалия лагерига бомба ташланганини тасдиқлар экан, ҲАМАСнинг «Жабалия» қўшини қўмондони Иброҳим Биарий ўлдирилганини ҳамда ташкилотнинг ер ости инфраструктураси вайрон қилинганини билдирди.
Жабалия лагери Ғазонинг шимолий қисмида жойлашган. Лагерь майдони бир ярим квадрат километрни ташкил қилади. БМТнинг маълум қилишича, 2023 йилнинг июлида лагерда 116 минг фаластинлик қочқин бор эди.
Тошкентда Фаластинни қўллаб митинг ўтказмоқчи бўлганлардан камида уч нафари 15 суткага қамалди
Тошкентда 29 октябрда Фаластинни қўллаш мақсадида Амир Темур хиёбонига йиғилганлардан камида уч нафари 15 суткага қамалди. «Газета.uz» “жиноят ишлари бўйича Шайхонтоҳур туман суди қарорлари ўрганиб чиқилганидан сўнг” бу ҳолат маълум бўлгани тўғрисида билдирди.
30 октябрда қабул қилинган суд қарорларида қайд этилишича, Тошкент вилояти Охангарон туманида яшовчи 2001 йилда туғилган Ф. О., ва Б. И., Қашқадарё вилояти Косон туманида яшовчи 1997 йилда туғилган М. Х., Маъмурий жавобгарлик кодексининг 194-моддаси (ички ишлар органи ходимининг қонуний талабларини бажармаслик) ва 201-моддаси 1-банди (йиғилишлар, митинглар, кўча юришлари ёки намойишларни уюштириш ва ўтказиш тартибини бузиш) билан айбдор деб топилган.
Аввалроқ Озодлик Ўзбекистон парламентининг собиқ депутати Расул Кушербаевнинг телеграм каналига таянган ҳолда, Тошкентда 29 октябрь куни Амир Темур хиёбонига Фаластинни қўллаб-қувватлаш учун митинг ўтказиш ниятида йиғилган юздан кўпроқ киши ички ишлар ходимлари томонидан қўлга олингани ҳақида хабар берган эди.
“Билдирилишича, 100 дан ортиқ одам йиғилган. Ҳуқуқ-тартибот идоралари режалаштирилган йиғилишдан хабардор бўлган. 100 дан ортиқ одам ички ишлар бўлимларига олиб бориб, суҳбат ўтказилган ва уларнинг аксариятини қўйиб юборилган”, деб ёзган Расул Кушербаев.
Хабарда акцияда иштирок этиш учун нафақат шаҳар аҳолиси, балки қўшни вилоятлардан ҳам одамлар келгани айтилган. Ижтимоий тармоқларнинг Ўзбекистон сегментида мазкур акцияни ўтказиш чақириқлари 29 октябрдан бир неча кун аввал пайдо бўлган.
Хабарда ҳуқуқ-тартибот органлари мазкур йиғилишдан аввалдан хабардор бўлгани таъкидланади. Шунинг учун ҳам бу ерга Миллий гвардия ва бошқа кучишлатар идоралар ходимлаори аввалдан олиб келинган.
Орган ходимлари воқеа жойида юздан ортиқ одамни қўлга олиб, ички ишлар бўлимларига олиб борган. Суҳбат ўтказилгач, “уларнинг аксарияти уйларига қўйиб юборилган”. Уларнинг айримларига нисбатан Маъмурий жавобгарлик тўғрисидаги кодекснинг 201-моддаси («Йиғилишлар, митинглар, кўча юришлари ёки намойишлар уюштириш, ўтказиш тартибини бузиш»)да назарда тутилган ҳуқуқбузарлик бўйича маъмурий баённомалар тузилиб, материаллар судга тақдим этилган.
Маъмурий жавобгарлик кодекснинг мазкур моддасида базавий ҳисоблаш миқдорининг 60 бараваридан 80 бараваригача миқдорда жарима солиш ёки 15 суткагача маъмурий қамоққа назарда тутилади.
Байден фақат Исроилга ҳарбий ёрдам кўрсатиш тўғрисидаги қонунга вето қўяди
АҚШ президенти Жо Байден республикачилар томонидан таклиф қилинаётган Исроилга шошилинч ҳарбий ёрдам кўрсатиш тўғрисидаги қонун лойиҳаси Конгресснинг ҳар икки палатаси томонидан тасдиқланган тақдирда унга вето қўяди. Бу ҳақда Оқ Уй маълум қилди. Баёнотда таъкидланишича, мазкур қонунда Украина манфаатлари ҳисобга олинмаган ва фақат Исроилга ёрдам кўрсатилиши ҳақида гап боради.
Оқ Уйнинг бошқарув ва бюджет бюроси Исроил ва Украинага ҳарбий ёрдам бир пайтнинг ўзида бир пакет доирасида берилиши лозим, ҳарбий ёрдамни алоҳида-алоҳида ажратиш амалиёти миллий хавфсизлик учун глобал миқёсда салбий таъсир кўрсатиши мумкин, деб ҳисоблайди.
30 октябрда Конгресснинг Вакиллар палатасидаги ресбуликачилар АҚШ солиқ хизматини молиялаштиришни қисқартириш эвазига Исроилга 14,3 миллиард долларлик ёрдам ажратиш тўғрисидаги қонун лойиҳасини тақдим қилган эди.
Вакиллар палатасининг янги раиси Майк Жонсон Киевга қўшимча ёрдам ажратишга қарши чиқаётганлардан биридир. У дастлаб Исроилга шошилинч ёрдам кўрсатиш масаласини ҳал этишни, Украинага кўрсатиладиган ёрдам миқдорини эса кейинроқ муҳокама қилишни таклиф этмоқда.
Президент Байден аввлароқ Конгрессга бирданига 106 миллиард доллар ёрдам ажратишни, ундан ярмидан кўпроғини Украинага, қолганини эса Исроил ва Тайванга, ҳамда АҚШ-Мексика чегарасини қўриқлашга беришни таклиф қилганди.