Ливанда ҲАМАС раҳбарининг ўринбосари ўлдирилди
Ливанда АҚШ ва Европа Иттифоқи томонидан террорчи ташкилот сифатида тан олинган ҲАМАС раҳбари ўринбосари Солиҳ ар Арурий ўлдирилди. Reuters агентлигининг ўз манбаларига таяниб хабар беришича, Арурийга Исроил дрони билан ҳужум қилинган.
Арурийнинг ўлимини ҲАМАС тасдиқлади. Хабарда айтилишича, дрон ҲАМАСнинг Бейрут яқинидаги офисига зарба берган.
Times of Israel газетасининг ёзишича, 57 ёшдаги Арурий ҲАМАСнинг Ғарбий соҳилдаги ҳарбий қанотининг лидери бўлган. Исроил разведкаси уни қатор террор ҳужумларида, жумладан, 2014 йилнинг июнида уч нафар ўсмирни ўғирлаганликда ва ўлдирганликда гумонлаб келган.
Арурий бир неча марта Исроилда қамалган. Сўнгги марта у 201 йилда минглаб фаластинлик маҳкумлар қаторида ҲАМАС асир олган Исроил армияси капрали Гилад Шалитга алмаштирилган. Исроил ҳозирча Арурий ўлимига алоқадорлиги тўғрисидаги хабарларга муносабат билдирмади.
Исроил Ғазо марказига зарба берди, ўнлаб фаластинлик ҳалок бўлди
Исроил 27 декабрда Ғазо марказига денгиздан, ҳаводан ва ердан туриб яна зарбалар берди. Фаластин расмийлари ҳужум оқибатида ўнлаб тинч аҳоли ўлганини билдирди. Бу ҳақда Reuters агентлиги хабар берди.
Исроил армияси бош штаби раҳбари Герц Халев 26 декабрь куни берган баёнотида, халқаро ҳамжамиятнинг Ғазода ўт отишни тўхтатиш чақирувларига қарамай, уруш АҚШ ва ЕИ томонидан террорчи сифатида тан олинган ҲАМАС тўлиқ йўқ қилинмагунига қадар давом этишини билдирди. Халев уруш яна бир неча ойга чўзилишини айтди.
ҲАМАС назорати остидаги Ғазо Соғлиқни сақлаш вазирлиги Исроил зарбалари оқибатида Хон Юнусдаги касалхонада 20 киши ҳалок бўлганини маълум қилди. Исроил армияси бу хабарга муносабат билдирмади.
Сигрид Кааг БМТнинг Ғазо бўйича мувофиқлаштирувчиси лавозимига тайинланди
Оқ Уй Сигрид Каагнинг БМТ томонидан Ғазога гуманитар ёрдам кўрсатиш ва қайта тиклаш бўйича мувофиқлаштирувчиси лавозимига тайинланишини “муҳим қадам” сифатида олқишлади. АҚШ Фаластинга гуманитар кўмак кўрсатувчи йирик донор давлатдир.
Вашингтон Сигрид Кааг билан "Ғазога тинч аҳоли эҳтиёж сезаётган гуманитар ёрдам кўламини кўпайтириш йўналишида самарали ҳамкорлик қилишдан умидвор" эканини билдирган.
БМТнинг Ғазо бўйича мувофиқлаштирувчиси лавозими Хавфсизлик кенгашининг ўтган ҳафтада бўлиб ўтган йиғинида жорий этилган эди.
Кааг бу лавозимга тайинлангунига қадар Нидерландия молия вазири ва бош вазир ўринбосари бўлиб ишлаган.
Сигрид Кааг Фаластин озодлик ҳаракатига мансуб сиёсатчи Анис ал Каагнинг хотинидир. Анис ал Кааг 1990 йилларда Фалстинни бошқарган Ясир Арофат маъмуриятида вазир ўринбосари, кейинроқ эса Фаластин миллий маъмуриятининг Швейцариядаги элчиси лавозимларида ишлаган. Сигрид Кааг тўрт фарзанднинг онаси.
Reuters: ҲАМАС сулҳ эвазига Ғазода ҳокимиятни топширишдан воз кечди
АҚШ ва Европада террорчи ташкилот сифатида тан олинган ҲАМАС ва “Ислом жиҳоди” сулҳ эвазига Ғазода ҳокимиятни топширишдан воз кечди. Бу таклиф ҲАМАС ва Исроил ўртасида воситачилик қилаётган Миср томонидан киритилган эди. Бу ҳақда Reuters Миср хавфсизлик хизматидаги манбаларига таянган ҳолда хабар берди.
Хабарда айтилишича, Миср Ғазода сайлов ўтказишни таклиф қилган ва ҲАМАС аъзолари таъқиб қилинмаслигига кафолат берилишини билдирган. Қоҳирида ўтган музокараларда ҲАМАС вакиллари 7 октябрда Исроилга ҳужум пайтида гаровга олинганларни бўшатишдан бошқа ҳеч қандай шартларни қабул қилмасликларини билдирган. ҲАМАСга кўра, Исроил гаровдагиларнинг бўшатилиши эвазига қамоқларда сақланаётган фаластинликларни бўшатиши лозим.
“Ислом жиҳоди” вакиллари эса Reuters билан суҳбатда, Ғазо аҳолиси учун гуманитар ёрдам кўрсатиш кўпайтирилишини талаб қилаётганларини билдирди.
“Ислом жиҳоди” асирлар билан алмашиниш “барчага барчани” формуласи доирасида ўтказилишини талаб қилмоқда. Бу формулага асосан, гаровдагиларни бўшатилиши эвазига Исроил қамоқларда сақланаётган барча фаластинликларни озод қилиши шарт.
Сўнгги маълумотларга қараганда, ҳозир бу икки гуруҳ қўлида Исроилга 7 октябрь куни қилинган ҳужумда гаровга олинган 130 одам қолмоқда.
Мисрнинг “Аш Шарқ” телеканали ўз манбаларига таяниб, Қоҳира Исроил ва ҲАМАСга таклиф қилган тинчлик режасининг айрим тафсилотларини очиқлади.
Биринчи босқичда уч ҳафталик гуманитар оташкесим эълон қилинади. Шу давр ичида ҲАМАС гаровга олинганлардан 40 нафарини, Исроил эса қамоқдаги 120 фаластинликни бўшатиши ва Ғазога ёқилғи, гуманитар ёрдам киритиши керак.
Иккинчи босқичда Ғазода бўлгани қайта тиклаш ва Фаластин мухторияти президенти сайловини ўтказишга тайёргарлик кўрувчи ҳукумат ташкил қилинади.
Учинчи босқичда ўт отишни тўлиқ тўхтатиш, асир олинган барча Исроил аскарларини озод қилиш ва уларни муайян миқдордаги фаластинлик маҳкумларга алмашиш назарда тутилади. Бу босқичда Исроил армияси бўлгани тарк этади ва қочқинлар уйларига қайтарилади.
Айни пайтда Исроил бош вазири Бинямин Нетаняҳу парламентда қилган чиқишида, 25 декабрь куни Ғазога боргани ҳақида билдирди. Ғазода Исроил аскарлари билан учрашган Нетаняҳу ҲАМАС тўлиқ йўқ қилинмагунича ҳарбий амалиёт давом эттирилишини айтган.