Байден ҲАМАСни террорчи деб атади ва АҚШ Исроилни қўллашини билдирди
АҚШ президенти Жо Байден Оқ Уйда ҲАМАС- Исроил зиддияти бўйича баёнот берди. Байден ўз нутқида ҲАМАСни террорчи ташкилот деб атади.
Байден фикрича, ҲАМАС Фаластин халқи ҳимоячиси эмас. Бу ташкилот ўз олдига фақат “яҳудийларни ўлдириш” вазифасини қўйган. Байден ҲАМАС ҳужумлари оқибатида мингдан ортиқ киши, жумладан, 14 нафар АҚШ фуқароси ҳалок бўлганини таъкидлади. АҚШ президенти ҲАМАС гаровга олганлар орасида америкаликлар ҳам борлигини қайд этган.
Байден нутқи давомида бир неча марта АҚШ Исроилни қўллашини айтди. Унга кўра, Исроил ўзини ҳимоя қилиш ҳуқуқидан ташқари ўзини ҳимоя қилиш мажбуриятига ҳам эга. Шу билан бир қаторда Байден Нетаняҳуни “уруш қонунларига амал қилиш”га чақирди.
АҚШ президенти Конгрессга Исроилга мудофаа учун қўшимча воситалар ажратиш масаласини Конгресс кун тартибига киритишга ваъда берди. Байден, АҚШ зарурат бўлса, минтақага ҳарбий куч жўнатиши мумкинлигини билдирди. Унинг айтишича, бугунги вазиятда Исроилни қўллаш сиёсат масаласи эмас, балки жаҳондаги, жумладан, АҚШдаги тинчликни сақлаш муаммосидир.
10 октябрь куни яқин кунларда АҚШ давлат котиби Энтони Блинкен Исроилга ташриф қилиши тўғрисида хабар берилди. У Исроил ҳалқи билан бирдамлик изҳор қилади ҳамда гаровдагиларни озод қилиш бўйича қўлланиладиган чораларни муҳокама қилади.
Исроилда 1200, Ғазода 950 киши ўлди
ҲАМАС зарбалари ортидан Исроилда ҳалок бўлганлар сони 1200 кишига етди. Исроил армияси ҳужумлари оқибатида Ғазода 950 киши ўлди. Яраланганларнинг умумий сони ўн минг кишидан ошган. ҲАМАС юзлаб кишини гаровда сақлаб турибди.
Фаластинда 250 минг киши ўз уйини ташлаб чиқиб кетишга мажбур бўлган, уларнинг асосий қисми Ғазо аҳолиси экани айтилмоқда.
Аввалроқ Исроил ҳукумати Ғазор бўлгаси тўлиқ қамал қилинганини билдирган. Жумладан, Ғазога сув, озиқ-овқат ва электр энергияси етказиб бериш тўхтатилган.
БМТ Исроилнинг бу қадамини танқид қилди. Шунингдек, БМТ ҲАМАС исроилликларни гаровга олганини ва пайдар-пай зарбалар бераётганини қоралади.
NBC News хабарида айтилишича, АҚШ Ғазо бўлгасидан фаластинликларни ва америкаликларни Мисрга олиб чиқиб кетиш учун гуманитар йўлак ташкил қилиш устида ишламоқда.
Боррелл: Ғазонинг қамал қилиниши халқаро ҳуқуққа зид
Исроил ўзини ҳимоя қилиш ҳуқуқига эга, аммо унинг баъзи қарорлари халқаро ҳуқуқни бузади, деди сешанба куни Европа Иттифоқининг ташқи сиёсат бўйича вакили Жозе Боррел журналистларга.
Исроил мудофаа вазири Йоав Галлант Фаластиннинг Ҳамас жангари гуруҳининг Исроилга ҳужумига жавобан душанба куни Ғазога электр, озиқ-овқат, сув ва ёқилғи бериш тўхтатилишини айтганди.
"Исроил (ўзини) ҳимоя қилиш ҳуқуқига эга, аммо бу халқаро ҳуқуқ, гуманитар ҳуқуқ асосида амалга оширилиши керак ва баъзи қарорлар халқаро ҳуқуққа зиддир", деди Боррелл Уммон пойтахтида Европа Иттифоқи ташқи ишлар вазирларининг йиғилишидан кейин.
Эрдўғон: Бу уруш эмас, қирғиндир
Ғазонинг қамал қилинишини Туркия президенти Ражаб Таййиб Эрдўғон қоралади:
“Шаҳарнинг сув, электр таъминоти, кириш ва чиқиш йўлларини узиб қўйиш, инфратузилмасини бузиш, масжидлардан черковларгача бўлган барча ибодат марказларини, шунингдек, уларнинг мактабларини вайрон қилиш, одамларнинг энг асосий эҳтиёжларини қондиришига йўл қўймаслик, тинч аҳоли яшайдиган турар-жой биноларини бомбардимон қилиш, яшаш - бошқача қилиб айтганда, ҳар қандай шармандали усуллардан фойдаланган ҳолда можарони бошқариш - бу уруш эмас, бу қирғиндир", - деди Эрдўғон.
Исроил ҳаводан берилган ҳаво зарбалари акс этган видеони эълон қилди.
Видеолардан бирида Исроил армияси узоқ масофали “Ментатч” ракетасидан Ғазодаги Хамас нишонини ургани кўринади.
Бошқа тасвирларда Ғазо ислом университетига ҳаво зарбалари берилгани акс этган. Исроил уни “Ҳамаснинг муҳим операцион, сиёсий ва ҳарбий маркази” деб ҳисоблайди.
Денгиздан олинган видеода Исроил ҳарбийлари Ғазо қирғоқларидаги докларга зарбалар берилгани акс этган.
Исроил армиясининг маълум қилишича, ўнлаб қирувчи учоқлари бир кеча-кундузда Ғазо шаҳри маҳалласидаги 200 дан ортиқ нишонга зарба берган, улар Хамас томонидан ҳужумлар уюштириш учун ишлатилган.
Фаластин матбуоти Исроил ҳаво ҳужумлари Ғазо шаҳри, жанубдаги Хон Юнис шаҳри ва Ғазо марказидаги Бурейж қочқинлар лагеридаги уйларга зарба берганини айтди. Ижтимоий тармоқларда аҳолининг айтишича, кўплаб бинолар қулаб тушган, баъзида 50 га яқин одам қолиб кетган.
Бирлашган Миллатлар Ташкилотининг билдиришича, 180 000 дан ортиқ ғазолик бошпанасиз қолган.