Исроил Ғазо марказига кирганини эълон қилди
Исроил ҳарбийлари ҲАМАС радикал гуруҳининг асосий базалари жойлашган Ғазо шаҳри марказига кирганини маълум қилди. ҲАМАС эса Исроил катта йўқотишларга учраганини билдирди.
Кеча ҲАМАС қуролли қаноти Ғазо шаҳридаги шиддатли кўча жанглари акс этган видеони эълон қилди.
Эрон томонидан қўллаб-қувватланадиган ҲАМАС ва «Исломий жиҳод» жангари гуруҳи манбаларига кўра, Исроил танклари ер ости туннелларида ҲАМАС жангчиларининг пистирмаларига ва қаттиқ қаршиликларига дуч келган.
Озодлик уруш шароитида томонлар тақдим қилаётган маълумотларни тезкор текшириш имконига эга эмас.
Исроил Хон Юнисни бомбаламоқда
Минглаб фаластинликлар бомбардимондан қочиб, шимолдан жанубдаги Хон Юнисга кўчиб ўтган. Лекин Исроил кучлари Хон Юнисни ҳам бомбаламоқда.
Исроилнинг Хон Юнисдаги иккита бинога зарба бериши оқибатида бир неча тинч аҳоли ҳалок бўлган. Хабарларга кўра, қурбонлар орасида ёш болалар ҳам бор.
Ярадорлар тез ёрдам машиналарида касалхонага етказилган. Омон қолганларни қидириш давом этмоқда.
Исроил қўшинлари ҳужумга аниқ муносабат билдирмади, бироқ расмийларга кўра, ҲАМАС радикал гуруҳининг ҳарбий ва бошқарув қобилиятини йўқ қилиш кампанияси доирасида Хон Юнисга зарба берилган.
БМТ: Ғазо касалхоналарида беморлардан ташқари 117000 тинч аҳоли бошпана топган
Исроил эвакуация қилишни буюрган Ғазо секторидаги энг йирик тиббиёт маркази бўлмиш Аш-Шифа касалхонасида минглаб фаластинлик бошпана топган.
Ум Ҳайтам Ҳижала уйини ташлаб чиқишга мажбур бўлган ва касалхона ҳудудидаги чодирлардан биридан қўним топган. Ҳижалага кўра, тинч аҳолининг бошқа борар жойи йўқ:
“Кучли ҳаво ҳужумлари туфайли уйимизни ташлаб кетдик, бу ерда аҳвол жуда ёмон. Кундан-кунга ёмонлашмоқда. Кеча яқинларимиз, 15 киши ҳужумга учради, уйимизни ташлаб келишга мажбур бўлдик. Озиқ-овқат, сув йўқ. Ўғлим бир литр сув олишга борса, 3-4 соат навбатда туради. Нонвойхоналар ҳам вайрон бўлган, егани нон йўқ”.
27 октябрь куни Исроил ҳарбийлари ҲАМАС радикал гуруҳини Ғазонинг бош касалхонасини туннеллар ва операция марказлари учун ниқоб қилганликда айблади.
ҲАМАС матбуот котиби Иззат Эр-Решиқ Телеграмда: “Душман армияси сўзчиси айтганлари ҳақиқат эмас”, деди ва Исроилни “одамларни яна қирғин қилишни бошлаш” учун ёлғон тарқатишда айблади.
Соғлиқни сақлаш расмийлари айтишича, айни дамда касалхонада 50 мингга яқин фаластинлик жойлашган.
Аш-Шифа ва Ал-Қудс касалхоналари тиббиёт ходимлари айтишича, касалхона бинолари яқинида ҳаво ҳужумлари бўлган. Бирлашган Миллатлар Ташкилотининг Инсон ҳуқуқлари бўйича бош комиссарининг гуманитар идораси шимолдаги касалхоналарда минглаб беморлар ва шифокорлар билан бирга 117 минг тинч аҳоли бошпана топганини айтди.
БМТ: Исроил ва ҲАМАС ҳарбий жиноятлар содир этган
Бирлашган Миллатлар Ташкилотининг Инсон ҳуқуқлари бўйича Олий комиссари Ғазодаги можарода Исроил ва ҲАМАС радикал гуруҳи томонидан бирдай ҳарбий жиноятлар содир этилганини айтди:
"Бу дарвозанинг нариги томонида 56 йиллик ишғол ва 16 йиллик Исроил блокадаси остида яшаган, 7 октябргача дунёдаги энг катта очиқ қамоқхона сифатида таърифланган Ғазо жойлашган. 7 октябрь куни Фаластин қуролли гуруҳлари томонидан содир этилган ваҳшийликлар ва одамларни гаровга олиш -уруш жиноятлари. Исроилнинг Фаластин тинч аҳолисини оммавий жазолаши, аҳолини мажбуран кўчириши ҳам уруш жинояти".
Исроил 7 октябрь куни 1400 киши ҳаётига зомин бўлган ва 200 дан ортиқ одам гаровга олинган ҲАМАС ҳужумларидан кейин Ғазо секторини нишонга ола бошлаган.
Фаластин расмийлари ҳисоб-китобича, Исроил ҳужумида 10 569 фаластинлик ҳалок бўлган, уларнинг 40 фоизи болалардир.
Исроил томони эса ҲАМАС ҳужумида 1400 исроиллик ўлгани, 240 га яқин одам гаровга олинганини билдирган.
Озодлик уруш шароитида томонлар тақдим қилаётган маълумотларни тезкор текшириш имконига эга эмас.