Ҳаагада Исроил Ғазода геноцид уюштиргани юзасидан айблов бўйича суд бошланди
Ҳаагада Исроил Ғазо аҳолисини геноцид қилгани юзасидан билдирилган айблов бўйича БМТ Халқаро судининг йиғилиши бошланди. Даъво аризасини судга Жанубий Африка Республикаси (ЖАР) киритган.
Ўтган йилнинг октябридан бошлаб Исроил армияси Ғазо бўлгасида ҲАМАСга қарши ҳарбий амалиёт олиб бормоқда. ҲАМАС АҚШ ва ЕИда террорчи ташкилот сифатида тан олинган. Ҳарбий амалиёт чоғида бир неча ўн минг фаластинлик ҳалок бўлган.
ҲАМАС 7 октябрда Исроилга ҳужум қилган ва камида 1400 кишини ўлдирган ҳамда 200 дан ортиқ кишини гаровга олган эди. Шу кунгача ҲАМАС ва Исроил ўртасида Ғазода оташкесим ўрнатиш тўғрисидаги бир неча битим ортидан гаровга олинганларнинг бир қисми қамоқда сақланаётган фаластинликларга алиштирилган. Сўнгги хабарларга қараганда, ҲАМАС Ғазода яна камида юз кишини гаровда ушлаб турибди.
ҲАМАС назорати остидаги Ғазо Соғлиқни сақлаш вазирлиги Исроил ҳужумлари оқибатида бўлгада камида 22 минг фаластинлик ҳалок бўлганини, уларнинг аксарияти аёллар ва болалар эканини билдирган.
Дунёнинг кўплаб давлатлари Исроил ҲАМАСга қарши урушда ўта зўравонликка йўл қўйганини танқид қилган. Исроил армияси эса тинч аҳолининг ҳалок бўлиши учун масъулиятни ҲАМАС зиммасига юклаган. Исроил ҲАМАС ва бошқа жиҳодчи гуруҳлар ўз инфратузилмасини тинч аҳоли яшайдиган ҳудудларга жойлаштирганини ва тинч аҳолидан тирик қалқон сифатида фойдаланганини иддао қилиб келмоқда.
Суднинг биринчи кунида Ҳаагада қўлларига Исроил байроқларини ва ҲАМАС гаровга олган шахсларнинг портретларини кўтариб олган юзлаб одамлар намойишга чиқди.
Фаластинни қўллаётган фаоллар ҳам Ҳаагада ўз намойишини ўтказмоқда. Улар қўлларига Ғазодаги қотилликларни тўхтатиш талаб қилган плакатларни кўтариб олган.
Намойишларни полиция назорат қилмоқда. Ҳаагада хавфсизлик чоралари кучайтирилди.
АҚШ ва Британия Ямандаги хусийлар позицияларига зарба берди
АҚШ ва Британия Ямандаги хусий шиа исёнчиларининг позицияларига зарба берди. Эрон томонидан дастакланаётган хусийлар сўнгги бир ярим ойдан бери Қизил денгиздаги кемаларга ҳужум қилмоқда. Бу ҳақда Reuters хабар берди.
Агентликнинг Оқ Уйдаги манбалари хусийларга самолётлар, кемалар ва сув ости кемаси зарба берганини айтган. CNN манбаси эса ҳужумда “Томагавк” қанотли ракетаси қўлланилганини билдирди.
Ракета зарбалари Австралия, Баҳрайн, Канада ва Нидерландиянинг қўллови остида АҚШ ҳарбий денгиз кучлари ва Британия Қироллик ҳарбий денгиз кучлари томонидан берилди.
Хусийлар, АҚШ ва Британиядаги манбалар биринчи галда аэродромлар, радарлар ҳамда қурол омборлари бомбардимон қилинганини билдирди. Иттифоқчилар разведкаси бу аэродромлардан кемаларга зарба берилаётганини таҳмин қилган.
Би-би-сининг хабар беришича, Худейда шаҳри Саада вилоятидаги Кахлан ҳарбий базаси, Ал Дайламий авиабазаси, Аббс шаҳридаги аэродром бомбардимон қилинган.
Президент Байден ўз баёнотида бу ҳарбий амалиётни хусийларнинг Қизил денгиздаги савдо кемаларига «мисли кўрилмаган даражада қилган ҳужумларига жавоб» деб атади.
Яманнинг катта қисмини назорат қилаётган хусий шиа қуролли гуруҳлари АҚШ ва ЕИ томонидан террорчи ташкилот деб тан олинган ҲАМАСни қўллаб-қувватлашини намойиш этиш мақсадида Қизил денгиздаги кемаларга ҳужу қилмоқда. Бу ҳужумлар халқаро савдога салбий таъсир кўрсатди. Кўплаб денгиз савдоси билан шуғулланувчи ширкатлар бу йўналишдаги қатновларни тўхтатдилар.
Хусийлар лидери Абдул Малик ал Хутий АҚШнинг ҳужумлари «жавобсиз қолмаслиги” тўғрисида баёнот берди.
Ҳарвард талабалари университетни антисемитизмда айблади
Ҳарвард университетида ўқийдиган яҳудий талабалар олийгоҳ маъмуриятини антисемитизмда айбламоқда.
Талабалар 10 январь куни Бостон федерал судига киритган аризаларида Ҳарвард университети раҳбарияти яҳудийларга нисбатан зўравонликларни дастаклаётгани, яҳудий талабаларни таъқиблардан ҳимоя қилмаётгани ва антисемит тарғиботига йўл бераётганини иддао қилган.
388 йиллик тарихга эга университет фуқаролик ҳуқуқлари тўғрисидаги федерал қонунни бузганликда айбланмоқда, деб ёзди Reuters.
Судга ариза Ҳарвард университети ректори Клодин Гей истеъфо берганидан бир ҳафта ўтганидан сўнг киритилди. У ҲАМАС-Исроил уруши фонида антисемитизмга йўл қўйганликда танқид қилингани остидан истеъфо берган эди. ҲАМАС АҚШ ва ЕИда террорчи ташкилот сифатида тан олинган.
Судга киритилган аризада Ҳарвард бундан юз йил аввал белгилаб қўйилган квота мавжудлигига қарамасдан яҳудийларни талабалар сафига қабул қилишни озайтирмоқчи бўлаётгани тўғрисида таҳминлар мавжудлигини ҳам иддао қилган.
“Америка овози”нинг маълум қилишича, ҲАМАС-Исроил уруши бошланганидан сўнг 30 га яқин талабалар гуруҳлари Исроил қораланган петицияни имзолаган. Судга киритилган аризада Ҳарвард раҳбарияти петицияни қораламагани ва яҳудий талабаларни дастакламагани айтилади.
Бостон судига киритилган аризада антисемитизм руҳидаги талабаларни ўқишдан бўшатиш, антисемитизм руҳидаги ўқув дастурларини олға сураётган профессорларга чоралар кўриш талаб этилади.
АҚШдаги Нью-Йорк университети ва Берклидаги Калифорния университети ҳам мана шундай муаммога дучор бўлган.
Нетаняҳу: Ғазонинг Миср билан чегарасини назоратга олмагунимизча ҲАМАС билан уруш тугамайди
Исроил Ғазо бўлгасининг Миср билан чегарасини ўз назоратига олмагунича, АҚШ ва ЕИда террорчи ташкилот сифатида тан олинган ҲАМАС билан урушни якунлай олмайди, деб баёнот берди бош вазир Бинямин Нетаняҳу.
The Times of Israel газетасининг ёзишича, Нетеняҳу бўлгани демилитаризациялашнинг ягона йўли Ғазо-Миср чегарасини Исроил назорати остига ўтказиш, деб ҳисоблайди.
Нетаняҳуга кўра, ҲАМАСни йўқ қилиш мумкин, аммо яхши қўриқланмайдиган чегарадан Ғазога яна қурол ва жангарилар ўтиб келаверади.
The Wall Street Journal Исроил Мисрни Ғазо бўлгаси билан 14 километрлик чегарасини ўз назоратига олиш режаси мавжудлигидан огоҳлантиргани ҳақида хабар берди. Ҳозирча бу борада якуний қарор қабул қилинган эмас ва масала Қоҳира билан музокаралар натижасига қараб ҳал этилади.
14 январь куни ҲАМАС Исроил жанубига ҳужум қилганига юз кун бўлди. Ўтган йилнинг 7 октябрида ҲАМАС ҳужумидан 1200 киши ҳалок бўлган. ҲАМАС камида 200 кишини, жумладан, болаларни гаровга олган. Улардан 105 нафари Исроил ва ҲАМАС ўртасидаги вақтинчалик оташкесим келишувига асосан озод қилинган. Исроил ҳозирла яна 136 киши ҲАМАС гаровида қолаётганини билдирган. Уларнинг тақдири номаълум.
ҲАМАС назорати остидаги Ғазо Соғлиқни сақлаш вазирлиги Исроил ҳужумлари оқибатида 23 минг фаластинлик ҳалок бўлганини билдирди. Уларнинг асосий қисми аёллар ва болалардир. Мустақил манбалардан бу маълумотни тасдиқлатиш имконияти мавжуд эмас.