Prezident Shavkat Mirziyoyev 8 - mart-Xalqaro xotin-qizlar kuni munosabati bilan Toshkent shahridagi “Kongress-xoll”da o‘tkazilgan tadbirda nutq so‘zlab, ayollarni tabrikladi.
Prezident o‘z tabrigida O‘zbekistonda ayollarni ijtimoiy va iqtisodiy jihatdan qo‘llab-quvvatlash masalasiga alohida e’tibor qaratdi. “Bundan buyon hech bir ayol e’tibordan chetda qolmaydi”,-deb va’da berdi u.
Shavkat Mirziyoyevning aytishicha, keyigi 3 oyda respublika komissiyasi tomonidan “Ayollar daftari”ga kiritilgan 80 ming nafar xotin-qizning muammolari hal etildi. Ijtimoiy himoyaga muhtoj, turmush sharoiti og‘ir ayollarning 32 ming nafari ish bilan ta’minlandi. Inqirozga qarshi kurash jamg‘armasi mablag‘lari hisobidan salkam 17 ming nafar xotin-qizga amaliy yordamlar ko‘rsatildi.
“Birgina “Har bir oila – tadbirkor” dasturi doirasida 126 mingga yaqin ayollarga imtiyozli kreditlar berildi. Oilaviy tadbirkorlikni rivojlantirish uchun qariyb 215 ming oilaga 6 trillion so‘mdan ziyod kredit mablag‘lari ajratildi. Qariyb 55 ming nafar xotin-qizlar tadbirkorlik va kasb-hunar markazlari tomonidan o‘qitildi, hunarmandchilik va kasanachilikka jalb etildi”,-dedi prezident.
Uning aytishicha, “Besh muhim tashabbus” doirasida chekka hududlarda tikuvchilik sexlari tashkil etilib, 10 ming nafar ayol ish bilan ta’minlangan.
Tabrik nutqida aytilishicha, shu kungacha 1250 ayolga uy-joy sotib olish uchun qariyb 22 milliard so‘mlik boshlang‘ich badal to‘lab berildi.
“Bunday xayrli ishlar joriy yilda ham davom ettiriladi. Men bu borada kuni kecha yangi qarorni imzoladim. Unga ko‘ra, jamiyatda ayollarimizga bo‘lgan e’tiborni eng quyi bo‘g‘in – mahallagacha yetkazib, ularni har tomonlama qo‘llab-quvvatlashning yangi tizimi yaratilmoqda. Bundan buyon O‘zbekistonda bironta ham ayol davlat va jamiyatning e’tiboridan chetda qolmaydi”,-dedi Shavkat Mirziyoyev.
Nutqi davomida prezident ayollarni ijtimoiy-iqtisodiy himoyalash bo‘yicha yangi qarorlar qabul qilinishini aytib o‘tdi. Jumladan, prezidentga ko‘ra, 2021 - yilda turmush sharoiti og‘ir bo‘lgan ayollar hamda yolg‘iz onasi qaramog‘ida o‘sgan qizlarni uy-joy bilan ta’minlash maqsadida byudjetdan 210 milliard so‘m mablag‘ ajratiladi.
“Boshpanasi bo‘lmagan ayollarni ijara asosida “ijtimoiy uy-joylar” bilan ta’minlash uchun yana 211 milliard so‘m yo‘naltiramiz. Bundan tashqari, boquvchisini yo‘qotgan hamda o‘zgalar parvarishiga ehtiyojmand bo‘lgan xotin-qizlarga moddiy yordam berish va malakali tibbiy yordamga muhtoj ayollarni davolash uchun qo‘shimcha ravishda 110 milliard so‘m beriladi”,-dedi prezident.
Shu bilan birga, ayollar bandligini ta’minlash, ularni kasb-hunarga o‘qitish, tadbirkorlik sohasidagi tashabbuslarini qo‘llab-quvvatlash uchun byudjetdan qo‘shimcha ravishda 600 milliard so‘m ajratiladi.
Shavkat Mirziyoyev ajralishlar soni ko‘pligidan tashvishda ekanini ham aytib o‘tdi. Prezident bergan ma’lumotda aytilishicha, o‘tgan yili 28 mingdan ziyod oila ajralib ketgan. Bu 2019 - yildagi ko‘rsatkichdan 3 mingga ozdir. Yarashtirilgan oilalar soni esa 23 ming bo‘lgan.
Shundan kelib chiqqan holda, prezident ayollar huquqini ta’minlash ustivor vazifalardan biri bo‘lib qolishini ta’kidladi.
“Aziz va muhtarama opa-singillar!
Sizlarni 8 - mart bayrami bilan yana bir bor chin qalbimdan qutlab, barchangizga sihat-salomatlik, oilalaringizga tinchlik-xotirjamlik, fayzu baraka tilayman.
Doimo yaqinlaringiz, farzand va nabiralaringiz, el-yurtimiz ardog‘ida bo‘lib yurish nasib etsin!
Umringiz uzoq, baxtingiz ziyoda bo‘lsin!
Go‘zal bayramingiz muborak bo‘lsin!”-deb nutqini yakunladi Shavkat Mirziyoyev.
