Муҳожирлар сайлов ҳақида қандай фикрда?
Марказий сайлов комиссияси (МСК) 39 та давлатда 57 та сайлов участкаси ташкил этилгани, шундан 26 та давлатда муддатдан олдин овоз бериш ўтказилганини маълум қилган.
Хорижда яшовчи ўзбекистонликлар 16 октябрь куни хориждаги сайлов участкаларида овоз беришни бошлаган.
Ўзбекистонликлар Мирзиёев ҳокимиятга келганидан буён иккинчи парламент сайловларида овоз беришмоқда.
Сайловда бешта: Тадбиркорлар ва ишбилармонлар ҳаракати – Ўзбекистон либерал-демократик партияси, “Миллий тикланиш” демократик партияси, Экологик партия, Халқ демократик партияси ҳамда “Адолат” социал-демократик партияси иштирок этмоқда.
Бу йилги сайлов шиори “Менинг танловим – обод Ватаним”.
Озодлик сайлов арафаси Россиядаги ўзбек мигрантлари билан суҳбатлашиб, уларнинг сайлов борасидаги фикрларини ўрганган.
Сайлов-2024: Президентнинг оилавий суратида Мирзиёев йўқ
Тармоқларда президент Шавкат Мирзиёевнинг ёлғиз ўзи овоз бергани хабари муҳокамага сабаб бўлганидан сўнг унинг оила аъзолари бирга сайловда иштирок этганига оид фото ва видеолар эълон қилинди.
Президент матбуот хизмати тарқатган тасвирларда Тошкентнинг Мирзо Улуғбек туманидаги 59-сайлов участкасига Мирзиёев оила аъзолари билан бирга боргани акс этган.
Тасвирларда Мирзиёевнинг рафиқаси Зироат Мирзиёва, икки қизи Саида ва Шаҳноза Мирзиёевалар ҳамда икки куёви Ойбек Турсунов ва Отабек Умаров ҳам айни сайлов участкасида овоз берганини кўриш мумкин. Мулозимлардан фарқли президентнинг неваралари сайловда кўринмади.
Одатда сайловда овоз бергач, Мирзиёев оила аъзолари билан биргаликда суратга тушиб, фотосессия қиларди. Бу сафар ҳам президент оиласи суратга тушган, бироқ Мирзиёев бу суратда йўқ. Суратда президентнинг рафиқаси Зироат Мирзиёева қизлари ва куёвлари билан бирга турибди.
Маҳаллий матбуотда тарқатилган хабарларда Мирзиёевнинг ёлғиз ўзи овоз бераётгани сурати илова қилинган.
Парламент сайловидан бир кун аввал Мирзиёевга яқин шахслардан бири, унинг администрациясининг собиқ мулозими ва унинг собиқ матбуот котиби Комил Алламжонов “қуролли ҳужум”га учраган. Алламжонов президентнинг тўнғич қизи Саида Мирзиёева билан 7 йил давомида тандемда ишлаб келаëтган эди.
Озодликнинг ҳукумат ва куч тизимларидаги манбалари қудратли оиланинг ҳукуматда юқори лавозимларни эгаллаган аъзолари орасида таранглик борлигини айтишган.
Мулозимлар ва оилалари сайловда овоз берди
Сайловда оила аъзоларисиз ёлғиз ўзи овоз берган президент Шавкат Мирзиёевдан фарқли мулозимлар оиласи билан овоз беришди.
Жумладан, Бош вазир Абдулла Арипов Тошкент шаҳри Юнусобод туманидаги 520-сайлов участкасида оила аъзолари билан овоз берди.
Олий Мажлис Сенати раиси Танзила Норбоева ҳам оила аъзолари билан бирга пойтахтдаги 576-сайлов участкасига келиб, овоз берди.
Уларнинг иккаласи ҳам [афтидан] невараси билан овоз бераётгани сурати тарқалди.
Расмий хабарда президент Мирзиёев ҳам сайловга оила аъзолари билан боргани айтилди. Бироқ фото ва видео тасвирларда унинг ўзи ёлғиз кўрсатилди.
Кейинги пайтда Мирзиёев оиласи ва унинг қариндошлари билан боғлиқ хабарлар кўлами кўпайди.
Озодликнинг “Мирзиëевлар амирлиги” деб номланган суриштирувида Мирзиёев 2016 йилда ҳокимиятга келганидан буён 20 га яқин қариндошларини ҳукуматнинг юқори лавозимларига тайинлаши баробарида биринчи оила мансублари Ўзбекистон иқтисодиётининг бутун бошли соҳаларини ўз назоратига олганини ўртага чиқарди.
Суриштирувни ҳали кўрмаган бўлсангиз, вақт топиб албатта кўринг:
Мирзиёев нега оила аъзоларисиз овоз берди?
Шавкат Мирзиёев ҳокимиятга келганидан буён ўтказилаётган иккинчи парламент сайловларида овоз берди.
У Тошкент шаҳри Мирзо Улуғбек туманидаги 59-сайлов участкасига бориб, овоз берган.
Мирзиёев борган сайлов участкасига фақат саноқли матбуот вакилларига киришга рухсат берилган. Аксар нашрлар ЎзА олган видеони олиб, тарқатишди.
Аввалги сайловлардан фарқли Мирзиёев кадрда оила аъзоларисиз кўринди. У президентлик курсини эгаллаганидан буён ўтган сайловларнинг барчасида оила аъзолари билан бирга бориб, фотосессия қилишни одат қилган эди.
Расмий хабарда Мирзиёев бу сафар ҳам сайловга оила аъзолари билан боргани айтилди. Бироқ фото ва видео тасвирларда унинг ўзи ёлғиз кўрсатилди.
Бу президент оиласида кечаётган ворислик кураши ҳақидаги тахминларни янада кучайтирди.
Таҳлилчилар наздида, Ўзбекистонда президент меросхўрлиги устида парда ортида кечаётган кураш шу кунларда анча кучайган.
"Шавкат Мирзиёев клани ичида икки гуруҳ – қизи Саида Мирзиёва ҳамда куёви Отабек Умаров ўртасида рақобат ва кескинлик ошиб бормоқда, иккала тараф ҳам, афтидан, президент ўз лавозимини тарк этишга мажбур бўлган ёки вафот этган тақдирда етакчилик ролига талабгор...
Мирзиёев ҳам, Каримов режимида бўлгани каби, ўз атрофидагиларни назорат қила олмай қоляпти. Оила ичидаги кураш ташқарига чиқиши президентнинг обрўсига жуда катта путур етказади, унинг вазиятни назорат қила олиш лаёқатига ишонмайдиганлар кўпаяди. Хўш, энди президент қандай йўл тутиши мумкин? Курашда у ёки бу томоннинг ёнини олиши маҳол, олса ҳам бу ишни очиқча қилмайди. Катта эҳтимол билан, дискредитация қилмасликлари учун иккала томон билан ҳам яхши муносабатда бўлишга интилади", дейди Буюк Британияда жойлашган "Central Asia Due Diligence" тадқиқот маркази раҳбари Алишер Илҳомов.