Ukrainada “Ruta” nomli yangi raketa sinovdan muvaffaqiyat bilan o‘tgan. Bu haqda prezident Vladimir Zelenskiy Kiyevda Boris Paton nomidagi Ukraina Milliy mukofotini topshirish marosimida ma’lum qildi.
Ukraina prezidenti raketaning texnik xususiyatlari bo‘yicha hech qanaqa tafsilot ochiqlagan emas.
“Ukrainskaya pravda” nashrining yozishicha, Zelenskiy 2024-yil avgustida jangovar sharoitda ilk bor qo‘llanilgan “Palyanitsa” uzoq manzilli raketa-droni seriyali ishlab chiqarishga qo‘yilganini ham ma’lum qilgan.
Zelenskiyga ko‘ra. “Peklo” nomli raketa-dronning ilk jangovar qo‘llanuvi muvaffaqiyatli bo‘lgan. Uning aytishicha, shu kunlarda Ukraina mudofaa kuchlariga mazkur raketa-dronning ilk partiyasi topshiriladi.
Zelenskiy yaqin orada ukrainalik harbiylarga topshiriladigan “Neptun” nomli uzoq manzilli raketani “ishg‘olchilar uchun dahshatli voqelik” deb atagan.
Prezidentga ko‘ra, Rossiyaga qarshi urushda Ukrainada ishlab chiqilgan va hozirlangan turli dronlardan “faol ravishda foydalanilmoqda”. Ular frontda ham, “front ortidagi dushman hududi”da ham birdek qo‘llanilyapti.