ЕИ Қозоғистонга ёрдам қўлини чўзишга тайёр эканини билдирди
Европа Иттифоқи ташқи сиёсат маҳкамаси раҳбари Жозеп Боррель 8 январь куни Қозоғистондаги аҳвол хусусида фикр билдираркан, ЕИ вазиятни тинч йўл билан тартибга солишда унга ёрдам беришга ҳозирлигини айтди.
“Биз муаммони тинчлик билан ҳал этиш учун ёрдам қўлини чўзишга тайёрмиз”, деган европалик дипломат.
Боррель инсонлар қурбон бўлгани муносабати билан таассуф билдириб, зўравонлик ҳолатларини танқид қилган.
У КХШТга аъзо мамлакатлар ҳамда Россияни Қозоғистон мустақиллигини ҳурмат қилишга чақирган. “Ташқи ҳарбий кўмак Қозоғистон мустақиллиги ва ҳудудий яхлитлигига, инсон ҳуқуқларига риоя қилган ҳолда жалб этилиши лозим. Биз Қозоғистон ҳукуматини ушбу мураккаб паллада фуқароларнинг ҳуқуқ ва эркинликларини, тинч йиғинлар ўтказиш ва ахборот олиш ҳуқуқини таъминлашга чақирамиз”, деган Боррель.
Аввалроқ АҚШ Қозоғистондаги зўравонликларни қоралаб, мамлакат ҳукумати ва намойишлар иштирокчиларини босиқликка ва можарони тинч йўл билан бартараф этишга чақирган эди.
Қурбонлар ҳақидаги маълумотлар олиб ташланмоқда
Қозоғистон расмийлари ижтимоий тармоқлар ва расмий сайтлардан намойишлар чоғида 164 киши ҳалок бўлгани ҳақидаги маълумотни олиб ташламоқда.
Ҳалок бўлганларнинг умумий сони ҳақидаги маълумот Қозоғистон коронавирусга қарши кураш штабининг расмий Телеграм-канали, шунингдек, Қозоғистон Ахборот ва ижтимоий тараққиёт вазирлиги расмий сайтида 9 январь куни эрталаб эълон қилинганди.
Олдинроқ қурбонлар сони ҳақидаги маълумотни Қозоғистон Соғлиқни сақлаш вазирлиги эълон қилгани ҳақида маҳаллий ва халқаро ОАВ хабар тарқатган, аммо кейинроиқ вазирлик бу маълумотни рад этган.
Хабарда, жумладан, Олмаота шаҳрида 103 киши, жумладан, икки нафар бола, Қизилўрда вилоятида 21 киши, Жамбилда 10 ва Олмаота вилоятларида 10 нафар инсон ҳалок бўлгани айтилган. Қолган 23 нафар қурбон қайси ҳудудларга тўғри келиши ҳақида маълумот йўқ. Шунингдек, гап қурбонларнинг умумий сони ҳақидами ёки фақат намойишчилар ва тинч аҳоли ҳақида боряптими, аниқлик киритилмаган. Аввалроқ куч ишлатар тизимлар ходимлари орасидаги умумий қурбонларга доир маълумот эълон қилинганди.
КХШТ кучлари "вазият тўлиқ барқарорлашгунича" қолади
КХШТга аъзо мамлакатлар томонидан Қозоғистонга йўлланган аскарлар Олмаота ва унинг теварагидаги “стратегик объектлар”ни назоратга олди. Бу ҳақда 9 январь куни Қозоғистондаги КХШТ контингенти қўмондони генерал-полковник Андрей Сердюков маълум қилди.
Россиялик генералга кўра, контингентни жойлаштириш якунига етказилган бўлиб, қўшинлар “мамлакатда вазият тўлиқ барқарорлашгунича” қолади. Контингентнинг умумий сони бўйича расмий маълумот йўқ, турли маълумотларда бир неча минг ҳарбий хизматчи ҳақида сўз боради.
Президент Қасим-Жомарт Тоқаев КХШТга ёрдам сўраб мурожаат қиларкан, қўшинлар мамлакатда қисқа муддатга киритилишини айтган эди. Қозоғистон расмийларига кўра, ҳозирда мамлакатда вазият нормаллашмоқда.
Қозоғистон болалар обмудсмани Аружан Саин Олмаотадаги тартибсизликлар пайтида яна бир бола ўқ тегиб ҳалок бўлганини билдирди
Унга кўра, 7 январь куни кечки соат 7 ларда Олмаотадаги Сейфуллин ва Сатпаев кўчалари чоррахасидан ўтиб бораётган автомашинага ўқ отилган. Оқибатда машина ичидаги 4 ёшли бола ҳалок бўлди ва 9 синфда ўқийдиган ўсмир оғир аҳволда касалхонага ётқизилди.
Омбудсманнинг айтишича, 7 январь куни соат 13.30 да 8 ёшли қизга ўқ тегиб, яраланган. Аввалроқ эса Аружан Саин 11 ёшдаги бола ўқ тегиб, ҳалок бўлгани билдирилган эди.
Қозоқ ҳукумати Олмаотадаги отишмалар пайтида расман 2 бола ҳалок бўлганини, 3 бола яраланганини маълум қилди.