Киев вилоятидаги Ирпень шаҳри орқали эвакуация қилинаётган тинч аҳоли.

Россия Украина шаҳарларини вайрон қилмоқда. Урушнинг ўн иккинчи куни

феврал 27, 2022

Россиянинг Украинага босқини давом этмоқда. БМТга кўра, Россия босқини бошланганидан бери Украинани тарк этганлар сони 1 миллиондан ошган.
БМТга аъзо 193 давлатдан 141 таси Россиянинг Украинага босқини қораланган резолюцияни қўллаб овоз берди. Ўзбекистон овоз беришда қатнашмаган.
Сингапур Россия банкларига қарши санкциялар киритди ва икки томонлама маҳсулотларни экспорт қилишни тақиқлади.
Samsung Россияга маиший техника,телефонлар ва чиплар етказиб беришни тўхтатди.
"Роскомнадзор" Facebook ва Тwitterни блоклади.
АҚШ, ЕИ, Буюк Британия ва бошқа кўплаб мамлакатлар Москвага қарши янги-янги иқтисодий санкцияларни жорий қилмоқда. Европа рус учоқларига осмонини ёпди, Туркия эса Босфор бўғозини Россия ҳарбий кемалари учун ёпиб қўйди.
Германия Европа Иттифоқи санкцияларига тушган асли ўзбекистонлик миллиардер Алишер Усмоновнинг 156 метрли яхтасини ҳибс қилди.
38 давлат Украинадаги эҳтимолий уруш жиноятларини тергов қилишни сўраб Ҳаагадаги Халқаро жиноят судига мурожаат қилган.

1, 2 миллиондан ортиқ фуқаро ўз уйларини тарк этишга мажбур бўлди

Украинанинг Стратегик алоқа ва ахборот хавфсизлиги маркази БМТ маълумотларига таяниб маълум қилишича, Россиянинг Украинага бостириб кириши бошланганидан бери 1, 2 миллиондан ортиқ фуқаро ўз уйларини тарк этишга мажбур бўлган. Қочқинларнинг ярмидан кўпи - 650 мингга яқин киши Полшага, қолганлари Молдова, Словакия ва Руминияга кетган.

Россия Украинада "сукунат режими" эълон қилди

Россия Мудофаа вазирлигининг хабар беришича: 5 март Москва вақти билан эрталаб соат 10 дан бошлаб сукунат режими эълон қилинган ва тинч аҳолининг Мариупол ва Волновахадан чиқиши учун гуманитар йўлаклар очилган. Гуманитар йўлаклар ва чиқиш йўллари Украина томони билан келишилган, дейилади хабарда.

Британияда украин қочқинларини россиялик олигархларнинг уйларига жойлаштириш таклиф қилинди

Британия бош вазири ўринбосари Доминик Рааб агар “ҳуқуқий асос” яратилса, британ ҳукумати россиялик олигархларнинг Лондондаги уйларини мусодара қилиши ва украиналик қочқинларни жойлаштириши мумкинлигини айтди.

Рааб, шунингдек, ҳукумат тез орада олигархларнинг бойликлари ва обрў-эътиборини ҳимоя қилиш учун Британия юридик фирмаларини ёллашини тақиқлаш бўйича таклифлар ҳам киритишини кўшимча қилди.

Раабнинг баёноти Британия россиялик ўзбек аслли миллиардер Алишер Усмонов ва Россиянинг собиқ бош вазир ўринбосари Игор Шуваловга қарши санкциялар киритганидан кейин янграган.

Шувалов ҳам, Усмонов ҳам ўз бойликларини ноқонуний йўл билан орттирганликларини рад этишади.

Зеленский қаерда?

Россия Давлат думаси спикери Вячеслав Володин Украина президенти Владимир Зеленский Украинани тарк этганини иддао қилиб чиқди.

Зеленскийнинг маслаҳатчиси Михаил Подоляк матбуот анжуманида Украина президентининг қаерда эканлиги ҳақидаги саволга жавоб беришдан бош тортди.

"Президентимиз ҳозир дунёда биринчи ўринда. Унинг хавфсизлигига келсак, мен ҳеч нарсани тасдиқламайман ёки инкор этмайман", - деди у.

Украина Олий Радаси Зеленскийнинг Киевда экани ҳақида маълум қилди

Давомини ўқинг