Вазир Шкарлет: Россиянинг Украинага ҳужуми ортидан 200 дан зиёд мактаб вайрон бўлган ёки шикастланган
Россия қўшинларининг бостириб кириши туфайли Украинада 211 та мактаб вайрон бўлган ёки шикастланган, дея билдирди Украина таълим вазири Сергей Шкарлет телемарафон эфирида.
“Бугунги кунда биз вайрон бўлган ёки шикастланган мактаблар сони тобора ортаётганини кузатяпмиз. Шу кунгача бундай мактаблар сони 211 тага етди, уларнинг бир қисми тўла вайрон бўлган, бир қисмига эса шикаст етган”, дея қайд этди вазир.
Россия босқини бошланган пайтда Украинада мактаб ўқувчилари учун икки ҳафталик таътил эълон қилинган, бироқ яқинда ўқиш бошланиши режаланган эди.
Блинкен Вашингтон НАТОнинг Украинага ҳарбий учоқ беришига қарши эмаслигини билдирди
Агар НАТО мамлакатлари Украинага ҳарбий учоқлар тақдим этса, Қўшма Штатлар бунга қарши бўлмайди, дея билдирган АҚШ давлат котиби Энтони Блинкен Face the Nation теледастури ёйинида.
Блинкен Россиянинг Украинага қарши тажовузи “афсуски, яна қандайдир муддат давом этади”, дея қайд этган. АҚШ, “масалан, Польша томонидан Украинага ҳарбий учоқлар берилишига монеълик қиладими?” деган саволга давлат котиби манфий жавоб берган.
“Йўқ, “яшил чироқ” ёқилади. Аслида биз польшалик дўстларимиз билан ҳозирда, ҳақиқатан (Варшава) украиналикларга мазкур ҳарбий учоқларни тақдим этишга қарор қилса, уларни дастаклаш учун нималар қила олишимиз мумкинлиги ҳақида, украиналикларга берилган учоқлар ўрнини тўлдиришда уларга ёрдам бериш учун нималар қила олишимиз мумкинлиги тўғрисида гаплашяпмиз. Биз буни улар билан жуда фаол муҳокама қиляпмиз”, деган Блинкен.
“Украина темир йўллари”: Россия ҳалок бўлган аскарлари жасадини олиб чиқиб кетишдан бош тортди
“Украина темир йўллари” ҳалок бўлган рус аскарлари жасадини ватанига етказиш учун ажратган 20 та вагон-рефирежаторни чақиртириб олди. “Украина темир йўллари” ширкати раҳбари Александр Камишин ўз Telegram-каналида: “Вагонлар белгиланган станцияларда уч кун мобайнида кутиб турди. Бироқ уларга шу кунгача рус ҳарбийларининг жасадлари юкланмади”, деб ёзди.
Унга кўра, Россия ўз аскарларининг жасадларини Украинадан олиб чиқиб кетишдан бош тортган. Александр Камишин Россия жасадларни ватанига қайтариш тўғрисида қарор қабул қилиши билан, вагонлар берилишини таъкидлади.
Россия ҳарбийлари жасадларини олиб чиқиб кетиш учун ажратилган 20 та вагон-реферижатор Фастов, Одесса-Застава, Подольск, Мерефа ва Запорожье темир йўл станцияларига жойлаштирилган эди.
Украина Мудофаа вазирлиги, 6 март ҳолатига кўра, Россиянинг 11 минг аскари ҳалок бўлгани ва яраланганини билдирган. Россия Мудофаа вазирлиги эса 2 март куни Украинада 498 аскари ўлганини, 1597 нафари яраланганини маълум қилган.
Россияда 6 март куни Украинадаги урушга қарши намойишга чиққанлардан камида 700 нафари қўлга олинди
Россиянинг қатор шаҳарларида 6 март куни Украинадаги урушга қарши намойишлар ўтказилди. Мустақил манбалар, жумладан, ОВД-инфонинг хабар беришича, 6 март кунги намойишда қатнашганлардан камида 700 нафари полиция томонидан қўлга олинган.
Намойишлар Хабаровск, Иркутск, Новосибирск, Санкт-Петербург, Екатеринбург, Пермь, Томск шаҳарларида бўлиб ўтди. Кечга яқин Москвада ҳам намойиш ўтказилиши кутилмоқда.
Ижтимоий тармоқларда Москванинг намойиш ўтказиш режалаштирилган Манеж майдонида 20 га яқин полиция автобуслари тургани ва полиция ходимлари навбатчилик қилаётгани айтилмоқда.