ЕИ: Украина иттифоққа киритилиши лозим
Еврокомиссии президенти Урсула фон дер Ляйен Euronews телеканалига берган интервьюсида Украина Европа иттифоқига қўшилиши зарур, деб ҳисоблашини билдирди.
"Украина ЕИга киритиши лозим, бу давлат – биздан биридир ва биз уни Европа оиласида кўришни истаймиз", деди фон дер Ляйен.
Шунингдек, у Украина ҳозирданоқ Европадаги айрим жараёнларда, жумладан иттифоқнинг ички ҳамда ягона бозорида қатнашаётганини таъкидлади.
АҚШ элчихонаси Россиядаги америкаликларни “имкон борида” мамлакатни тарк этишга чақирди
Украинага бостириб кирилгани туфайли Россия учоқлари учун кўплаб мамлакатлар ўз ҳаво ҳудудини ёпгани ортидан АҚШнинг Москвадаги элчихонаси америкаликларни зудлик билан Россияни тарк этишга чақирди.
“Парвозларни бекор қилаётган авиаширкатлар тобора кўпайиб бормоқда. АҚШ фуқаролари ҳозирча имкони бўлган тижорат вариантлари орқали Россиядан чиқиб кетиш ҳақида ўйлаб кўришлари керак”, дейилган элчихона хабарномасида.
Европа Иттифоқига аъзо мамлакатлар ташқи ишлар вазирларининг 27 февралдаги учрашувидан кейин ЕИ душанбадан Россия авиаширкатлари ҳамда бу мамлакатдан келадиган хусусий учоқлар учун ўз ҳаво ҳудудини ёпиши эълон қилинган. Бу қарор Европадаги ва унинг хорижидаги қатор давлатлар Россия учоқлари учун ўз осмонини ёпгани ортидан олинган. Мазкур мамлакатларга нисбатан Москва ҳам жавоб чораларини киритган.
“Аэрофлот” авиаширкати “Европа расмийлари томонидан киритилган ҳаво ҳудуди бўйича чекловлар туфайли” 28 февралдан эътиборан Европа йўналиши бўйлаб барча қатновларни тўхтатади. Бу ҳақда авиаширкат хабарномасига таянган ҳолда ТАСС ва “Интерфакс” агентликлари хабар қилган.
Якшанба куни Европадаги россияликлар Росавиация, Ростуризм ва ташқи ишлар вазирлиги томонидан ватанига қайтарилиши эълон қилинган.
Киев сўрови ортидан Европа Иттифоқи Украинага қирувчи учоқлар етказиб бермоқчи
Европа Иттифоқи Украинага жанговар қирувчи учоқлар йўллайди. Бу қарор, ЕИ бош дипломати Жозеп Боррелга кўра, Россиянинг қуруқлик ва ҳаводан ҳужумга қарши туриш учун украиналикларга ёрдам бериш тўғрисидаги Киев сўрови ортидан қабул қилинган.
ЕИ мулозими қайдича, Брюссель Украинани уруш олиб бориш учун жиддий воситалар билан таъминлашга тайёр.
Боррелга кўра, Москва 24 февралда бошланган ўз босқинидан кейин Украинани дастаклаган мамлакатларга ядровий ҳужум билан очиқ-ойдин таҳдид қилган, бироқ бу таҳдид Европа Иттифоқини Украинани қўллашдан тўхтатолмайди.
Австралия Путин ва россиялик айрим амалдорларга қарши санкциялар жорий этди
Австралия президент Путин, Россия ҳукумати ҳамда Хавфсизлик кенгашининг бир неча аъзосига қарши (улар орасида мудофаа вазири Шойгу, ташқи ишлар вазири Лавров, бош вазир Мишустин, ички ишлар вазири Колокольцев каби мулозимлар бор) якка тартибдаги санкцияларни жорий этди. Уларга Австралия кириш тақиқланади, уларнинг мол-мулклари эса (агар бўлса) музлатилади.
Австралия бош вазири Скотт Моррисон Путиннинг Россия ядровий кучларини “жанговар навбатчиликнинг махсус тартиби”га ўтказишга оид буйруғини қоралаган. Моррисонга кўра, бу Россиянинг Украинага қарши ҳарбий амалиёти режадагидек кетмаётганидан далолат беради.