Путин Халқаро дзюдо федерациясининг фахрий президенти мақомидан маҳрум этилди
Халқаро дзюдо федерацияси (IJF) Россия президенти Владимир Путиндан ташкилотнинг фахрий президенти ваколатлари тўхтатилгани ҳақида маълум қилди.
“Халқаро дзюдо федерацияси жаноб Владимир Путиннинг IJF фахрий президенти ва элчиси ўлароқ мақоми бекор қилинганини эълон қилади”, дейилган федерация хабарномасида.
Путинга мазкур мақом 2008 йилда берилган эди.
IJF мазкур қарорга Россия қўшинлари 24 февраль куни Украина ҳудудида ҳарбий амалиёт бошлагани ортидан келган.
Ғарб мамлакатларидаги россияликлар ватанига учинчи мамлакатлар орқали қайтарилиши мумкин
Европада юрган россиялик туристларни ватанига учинчи мамлакатлар (улар орасида Бирлашган Араб Амирликлари, Миср ва Туркия кабилар бор) орқали амалга оширилажак транзит рейслар билан қайтариш режаланмоқда. Бу ҳақда РИА "Новости" агентлигига Россия туризм индустрияси уюшмаси вице-президенти Дмитрий Горин маълум қилган.
“Авиаалоқа ёпилгани туфайли туроператорлар ҳозирда Ростуризм билан биргаликда Венгриянинг Будапешт шаҳридан 400 нафар турист, Болгариядан 500 нафар турист ва Португалиянинг Мадейрасидан 200 чоғли туристни олиб келиш масаласини ҳал қилмоқда”, деган Горин.
Аввалроқ Еврокомиссия раҳбари Урсула фон дер Ляйен ЕИга аъзо мамлакатларнинг ҳаво ҳудудини Россия учоқлари (шу жумладан хусусий учоқлар) учун ёпиш қарори олинганини маълум қилган эди.
Байден ҳамкор давлатлар раҳбарлари билан Украина бўйича янги йиғилиш ўтказади
АҚШ президенти Жо Байден 28 февраль куни Украина масаласига бағишланган йиғилиш ўтказади. Мазкур тадбир, Оқ уй матбуот хизмати маълумотига кўра, Киев вақти билан соат 18:15 га режаланган.
Йиғилишда Канада, Буюк Британия, Франция, Германия, Италия, Япония, Польша, Руминия лидерлари ҳамда Европа Иттифоқи ва НАТО раҳбарияти қатнашиши кутилмоқда.
ТИВ вакили: Польшага эвакуация қилинган ўзбекистонликларнинг илк гуруҳи 28 февраль куни юртига қайтади
Украинадан Польшага эвакуация қилинган ўзбекистонликларнинг илк гуруҳи юртига душанба куни қайтиши кутилмоқда. Бу ҳақда Ўзбекистон Ташқи ишлар вазирлиги расмий вакили Юсуф Қобилжонов ўз Телеграм-канали орқали маълумот тарқатди.
ТИВ мулозимига кўра, Ўзбекистон фуқароларини Польшадан ватанга қайтариш мақсадида “Uzbekistan Airways” АЖ самолётларининг ўтиши учун ҳаво йўлаги билан таъминлаш масаласи ҳал қилинган.
“Ҳозирча биринчи самолётнинг Ўзбекистонга парвоз қилиши жорий йилнинг 28 февраль кунига режалаштирилмоқда”, дейилган хабарномада.