Киев вилоятидаги Ирпень шаҳри орқали эвакуация қилинаётган тинч аҳоли.

Россия Украина шаҳарларини вайрон қилмоқда. Урушнинг ўн иккинчи куни

феврал 27, 2022

Россиянинг Украинага босқини давом этмоқда. БМТга кўра, Россия босқини бошланганидан бери Украинани тарк этганлар сони 1 миллиондан ошган.
БМТга аъзо 193 давлатдан 141 таси Россиянинг Украинага босқини қораланган резолюцияни қўллаб овоз берди. Ўзбекистон овоз беришда қатнашмаган.
Сингапур Россия банкларига қарши санкциялар киритди ва икки томонлама маҳсулотларни экспорт қилишни тақиқлади.
Samsung Россияга маиший техника,телефонлар ва чиплар етказиб беришни тўхтатди.
"Роскомнадзор" Facebook ва Тwitterни блоклади.
АҚШ, ЕИ, Буюк Британия ва бошқа кўплаб мамлакатлар Москвага қарши янги-янги иқтисодий санкцияларни жорий қилмоқда. Европа рус учоқларига осмонини ёпди, Туркия эса Босфор бўғозини Россия ҳарбий кемалари учун ёпиб қўйди.
Германия Европа Иттифоқи санкцияларига тушган асли ўзбекистонлик миллиардер Алишер Усмоновнинг 156 метрли яхтасини ҳибс қилди.
38 давлат Украинадаги эҳтимолий уруш жиноятларини тергов қилишни сўраб Ҳаагадаги Халқаро жиноят судига мурожаат қилган.

Харьков шаҳарларидан бирининг мэри давлатга ҳиёнатда айбланиб қўлга олинди

Харьков вилояти губернатори Олег Синегубов ҳарбий махсус амалиёт пайтида давлатга ҳиёнатда гумонланган Южний шаҳри мэри, унинг ўринбосари, маҳаллий полиция бошлиғи ва участкавой инспектор қўлга олинганини билдирди. Бу ҳақда Озодлик радиоси рус хизмати ёзди.

“Биз бу ишни, шу кунгача бизда уруш бўлаётганини ва душман билан музокаралар олиб бориш мумкин эмаслигини тушунмаганлар тушиниб олиши учун амалга оширдик”,-деб айтган Синегубов.

Айни пайтда Украина ички ишлар вазири маслаҳатчиси Антон Герашченко Харьков “Град” рекатив қурол тизими орқали ўққа тутилганини билдирди.

“Бунинг оқибатида ўнлаб тинч аҳоли ҳалок бўлди ва юзлаб одам яраланди”,-деди у.

1,5 миллион аҳоли яшайдиган Харьков аёвсиз бомбардимон қилинди

"Инсайдер-Украина" Харьковнинг аёвсиз бомбардимон қилинганига оид яна бир видеони эълон қилди. Билдирилишича, камида 3 киши ҳалок бўлди, 14 киши яраланди.

Қалмиқ Республикаси раҳбари Украинага ҳужум қилган рус қўшини сафида бўлган фуқароси ҳалок бўлганини билдирди

Россия таркибидаги Қалмиқ Республикаси раҳбари Бату Хасиков Украинада ўз фуқроси Константин Манжиев ҳалок бўлганини тан олди. Сержант Манжиев контракт асосида Россия армиясида хизмат қилган.

Бату Хасиков Менжиев “Донбассни ҳимоя қилиш амалиёти пайтида ўз хизмат вазифасини бажараётган пайтда ҳалок бўлди”,-деб билдирди.

27 февраль куни Доғистон раҳбари Сергей Меликов ҳаво десанти қўшинида хизмат ўтаган офицер Нурмагомед Гаджимагомедов ҳалок бўлгани ҳақида билдирган эди. Бу билан Россия Украинада рус ҳарбийси ўлганини биринчи марта тан олганди.

Беларус билан чегарада Россия-Украина музокаралари якунланди

Россия ва Украина делегациялари ўртасидаги қарийюҳб беш соат давом этган музокаралар якунланди. Томонлар “яқин кунларда” янги учрашувга келишиб олдилар.

Беларусда Украина билан музокараларда қатнашаётган Россия делегацияси аъзоси Леонид Слуцкий: “Асосий натижа шундаки, музокаралар бўлиб ўтди ва томонлар бир-бирини эшитди. Яқин бир неча кун ичида бироз олдинга силжиш бўлиши мумкин”, деди.

Россия делегацияси раҳбари Владимир Мединский: "Биз умумий позицияларни башорат қилишимиз мумкин бўлган баъзи фикрларни топдик".

Ҳозир томонлар музокаралар натижаларини муҳокама қилиш учун Россия ва Украинага қайтмоқда.

Давомини ўқинг