Путин келишига тайёргарлик
Шанхай Ҳамкорлик Ташкилотининг 15-16 сентябрь кунлари Самарқанддаги ўтадиган саммитида аъзо давлатлар - Россия, Хитой, Ҳиндистон, Покистон, Қозоғистон, Қирғизистон, Тожикистон ва Ўзбекистон раҳбарлари иштирок этиши кутилади.
Ҳиндистон ва Хитой раҳбарларининг саммитда иштирок этиши тасдиқланган, аммо Путиннинг келиши ҳақида ҳозирча на Кремль ва на ўзбек томони бирон расмий хабар бергани йўқ.
Бироқ сўнгги ҳафталарда президент Мирзиёев ҳамда Тожикистон президенти Имомали Раҳмоннинг Путин билан телефон мулоқотларида Самарқандда ўтадиган ШҲТ саммити кун тартиби муҳокама қилинган.
Маҳаллий фаоллар ва кузатувчилар Самарқанддаги фавқулодда хавфсизлик чораларини Украинадаги уруш бошланган илк ойларда "бункерга яширингани" айтилган ва сўнгги ойларда узоқ хорижий сафарлардан тийилаётган Путиннинг хавфсизлик хавотирлари билан боғлиқ эканини тахмин қилишмоқда.
Бу Россия раҳбарининг Украинага уруш бошланганидан буён постсовет давлатларига учинчи сафари бўлади.
Февраль ойидан сўнг Путин илк бор июнь ойида Тожикистон ва Туркманистонга сафар қилганди.
Самарқанд дайди ит ва уйсизлардан тозаланмоқда
ШҲТ саммити олдидан Самарқанд шаҳри уйсиз одамлар ва дайди итлардан тозаланмоқда.
Маҳаллий фаолнинг Озодликка айтишича, Ветеринария назорати ходимлари ёппасига кўчаларда дайди итларни ушлашга жалб этилган.
"Улар итларни ушлаб, машиналарга босиб, номаълум жойга олиб кетмоқда", - дейди фаол.
Унинг сўзларига кўра, байрамлар арафасида ëки президент иштирок этадиган тадбирлар олдидан шаҳарни дайди ит-мушуклар, мангуст ва каламушлардан тозалаш одатий ҳол.
Самарқанд ветеринария хизмати вакили Озодликка дайди итлар ўлдирилмаётгани, ушланиб, махсус ихтисослашган бошпаналарга олиб борилаётганини айтди.
Саммит сабаб Самарқанд аэропорти 3 кунга ёпилади
"Ўзбекистон ҳаво йўллари" миллий авиакомпанияси йўловчиларни 14-16 сентябрь кунлари Самарқанд халқаро аэропорти ёпилиши ҳақида огоҳлантирди.
AviaAlertsUZ Telegram-канали хабарига кўра, Самарқанд аэропорти 14 сентябрь соат 00:01 дан 17 сентябрь соат 00:01 га қадар бўлган муддатда тижорий мунтазам ва номунтазам йўловчи ҳамда юк рейсларини қабул қилмайди.
ШҲТ саммити ва иккиламчи санкциялар хавфи. Ўзбекистон иқтисодини нима кутмоқда?
ШҲТ саммити олдидан, Тошкентда аъзо давлатлар вазирлари, хавфсизлик хизматлари ҳамда Банклар уюшмаси раҳбарлари учрашди. Хусусан, 23 август куни “Ўзбекистон Республикаси Ташқи иқтисодий фаолият миллий банки” раислигида ШҲТ Банклараро уюшмаси кенгашининг 18- йиғилиши бўлди.
Унда 2 муҳим стратегик ҳужжат – “ШҲТ банклар уюшмасига аъзо давлатларнинг 2022-2027 йилларга мўлжалланган иқтисодий ҳамкорлик бўйича Қўшма ҳаракат режаси" ҳамда аъзо давлатлар "молиявий соҳада биргаликдаги фаолияти ва ҳамкорлигига оид ҳадли тамойиллар" ишлаб чиқилгани айтилди.
ШҲТга аъзо давлатлар: Хитой, Ҳиндистон, Покистон, Қозоғистон, Қирғизистон, Тожикистон, Ўзбекистон ҳамда Россия.
Банклар уюшмасининг йирик аъзолари эса айнан Россия банклари ва уларнинг аксари, Россиянинг Украинага босқини ортидан ҳозир Ғарб санкциялари остида.
Бундай шароитда Ўзбекистон банклари улар билан қандай ҳамкорлик қилиши мумкин? Бу саволга қуйидаги мақолада жавоб изланди:
