Путин, Си Цзиньпин ва бошқалар: Дунё раҳбарлари Самарқандга нима учун йиғилмоқда?
Ижтимоий тармоқларда саммит сабаб йўлнинг узоқлашганига ҳайдовчилар норозилик билдирмоқда
Шанхай ҳамкорлик ташкилоти саммитининг асосий тадбирлари халқаро аҳамиятдаги М-39 автомобил йўлида жойлашган "Silk Road Samarkand" ("Самарқанд Ипак Йўли") Туризм марказида бўлиб ўтиши айтилди.
Шу сабабли 14 сентябрдан 17 сентябрга қадар ҳалқаро аҳамиятдаги йўлнинг ушбу қисмида ҳаракатланиш тўлиқ тақиқланади.
Самарқанд орқали республиканинг бошқа вилоятларига ўтишда одатдагидан кўпроқ вақт ва ёнилғи талаб этадиган айланма йўллардан фойдаланишга мажбур бўлиши ижтимоий тармоқларда ҳайдовчилар ва йўловчиларнинг норозилигига сабаб бўлмоқда.
Ўзбекистон Ички ишлар вазирлиги матбуот котиби Шохруҳ Ғиёсовнинг маълум қилишича, ижтимоий тармоқларда тарқалган видеотасвирларда ШҲТ саммити доирасида Самарқанд шаҳрини айланиб ўтиш йўллари тўғрисидаги маълумот Самарқанд вилоят Ички ишлар бошқармаси томонидан эълон қилинган ва у транспорт ҳаракатини бутунлай тўхтатмайди.
Эрдўғон Самарқандда Путин билан яна Украина масаласида гаплашмоқчи
Туркия президенти Ражаб Тоййиб Эрдўғон 15 та давлат раҳбари, жумладан, россиялик ҳамкасби Путиннинг таклифига биноан ШҲТнинг Самарқандда ўтказиладиган саммитида иштирок этади.
Туркиянинг Hurriyet нашрига кўра Россия етакчиси Путин билан энг муҳим мулоқотни ўтказади.
"Эрдўғон-Путин учрашувининг энг муҳим мавзуси Россия-Украина уруши бўлади. Эрдўғон россиялик ҳамкасбига Туркиянинг воситачилик ташаббуслари доирасида урушни тугатиш ва доимий ўт очишни тўхтатиш учун қўлидан келганини қилишда давом этишини билдиради. Лидерларни Туркияда учраштириш таклифини Путинга такрорлайдиган Эрдўғон, дипломатик ечимга урғу беради. Икки лидер учрашувида Сурияга қарши эҳтимолий ҳарбий операция ҳам кун тартибида бўлиши кутилмоқда" деб ёзади Hurriyet.
Саммит хавфсизлигини таъминлайдиган автомобиллар учун махсус рақам
Самарқандда бошланиш арафасида бўлган Шанхай Ҳамкорлик Ташкилоти Саммити хавфсизлигини таъминлаётган патрул автомобиллар учун махсус давлат рақамлари ҳам жорий этилди.
Бунда одатда Тошкент шаҳри ёки вилоятларга мансублиги кўрсатилиши керак бўлган рақамларнинг ШҲТ ташкилоти герби билан алмаштирилганлигини кузатиш мумкин.
Бор-йўғи икки кун фойдаланишда бўладиган ушбу махсус давлат авторақамларини ишлаб чиқариш учун давлат бюджетидан қанча маблағ сарфланганини аниқлашнинг имкони йўқ.