Россия, Украина жануби-шарқига яна камикадзе дронлар билан зарба берди
Электр станциялари, заводлар ва аҳоли пунктлари нишонга олинди. 4,5 миллионга яқин украиналик, 3 ноябрь оқшом электрдан узилиб қолди.Президент Владимир Зеленский Москвани “энергия терроризми”да айблади.
Днепропетровск вилояти губернатори Валентин Резниченконинг маълум қилишича, Украина ҳарбийлари вилоят жанубидаги Никопол туманида Эроннинг саккизта “Шаҳед-136” камикадзе дронларини уриб туширган.
"Ҳаво ҳужумидан мудофаа тизимимиз шу кеча ажойиб натижа кўрсатди. Душманнинг саккизта камикадзе дронлари уриб туширилди", деб ёзди Резниченко Телеграмдаги саҳифасида. Никопол иккинчи кундирки дронлар ёрдамида нишонга олинмоқда.
Резниченкога кўра, рус қўшинлари Никополдаги тўрт аҳоли пункти – Миривска, Червоногригоривска, Марганецка ва Никополска пунктларини “Град” ракеталари ва артиллериядан ўққа тутган. Натижада газ қувури ва электр тармоғига зарар етказган ва турар-жой бинолари вайрон бўлгани айтилмоқда.
Сўнгги кунларда Россия қўшинлари, Украинанинг пўлат ишлаб чиқариш марказларидан бири бўлмиш Днепропетровск вилоятини мунтазам бомбардимон қилмоқда.
Москва, шу йилнинг 24 февралидан бери давом этаётган бу урушда Украинада тинч аҳоли нишонга олинганини рад этиб келади. Озодлик томонлар бераётган маълумотларни уруш шароитида тезкор текшириш имконига эга эмас.
4,5 миллионга яқин украиналик электрсиз қолди
Украина президенти Владимир Зеленский ўзининг тунги видеомурожаатида, Роcсия ҳужумлари натижасида 4,5 миллионга яқин украиналик 3 ноябрь куни кечқурун электрсиз қолди, деб баёнот берди.
Унинг айтишича, Киев ва яна 10 та вилоят Россия ҳужумларига учраган. Зеленский маҳаллий маъмурларни электр энергиясини тежашга чақириб, турли дўконлар, уларнинг витрина ва кўчалардаги ёзувли белгиларни ёритиш вақти эмаслигини айтган.
Зеленский ўз мурожаатида “айни вақтда минтақамиздаги ягона ифлос нарса бу Россияни бошқараётган ва Украина ҳамда бутун дунёни террорга дучор қилаётган Москвадаги раҳбарларнинг қилаётган ишларидир”, деди, Москванинг Украина “ифлос бомба” - яъни, радиоактив бомбаларни тайёрлаяпти, деган айбловига жавобан:
"Биз Халқаро атом энергияси агентлигини текширув ўтказишга таклиф қилдик. Уларга тегишли обьектларига тўлиқ ҳаракат қилиш учун шароит яратиб бердик. Украинада ҳеч ким радиоактив бомба яратмагани ёки яратмаётгани ҳақида аниқ ва рад этиб бўлмайдиган далиллар мавжуд. Минтақадаги биргина ифлос нарса эса ҳозирда Россияни бошқараётган ҳамда Украина ва бутун дунёни террорга дучор қилаётган Москвадаги корчалонлар ишларидир. Фронтга келсак, йигитлар олға ҳаракат қилмоқда. Буғдой масаласига келсак, кемалар йўлда. Босқинчиларга келсак, улар ҳам тез орада кемаларга эргашади!"
АҚШ: Ядро қуроли ҳамда ракетага қарши мудофаа қобилиятини оширамиз
Украина қўшинлари жанубдаги стратегик аҳамиятга эга Херсон шаҳрини Россиядан қайтариб олишга қодир, дея таъкидлади АҚШ расмийси.
“Энг муҳими, украиналикларда буни уддалай олишларига ишонч бор. Биз уларнинг ўз ҳудудларини қайтариб олиш учун анча изчил ҳамда самарали ҳаракат қила олишларини кўряпмиз”, деди АҚШ мудофаа вазири Ллойд Остин.
Остин, бу Россия учун катта мағлубият бўлиши мумкин, деб қўшимча қилди. Бироқ Украина расмийлари, Россиянинг Херсондан қўшинларини олиб чиқиб кетиши - қурилаётган бир тузоқ аломати бўлиши мумкин, деган хавотирда.
Шунингдек АҚШ мулозими, дунёда тобора ядровий таҳдид ортаётгани, иттифоқчиси Жанубий Корея билан бугунги вазиятни муҳокама қилганини ҳам билдирди:
“Жанубий Корея мудофаа вазири Ли билан бугун ажойиб мулоқот олиб бордик. Биз КХДРнинг давомли провокациялари ва беқарорлик келтириб чиқарувчи ҳаракатлари борасида суҳбатлашдик. Ҳозирги кескин даврда ҳамкорлигимиз янада мустаҳкам бўлади. Қўшма Штатлар Жанубий Корея республикаси мудофаасини таъминлаш саъй-ҳарактларига тўлалигича содиқ қолади. Бизнинг кенгайтирилган тийиб туриш ҳаракатларимиз қатъий, ва у ядро қуроли ҳамда ракетага қарши мудофаа қобилиятини оширишни кўзда тутади».
Донецкда кучли ёмғир ҳаракатни оғирлаштирди
Украиналик ҳарбийлар Харьковдан туриб, Россиянинг бир қанча позицияларига ракета зарбалари берди. Сўнгги кунларда Харьков Россиянинг тинимсиз ракета ва дрон ҳужумларига учраб, инфратузилма обектлари вайрон бўлди ва электр тармоғига зарар етди.
Кучли ёмғир Донецк вилоятидаги асосий йўлларни ювиб кетди. Бу ўз навбатида ўқ-дори ва озиқ-овқат етказиб беришни қийинлаштиради. Ҳозирда йўлдан фақатгина юк машиналари ва махсус транспорт машиналари юра олиши мумкин.
Украина қўшинлари айни пайтда душманни ўзиюрар 2С3 “Акация” гаубицаларидан ўққа тутмоқда. Ноқулай об-ҳаво сабабли дронлар ёрдамида ҳужум қилиш имконсиз. Шу сабабли Украин ҳарбийлари асосан белгиланган нишонларни- рус ҳарбий техникалари, омборларини нишонга олаётгани хабар қилинмоқда.