Ишғол этилган Донецк ҳудуди 7 ноябрга ўтар кечаси ўққа тутилди
Россия томонидан ишғол қилинган Донецк ҳудудида, маҳаллий телеграм-каналлар хабарига кўра, 7 ноябрга ўтар кечаси бир неча портлаш содир бўлган.
Қайд этилишича, вилоят маъмурияти биноси томонидан портлаш товушлари эшитилган. Яна бир снаряд темирйўл маъмурияти биносига теккан.
Ҳужум чоғида биноларга шикаст етган, ойналар синиб тушган, темирйўл маъмурияти биносида ёнғин чиққан. Тезкор хизматлар маълумотига кўра, ҳужум чоғида ҳеч ким қурбон бўлган эмас.
Киевлик мулозимлар пойтахтликларнинг бошқа жойларга кўчирилиши мумкинлигини истисно қилишмаяпти
Электр тўлиқ ўчириб қўйилган тақдирда Киевдан турғунларнинг ҳаммаси эвакуация қилиниши мумкин. Бу ҳақда The New York Times нашри Киев муниципал хавфсизлик департаменти раҳбари Роман Ткачук сўзларига таянган ҳолда хабар қилди.
Мулозимга кўра, Украина пойтахти электр таъминотидан тўлиқ узилганда шаҳарликлар сувсиз ва канализациясиз ҳам қолишлари мумкин.
5 ноябрь куни Киев мэри Виталий Кличко шаҳарликларни электр, сув ва иссиқлик таъминотида муаммоси бўлмаган қариндошлариникига кўчиб ўтишга чақирган.
Қозонда урушга сафарбар этилганлар полигондаги ёмон шароитга норозилик билдирди
Қозонда урушга сафарбар қилинган ўнлаб одам полигондаги ёмон шароит туфайли норозилик билдиришди. Сота ва АСТРА телеграм канали томонидан тартибсизлик акс этган бир қанча видеолар чоп этилган.
“Сота” хабарига кўра, сафарбар қилинганлар занглаган автоматлардан, сув, озиқ-овқат ва иситиш учун ўтин етишмаслигидан норози. Видеода намойишчиларнинг сафарбар қилинганларнинг ювинишлари учун шароит яратиш ва кир ювиш машиналари ўрнатилишини талаб қилаётгани эшитилади.
Полковник, уни уят сўз билан чақиришганидан сўнг намойишчилар олдига чиқди. Улар ундан "бу шароитни изоҳлаб беришни" талаб қилишди, лекин полковник намойишчиларнинг ҳуштак ва ҳақоратлари остида қочиб кетишга мажбур бўлди.
Украинадаги урушга сафарбар қилинганларнинг таъминот муаммосидан шикоят қилишлари биринчи марта эмас. Сўнгги бир ой ичида тармоқда ўнлаб шунга ўхшаш видеолар пайдо бўлди. Мисол учун, Белгород вилоятида сафарбар қилинганлар ҳам ўтин етишмаслигидан шикоят қилишди.
21 сентябрда сафарбарлик эълон қилингандан кейин чақирилганлар урушга ўз ҳисобидан тайёрланишга мажбур бўлгани ҳақида турли вилоятлардан хабарлар кела бошлади.
Чунки, керакли жиҳозлар етишмайди, ҳарбий хизматга чақирилганларга ўзлари ҳимоя воситалари ва дори қути сотиб олишни маслаҳат берганлар. Айрим ҳолларда уларнинг қариндошлари бунинг учун кредит ва микрокредит олишади.
Воронежда ҳарбийга чақирилганларнинг яқинлари губернатордан фарзанд ва эрларини қутқаришни илтимос қилди
Одамлар шаҳар прокуратураси биноси олдига тўпланишди. Айтилишича, Воронеждан сафарбар қилинганларни қўмондонлик Луганск вилоятига йўллаган. “Вёрстка” нашри ёйинлаган видеомурожаатда воронежликлар сафарбар қилинганлар бўлинмасини командирлар фронт чизиғида ташлаб кетганини ва улар тез орада Украина армиясининг ўқ ёмғири остида қолганини билдиришган.
“Биз губернатордан ва юқори идоралардан ҳарбий қисм билан бирга Валуйка томонга жўнатилган ўз мобилизантларимизга ёрдам беришни илтимос қиламиз. Украинага етиб боришлари билан уларни фронтнинг олдинги чизиғига ташлаганлар. Командирлар “ҳадемай қайтамиз, нарса-буюмларингизни ҳам келтирамиз” деган баҳона билан жанг майдонидан қочишган. Аммо улар қайтмаганлар, 40 дақиқадан сўнг бўлинмани гранатомёт, миномёт ва бошқа қуроллардан ўққа тута бошлашган. Сафарбар қилинганлар айтишича, жанг уч кун давом этган. Аскарларимиз имкон қадар тирик қолишга ҳаракат қилганлар... Улар уйқусиз, овқатсиз қолган бўлишса-да, уч кун мудофаани ушлаганлар ва ўз командирларидан фарқли ўлароқ жангдан қочиб кетмаганлар”, дейилади мурожаатда.
Сафарбар қилинган аскарлардан бири “Вёрстка” нашри билан суҳбатда ўз ҳисобича ўша жангда 500 нафаргача одам ўлганини айтган.
“Бизни тутдай тўкишди. Бу тўполонлар бошланар маҳалда офицерлар қочиб кетишди. Душман артиллерияси бир оз тинган пайтларда биз окоп қазиб, яшириниб олишга уриндик, лекин улар дронлар орқали жойимизни аниқлаб, қайта-қайта ўққа тутишди”, деган у.