Украина Херсонда босиб олинган 88та ҳудудни қайтарди
Босиб олинган Херсон шаҳрининг Россия томонидан тайинланган расмийлари яна тинч аҳолини эвакуация қилишга чақирдилар. Украина мазкур стратегик порт шаҳарни қайтариб олиш учун йирик контрҳужум ҳозирлаётгани айтилмоқда.
"2022 йилнинг 7 ноябрь куни Херсоннинг ўнг қирғоғидан чап қирғоққа кетишга тайёр бўлган одамларни олиб кета оладиган сўнгги кема жўнаб кетди. Ҳозир эвакуация давом этмоқда, аммо энди чап қирғоққа бошқа транспортда етиб олишингиз мумкин. Бугун биз чап қирғоқдан ўнг қирғоққа элтувчи йўлни ёпиб қўйдик ва сизга шаҳарга қайтишни тавсия қилмаймиз", деди Херсон вилоятининг кремлпараст маъмурияти мулозими Кирилл Стремоусов.
Херсон Днепр дарёсининг ғарбий соҳилида жойлашган.
Октябрь ойида Россия эвакуацияни бошлаганидан кейин минглаб одам шаҳарни тарк этган.
Украина ўзининг қарши ҳужуми давомида вилоятдаги 88 га яқин аҳоли пункти, яъни Россия кучлари томонидан эгаллаб олинган ҳудуднинг тахминан 13 фоизини қайта қўлга олди.
"Донецк - босқинчиларнинг энг телбаларча ҳаракат қилаётган минтақасидир"
7 ноябрь куни Украина президенти Владимир Зеленский шарқдаги Донецк вилояти можаронинг «маркази» бўлиб қолаётганини айтди. Унинг сўзларига кўра, минтақада ҳар куни юзлаб россиялик нобуд бўлмоқда:
"Донецк босқинчиларнинг энг телбаларча ҳаракат қилаётган минтақасига айланди. Ҳар куни юзлаб одам ҳалок бўляпти. Кунига юзлаб одамни йўқотишмоқда. Украина позициялари олдидаги ҳудуд босқинчиларнинг жасадларига тўлиб кетган".
Зеленский душанба куни Украина бўйлаб 50 дан ортиқ аҳоли пункти, жумладан, мамлакат шарқидаги Запорожье ва Херсон вилоятидаги аҳоли пунктларига ракеталар билан зарба берилганини айтди.
Зеленский, шунингдек, Украина қўшинлари ҳали ҳам «фаол мудофаа» ҳолатида экани, бироқ аста-секин рус қўшинларини ортга чекинтираётганини қўшимча қилди.
Россия ҳарбийлари Запорожье ва Днепропетровск вилоятларидаги аҳоли пунктларига зарба беришди
Россия қўшинлари 8 ноябрга ўтар кечаси Запорожье ва Днепропетровск вилоятларидаги аҳоли пунктларига яна ракета зарбалари беришган. Бу ҳақда минтақа маъмуриятлари маълумот тарқатишди.
Мулозимлар қайдича, зарбалар натижасида Днепропетровск вилоятига қарашли Никополь шаҳридаги биноларга жиддий шикаст етган. Ҳужум оқибатида қанча киши жабрланганига оид маълумот берилган эмас.
Зеленский Россия ҳарбийлар Украинага ҳужумда Эрон қуролларидан фаол фойдаланаётганини урғулади
Украина президенти Владимир Зеленский 6 ноябрь оқшомидаги мурожаатида Эрон Россияга қурол-аслаҳа етказиб бераётганини яна бир марта қайд этди.
Ўз сўзида Зеленский Эрон режимини Россияга қурол етказиб беришни тўхтатишга мажбур қилиш учун Европа комиссияси раҳбари Урсула фон дер Ляйен билан расмий Теҳронга босимни кучайтириш масаласини муҳокама қилганини билдирди. Унга кўра, агар Эрон Россияга бу қуролларни етказиб бермаганида, уруш тезроқ тугаган ва озиқ-овқат инқирози ҳам тезроқ битган бўларди.
Украина президенти Россия қўшинлари сўнгги кунларда яна Эрон дронларини ишга солишганига эътибор қаратди. Улардан бир қисми уриб туширилган, бироқ айримлари нишонга бориб теккан.
Зеленский яқин орада Эрон ракеталари билан инфратузилма объектларига зарбалар берилиши мумкинлигини, Украина эса жавоб чораларига ҳозирланаётганини қўшимча қилган.