Зеленский: Россияга бир қарич ҳам еримизни бермаймиз
Украина президенти Владимир Зеленский Россия Донецкда олдинга силжишни истаётгани, бироқ Украина қўшинлари бир қарич ерни ҳам бермаслигини айтди:
«Аввалгидек Донецк вилоятида вазият айниқса оғир. Босқинчиларнинг фаоллиги ўта юқори даражада қолмоқда – ҳар куни ўнлаб ҳужум уюштириляпти. Улар фавқулодда катта йўқотишларга дучор бўлишмоқда. Аммо Донецк вилоятининг маъмурий чегараси томон олдинга силжиш ҳақида уларга берилган буйруқ ўзгаришсиз қолмоқда. Лекин биз еримизнинг бир сантиметрини ҳам бермаймиз. Донбассда уруш чизиғини ушлаб турган барча қаҳрамонларимизга раҳмат айтаман».
Зеленский, шунингдек, сешанба куни 14 та вилоятда ҳамда Киев шаҳрида 4 миллионга яқин одам электр энергиясиз қолганини айтди, аммо у ерларда фавқулодда вазият эмас, балки барқарорлик вазияти ҳукм сураётганини қўшимча қилди.
Айни дамда Донецк вилоятида жойлашган Бахмут, Соледар ва Авдеевка шаҳарларида шиддатли жанглар давом этмоқда.
Фронтдан олинган хабарлар
Россия қўшинлари Днепр шаҳрига камикадзе дронлари билан ҳужум қилди. Оқибатда логистика корхонаси зарар кўрган, у ерда катта ёнғин бўлган. Тўрт киши жабрланган. Бу ҳақда Днепропетровск вилояти ҳарбий маъмурияти раҳбари Валентин Резниченко маълум қилди.
Шунингдек, Резниченкога кўра, Россия “Град” реактив қуроллари ва оғир тўплардан Никополь туманини ўққа тутган. Туманнинг Миров ҳамда Марганец громадалари талафот кўргани айтилмоқда. Аммо аҳоли орасида жабрланганлар йўқ.
Украина Қуролли кучлари Бош штабига кўра, ўтган сутка давомида Россия армияси Украинага етти ракета отган ва 32 та авиазарба йўллаган, шунингдек реактив ялпи ўт очиш қуроллари билан 70 мартадан ортиқ ўққа тутган.
Украин ҳарбийлари айтишича, Россия ҳозир Донецк вилоятида уч йўналишда – Бахмут, Авдеевка ва Новопавловскда ҳужум қилмоқда.
ISW: Путин - Рамзан Қодиров ва Евгений Пригожинга қарамдир
Американинг Урушни ўрганиш институти (ISW) экспертлари фикрича, Россия президенти Владимир Путин Чеченистон раҳбари Рамзан Қодиров ва “Вагнер” хусусий ҳарбий ширкати асосчиси Евгений Пригожинга қарамдир.
Бу – Россия армияси Украинада жанг олиб бориш салоҳиятига эга эмаслиги ҳамда вазият “вагнер”чилар ва қодировчиларга боғлиқ бўлиб қолаётгани билан изоҳланади.
Бироқ бу қарамлик Путин учун ҳалокатли деб баҳоланмоқда. Негаки, Пригожин аллақачон жамоатчилик орасида ҳокимиятга келиши мумкинлиги ҳақида тасаввур уйғотиб улгурган.
Бундай муҳокамалар эса Путинни ўн йиллар давомида Россиянинг ягона етакчиси сифатида тамсил этиш уринишларини чиппакка чиқаради.
Шимолий Корея: Россияга қурол бермаганмиз
Шимолий Корея Россия билан ҳарбий келишувга эга эмаслигини ва буни режалаштирмаганини маълум қилди, дея хабар берди мамлакат давлат матбуоти.
Ўтган ҳафта Оқ уй Миллий хавфсизлик матбуот котиби Жон Кирби Шимолий Корея Россияга яширинча артиллерия ўқ-дорилари етказиб бераётгани тўғрисида маълумот борлигини билдирган эди.
Кирби Шимолий Корея ҳарбий жўнатмаларни Яқин Шарқ ва Шимолий Африка мамлакатлари орқали ўтказишга уринаётганини, Вашингтон мазкур вазиятни диққат билан назорат қилаётганини айтган.
Шимолий Корея мудофаа вазирлиги расмийси бу иддаоларни миш-миш деб атади ҳамда Пхенян Россия билан ўртада ҳеч қачон “ҳарбий келишув” бўлмагани ва “келажакда ҳам бундай режа йўқлигини” таъкидлади.