Шон Пенн “Оскар” ҳайкалчасини Зеленскийга берди
Украинадаги урушни танқид қилгани учун Россия томонидан санкцияга учраган Голливуд актёри ва режиссёри Шон Пенн Киевга ташриф буюриб, ўзининг “Оскар” мукофоти учун олган ҳайкалчасини Владимир Зеленскийга тақдим қилди.
Зеленский "бу катта шараф, лекин у фақат ғалаба қозонмагунимизча менда туради" деди.
Зеленский Украинада ҳужжатли фильм суратга олаётган Шон Пеннни муносабатларни мустаҳкамлаш, Украина ҳудудий яхлитлигини қўллаб-қувватлаш ва мамлакатни оммалаштиришга қўшган ҳиссаси учун “Буюк хизматлари учун” ордени билан тақдирлади.
Қримдаги ўзбек талабалари ўқишини Ўзбекистонга кўчирадиган бўлди
Россия томонидан 2014 йилда аннексия қилинган Қрим ва Севастополдаги университетларда таҳсил олаётган ўзбекистонлик талабаларнинг ўқишини Ўзбекистонга кўчиришга истисно тариқасида рухсат берилди.
8 ноябрь куни ижтимоий тармоқларда Қрим федерал университетининг тиббиёт академиясида ўқиётган ўзбек талабалар президент Шавкат Мирзиёевга мурожаат билан чиққан эди.
1 ноябрь куни Россиянинг Украина билан чегарадош Курск, Брянск, Белгород, Воронеж, Ростов ва Краснодар шаҳарларида ўқиётган ўзбекистонлик талабаларга ҳам таҳсилни Ўзбекистондаги давлат олийгоҳларида давом эттиришга истисно тариқасида рухсат берилганди.
USAID украиналикларга $25 млн беряпти
USAID Украинага қишда муҳтож аҳолини қўллаб-қувватлаш учун 25 миллион доллар ажратади. Бу ҳақда АҚШнинг БМТдаги доимий вакили Линда Томас-Гринфилд Киевга ташрифи чоғида маълум қилди:
"Россия Украинанинг энэргетика инфратузилмасига ҳужум қилишда давом этмоқда, аммо биз Россиянинг шафқатсиз, ноқонуний ва ғайриинсоний уруши туфайли украиналикларнинг совқотиши ёки оч қолишига йўл қўймаймиз".
Зеленский АҚШ Конгрессидаги иккала партия ҳам Россияга қарши урушда Украинани қўллаб-қувватлагани учун миннатдорлик билдирди.
Шойгу рус ҳарбийларини медаллар билан тақдирлади
Россия Мудофаа вазирлиги Сергей Шойгунинг Украинадаги махсус ҳарбий операцияда иштирок этаётган рус қўшинлари қўмондонлик пунктини кўздан кечираётгани акс этган видеони эълон қилди.
Видеолавҳада Шойгунинг Россиянинг Украинадаги кучлари қўмондони Сергей Суровикин ва бошқа ҳарбий амалдорлар билан гаплашаётгани, ҳамда ҳарбий хизматчиларни турли даражадаги медаллар билан тақдирлаётгани тасвирланган.
Шойгунинг ташрифи охирги кунларда Россия қўшинлари Украинада оғир йўқотишларга учраганлиги ҳақидаги хабарлар фонида амалга ошди.
Душанба куни Россия мудофаа вазирлиги Украина шарқида амалга оширилган ҳужумда кўплаб техникаси ва аскарларидан айрилгани ҳақидаги даъволарни рад этди. Бу Россиянинг камдан-кам ҳаракатларидан бўлди. Одатда Кремль йўқотишлари борасидаги даъволарга изоҳ бермасдан келган.