Россиянинг Украинадаги таниқли мулозими Стремоусов автоҳалокатда ҳалок бўлди
Россиянинг Украинадаги энг таниқли амалдорларидан бири Кирилл Стремоусов бугун автоҳалокатда ҳалок бўлди.
Кирилл Стремоусов Херсон губернатори ўринбосари лавозимида ишлаб келган. Reuters хабарига кўра, унинг ўлимини Россия томонидан қўйилган губернатор вазифасини вақтинча бажарувчи Владимир Cальдо тасдиқлаган.
"Кирилл Стремоусов вафот этганини айтиш мен учун жуда оғир. У Херсон вилояти ҳудудида машинада кетаётиб автоҳалокатга учради ва вафот этди".
Стремоусов урушдан олдин блогер ва маҳаллий сиёсатчилардан бири бўлган. Уруш бошлангач, у Херсонни ноқонуний босиб олиш, уни куч билан эгаллашни тарғиб қилган асосий шахслардан бирига айланган. Кейинчалик у Москва томонидан Херсон вилоят маъмурияти раҳбарининг ўринбосари этиб тайинланган.
У ижтимоий тармоқларда Кремлни ёқловчи баёнотлар тарқатгани ортидан танилган. Ўлимидан бир неча соат олдин у Россия ҳарбийлари жанубдаги вазиятни “тўлиқ назоратга олганини” айтган.
Украинада у каллоборант ёки давлатга хиёнатда айбланади.
Politico: Зеленский Россия билан сулҳга рози бўлиши мумкин
Politico нашри муаллифлари фикрича, Украина президенти Владимир Зеленский АҚШ расмийлари билан музокаралардан сўнг Россия билан сулҳ тузиш истиқболларига доир аввалги муносабатини бир оз юмшатган. Зеленский кеча Россия билан сулҳ тузишнинг асосий шартларини санаб ўтди, булар: Украинанинг ҳудудий яхлитлиги тикланиши, БМТ низомига ҳурмат, уруш давомида етказилган зарар қийматини тўлаш, жиноятларнинг барча айбдорларини жазолаш ҳамда уруш такрорланмаслигига кафолат бериш.
Айни чоғда Зеленский яна бир бандни – Владимир Путин иқтидордан кетишини тилга олмади. “АҚШ маъмурияти юқори мартабали мулозимига кўра, Оқ уй Зеленский ва унинг маслаҳатчиларидан айнан ўз позицияларини ўзгартиришни илтимос қилмаган, балки Киевдан урушни оқилона шартларда якунлаш истагини намойиш этиши лозимлигини сўраган”, деб ёзади Politico.
АҚШ яна бир бор Пхенянни Россияга қурол берганликда айблади
Сешанба куни Пентагон матбуот котиби Пат Райдер Шимолий Корея Москвага Украина билан можарода ёрдам бериш учун «Россияни яширинча катта миқдордаги артиллерия ўқлари билан таъминлаётгани» ҳақида яна бир бор гапирди:
«Миллий хавфсизлик кенгаши айтганига ҳеч қандай қўшимча қила олмаслигимни айтаман. Бизда мавжуд бўлган маълумотларга кўра, КХДР Россияни яширин равишда катта миқдордаги артиллерия ўқлари билан таъминламоқда. Бу вазиятни кузатишда давом этамиз».
Ўтган ҳафтада Миллий хавфсизлик кенгаши вакили Жон Кирби Шимолий Корея Россияга жўнатаётган ўқ-дориларни худди бошқа мамлакатларга юборилаётгандек қилиб кўрсатишга уринаётганини айтган эди.
Сешанба куни Шимолий Корея Россия билан ҳарбий келишувга эга эмаслигини ва буни режалаштирмаганини маълум қилди, дея хабар берди мамлакат давлат матбуоти.
Шимолий Корея мудофаа вазирлиги расмийси бу иддаоларни миш-миш деб атади ҳамда Пхенян Россия билан ўртада ҳеч қачон “ҳарбий келишув” бўлмагани ва “келажакда ҳам бундай режа йўқлигини” таъкидлади.
Ислом Каримов: Украиналиклар тезроқ дориломон кунларга етишсин!
- Сизларга фақат яхшилик тилайман, мана шу қийинчилик даври тезроқ тугашини тилайман. Тугаши керак, чунки одамлар чарчашган.
Ўзбекистоннинг илк президенти, марҳум Ислом Каримов бу гапни киевликларга қарата 24 йил аввал айтган. Лекин у худди Украинадаги ҳозирги вазиятни назарда тутгандек тассурот қолдиради.
Ислом Каримов фонди эълон қилган ушбу видео 1998 йилнинг февралида Киевда тасвирга олингани айтилган. Афтидан Киев кўчаларидан бирида оддий одамлар билан ўтган ушбу учрашувда Ислом Каримов украиналикларга муҳаббати баландлиги айтиб, уларни Тошкентга меҳмонга таклиф қилади:
- Барчангизни юртимизга таклиф қиламан. Шуни билишингизни истардимки, сизни кўришдан ҳамиша хурсандмиз, сизнинг ҳаётингиз яхши бўлса, мамнун бўлсангиз – биз ҳам мамнунмиз. Тилагим шуки, киевликлар ва умуман барча украиналиклар тезроқ дориломон кунларга етишсин!