Пентагон: Россия Украинада юз минг аскарини йўқотди
Россия Украинада юз минг аскарини йўқотди, деб билдирди АҚШ штабларининг бирлашган қўмитаси раҳбари Марк Милли. Бу сўнгги 9 ой ичида Россия талофатларининг энг юқори даражадаги баҳоланишидир.
Миллига кўра, юз минг аскар дейилганда ҳалок бўлганларни ва яраланганларни тушуниш лозим. Милли Украина томони ҳам деярли шунга яқин даражада талафот кўрганини айтди.
Украина армияси бош штаби урушнинг 9 ойи давомида 77 минг рус солдати ҳалок бўлганини билдирган. 21 сентябрь куни Россия Мудофаа вазирлиги Украинада 5937 рус аскари ўлганини маълум қилган.
Sky News: Россия Эронга махфий равишда Украинада қўлга туширган ғарб ракета комплексларини берган
Россия махфий равишда Ил-76 ҳарбий транспорт самолёти билан Эронга Украинада қўлга туширилган ғарб қуролларнинг намуналарини жўнатган, деб хабар берди Британиянинг Sky News телеканали аноним манбаларга таянган ҳолда.
Манбанинг айтишича, 20 август куни эрталаб Москвадан Техронга бортида 140 миллион евро нақд пул, Британиянинг NLAW ракета комплекси, АҚШнинг “Жавелин” ва “Стингер” тизим юкланган самолёт учган. Телеканал манбаси, мазкур намуналар асосида Эрон ғарб технологияларидан нусха олиши мумкинлигини билдирган.
Бунга жавобан Эрон Россияга 160 дан ортиқ дронларни, жумладан, “Шаҳед” камикадзе дронларини юборган, деб иддао қилди манба. Унга кўра, яқинда Москва ва Теҳрон ўртасида яна 200 миллион евролик дрон сотиб олиш бўйича келишувга эришилган.
Мазкур маълумот юзасидан телеканал Эрон ва Россия ҳукуматига сўров жўнатди. Ҳозирча ҳукуматлар бу сўровга жавоб қайтарган эмас.
9 ноябрда Теҳронда Россия хавфсизлик кенгаши котиби Николай Патрушев Эрон президенти Иброҳим Раисий ва миллий хавфсизлик олий кенгаши котиби Али Шамхоний билан музокралар ўтказгани хабар қилинди. Унда Украинадаги вазият ва “ички ишларга ғарбнинг аралашувига қарши курашни кучайтириш” масалалари муҳокама қилинган.
Россия ҳукумати Украинадаги жангларда Эрон дронларидан фойдаланаётганини рад этган. Бироқ жангларда Эроннинг “Геран-2” дронларига ўхшайдиган рус дронлари қўлланилган. Бундан ташқари Қора денгизда Эронда ишлаб чиқарилган “Мўхожер-6” дрони уриб туширилган.
5 ноябрь куни Эрон Ташқи ишлар вазирлиги Россияга дронлар етказиб берганини тан олди. Баёнотда Теҳрон бу ишни Россия Украинага уруш очмасидан аввалроқ амалга оширгани таъкидланади. Бу баёнотдан сўнг Украина президенти Владимир Зеленский Эронни ёлғончиликда айблади. Унга кўра, украин ҳарбийлари ҳар куни ўнлаб Эрон дронларини уруиб туширмоқда ва Эрон инструкторлари Россия ҳарбийларини дронларни бошқаришга ўргатган.
Россия армияси Қрим ва Херсон вилояти чегарасида окоп қазишга киришди
Россия армияси аннексия қилинган Қримнинг шимолий қисмида окоп қазишга киришди, деб хабар бермоқда ОАВ сунъий йўлдошдан олинган суратларга таянган ҳолда.
Янги мудофаа истеҳкомлари, жумладан, Қрим ва Херсон вилояти ўртасидаги “Жонқўй” назорат-ўтказиш пункти атрофида ҳамда Армянск шаҳрия яқинида пайдо бўлган.
Бундан ташқари окоплар Херсон вилоятининг Геническ шаҳри яқинидаги Новотроицкое қишлоғида ҳам қазилмоқда.
9 ноябрь куни Россия қўшинлари қўмондони, армия генерали Сергей Суровикин Херсон вилоятидаги қўшинларни Днепрнинг ўнг соҳилига олиб чиқишни таклиф қилган. Мудофаа вазири Сергей Шойгу бу таклифга рози бўлиб, рус қўшинларини Днепр дарёсининг ўнг соҳилига олиб чиқишни бошлаш тўғрисида буйруқ берган. Бу эса Россия қўшини Херсонни ташлаб чиқишга мажбур бўлганини англатади.
Айни пайтда Украина президенти офиси маслаҳатчиси Михаил Подоляк ҳозирча Днепрнинг ўнг қирғоғи, яъни Херсондан рус армиясининг олиб чиқилгани кузатилмаётгани тўғрисида билдирди.
Херсон Россия армияси томонидан март ойи бошларида босиб олинган эди. Бу Россия босқини бошланган февраль ойидан бери рус армияси томонидан эгалланган ягона вилоят марказидир. Сентябрнинг охирларида Херсонда вилоятни Россия таркибига қўшиб олиш бўйича “референдум” деб аталаётган сохта тадбир ўтказилди. Октябрь ойида Путин Херсон аннексиясини эълон қилди. Россия армияси Днепрнинг чап қироғоғига чекинганидан сўнг Херсон вилояти ҳудудининг деярли ярми яна Украина назоратига ўтади.
Рус қўшинлари Херсонни ташлаб чиқмоқда
9 ноябрь куни Россия мудофаа вазири Сергей Шойгу рус қўшинларини Днепр дарёсининг ўнг соҳилига олиб чиқишни бошлаш тўғрисида буйруқ берди.
"Биз учун россиялик ҳарбийларнинг ҳаёти ва соғлиғи биринчи ўринда туради. Қўшинларни олиб чиқишга киришинг", деди Шойгу.
Россия қўшинлари қўмондони, армия генерали Сергей Суровикин Херсон вилоятидаги қўшинларни Днепрнинг ўнг соҳилига олиб чиқишни таклиф қилган.
Россия Украина қўшинлари шаҳарга ҳужум қилишлари мумкинлиги иддаоси билан вилоят аҳолисини эвакуация қилган.
Суровикинга кўра, 115 минг херсонлик эвакуация қилинган.
Ўтган ой президент Зеленский Россия армияси Херсондаги Каховка ГЭСини миналаганини иддао қилганди.
Айни пайтда Суровикин худди шу иддаони Украинага қарши ишлатган. ISW экспертлари буни Россия “ўзга байроқ остида” амалиёт ўтказишга ва эҳтимолий фожиа учун жавобгарликни Украинага тўнкашга ҳозирланаётгани белгиси, дея баҳолашган.