Литва президенти: НАТО Польша-Украина чегарасида ҳаво мудофаасини кучайтириши керак!
Литва президенти Гитанас Науседа 16 ноябр Польшада икки кишининг ўлимига сабаб бўлган ракета зарбасидан сўнг, НАТО Польша-Украина чегарасида ва иттифоқнинг қолган шарқий қанотида зудлик билан қўшимча ҳаво мудофаасини жойлаштириши кераклигини таъкидлади.
“Литва Польша-Украина чегарасида ҳаво ҳужумидан мудофаа воситаларини жойлаштиришни фаол қўллаб-қувватлайди”, деди Науседа журналистларга.
“Умид қиламанки, келаси йили Вильнюсда бўлиб ўтадиган НАТО саммитига қадар биз муваффақиятга эришамиз, чунки вазият бу тўғри қарор эканини ва тезкорлик билан амалга оширилиши кераклигини тақазо қилади”.
Германия канцлери Олаф Шольц Польшадаги портлаш билан боғлиқ вазиятни диққат билан ўрганиш зарурлигини таъкидлади.
"Бир неча соат олдин мен президент Дуда билан гаплашдим ва унга ва Польша фуқароларига ҳамдардлигимни, шунингдек, мамлакатимиз фуқароларининг ҳамдардлигини билдирдим. Бу даҳшатли воқеа ва энди бу қандай содир бўлганини диққат билан аниқлаш керак”.
Шольц, шунингдек, НАТОга аъзо давлатлар вазиятни муҳокама қилиш учун учрашганликларини ва бунинг муҳимлигини қўшимча қилди
Столтенберг Польшадаги ракета портлашлари ҳақида: Жавобгарлик барибир Россия зиммасида!
НАТО Польшадаги портлаш юзасидан фавқулодда йиғилиш ўтказди. Ташкилот йиғилиш сўнггида баёнот чиқарди. Унда Польша шарқидаги портлаш Украина ҳаво ҳужумига қарши мудофаа ракетаси туфайли содир бўлгани, қасддан ҳужум ёки Россия НАТОга қарши ҳужумкор ҳарбий ҳаракатлар тайёрлаётганини тасдиқловчи ҳеч қандай далил йўқлиги айтилади.
НАТО Бош котиби Йенс Столтенберг Брюсселда журналистларга ҳужум бўйича якуний жавобгарлик барибир Россия зиммасида эканини айтди.
"Бу Украинанинг айби эмас. Россия Украинага қарши ноқонуний урушини давом эттиргани учун якуний жавобгарлик унинг зиммасидадир", - деди Столтенберг.
Reuters агентлигининг билдиришича, йиғилиш НАТО низомининг 4-моддасига асосан ўтказилган.
Бу моддага биноан НАТОга аъзо давлатлардан бирортаси “ўзининг ҳудудий яҳлитлиги, сиёсий мустақиллиги ёки хавфсизлиги”дан ҳавотир билдирган тақдирда, мана шундай йиғин чақириш ҳуқуқига эгадир.
Байден Польшага қулаган ракета Россиядан отилгани даргумон, деди. G20 лидерлари шошилинч йиғилиш ўтказди
Польшага иккита ракета тушгани ва бунинг оқибатида икки киши ҳалок бўлгани ортидан Индонезияда ўтаётган G20 саммитига йиғилган давлат лидерлари шошилинч йиғилиш ўтказди.
«Тўлиқ текширув ўтказмагунимизга қадар бирон нарса дейишим қийинроқ, лекин таректория нуқтаи назаридан ракета Россия томонидан отилгани эҳтимоли оз, яна кўрамиз», деди Байден йиғилишда.
АҚШ президенти мазкур воқеа юзасидан текширув давом этаётганини айтди. У Ғарб давлатлари текширувни ўтказишда Польшани қўллаб-ыувватлашларини таъкидлади.
Шошилинч йиғилишда АҚШ, Германия, Канада, Нидерландия, Япония, Испания, Италия, Франция ва Британия раҳбарлари иштирок этди. Япониядан ташқари барча давлатлар НАТО аъзоларидир.
Аввалроқ Польша расмийлари мамлакат ҳудудида портлаган ракета Россияда ишлаб чиқарилганини маълум қилган. Польша президенти Анжей Дуда ҳозирча ракеталар айнан Россия томонидан отилгани юзасидан аниқ маълумотлар йўқлигини айтган.
“Ҳозирда бизда ракета ким томонидан отилгани тўғрисида ишонарли далиллар мавжуд эмас. Бу Россия ишлаб чиқарган ракета экани эҳтимолга яқин. Айни пайтда текширув ишлари олиб борилмоқда”, деди Дуда.
15 ноябрда Польшанинг Украина билан чегара яқинида иккита ракета портлаган. Дастлабки маълумотга кўра, икки киши ҳалок бўлган. Associated press агентлигининг АҚШ разведкасининг исми ошкор этилмаган юқори мартабали мулозимларига таяниб хабар беришича, ракеталар Польша ҳудудига учган ва улар Россияга тегишли.
Бу ҳодиса ортидан Польша президенти Анжей Дуда қатор ҳукуматлар раҳбарлари, жумладан, АҚШ президенти Жо Байден билан телефон мулоқоти ўтказди. Суҳбат давомида Жо Байден “АҚШ НАТОдаги иттифоқдошлари билан якдил” эканини айтган ва Польшага ракета портлашларини тергов қилишда кўмак кўрсатишга тайёрлигини билдирган.
Россия Мудофаа вазирлиги рус ракеталарининг Польша ҳудудига қулагани ҳақидаги хабарларни "вазиятни кучайтириш учун атайлаб қилинган провокация" деб атади.
Польшанинг ракета портлаган ҳудудидан олинган видео тарқалди