Латвия мактабларда рус тили ўқитилишини тақиқламоқчи
Латвия Таълим ва фан вазирлиги 2026/2027 ўқув йилидан бошлаб мактаб ўқувчиларига иккинчи чет тили сифатида рус тилини танлашни тақиқлашни режалаштирмоқда.
"Делфи" портали хабар беришича, мамлакатнинг барча таълим муассасаларида иккинчи чет тили фақат Европа Иттифоқининг расмий тилларидан бири бўлиши мумкин.
Ўрганиш алоҳида ҳукуматлараро келишувлар билан тартибга солинадиган тиллар учун истисно қилинади.
Рус тили Европа Иттифоқи тили эмаслиги ва тегишли халқаро шартномаларда мавжуд эмаслиги сабабли, аслида бу рус тилини мактабларда иккинчи чет тили сифатида ўрганишни тақиқлашни англатади.
Бугунги кунга келиб, Латвия мактабларида биринчи чет тили биринчи синфдан ўқитилади ва кўпинча бу инглиз тилидир.
Иккинчи чет тили тўртинчи синфдан бошлаб ўқитила бошлайди ва уни танлаш ҳали қонун билан тартибга солинмаган.
Бундан ташқари, 2021 йилда ўтказилган сўров натижаларига кўра, Латвия мактабларининг деярли ярмида танлов йўқ: 300 дан ортиқ мактабда иккинчи чет тили сифатида фақат рус тили таклиф этилади.
Россия босқини пайти Херсон музейи толон-тарож қилинган
Рус қўшинлари Херсондаги санъат музейидан 15 мингга яқин экспонатни толон-тарож қилган. Бу ҳақда Украина маданият вазири Александр Ткаченко маълум қилди.
"Улар иккита музейни толон-тарож қилишди ва энг муҳим экспонатларни ўғрилашди. Санъат музейида, улар музей коллекциясининг деярли 80 фоизини, бошқа музей экспозициясининг катта қисмини, қиммат суратлар, тангаларни ўғрилашди", - деди Ткаченко.
31 октабрь куни музейга бир неча ўнлаб россиялик аскар келгани, кейин улар уч кун давомида юк машиналарига музейдан санъат асарларини олиб кетаётгани видеолари тармоқларда тарқалганди. Facebook ижтимоий тармоғида маълум қилинишича, талон-тарож қилинган ашёлар Қримдаги Симферополга ўтказилган.
Херсон санъат музейи коллекциясида 17-асрга оид суратлар, шунингдек 19-аср Украина санъати, шунингдек, модернист ва замонавий Украина санъати тўпламлари бўлган.
Херсон вилояти музейи экспозициясида 10 000 га яқин археологик ашёлар, шу жумладан қадимги юнон колонияси Олбияда олиб борилган қазишмалар пайтида топилган буюмлар мавжуд. Музейда сақланадиган 173 000 дан ортиқ экспонатларнинг кенг коллекцияси минтақанинг табиий тарихи, инқилобдан олдинги ва кейинги тарихини ўз ичига олади.
Украина мулозимларига кўра, Россия Херсонни босиб олган пайтда шаҳар вилоят театрини рус маданият марказига айлантиришга ҳаракат қилган, лекин бунинг уддасидан чиқа олмаган.
Украина драматурги Николай Кулиш номини олган Херсон театри минтақадаги энг машҳур маданият муассасаларидан бири бўлиб, ҳар йили ўтказиладиган "Тавриялик Мелпомене" халқаро театр фестивалига мезбонлик қилган.
Театрда оҳирги спектакль уруш бошланишидан бир кун олдин, 23 февралда қўйилган. Театр жамоаси электр таъминоти тикланиши биланоқ, уруш бошланганидан бери илк спектаклни қўйиш ниятида.
БМТ: Запорожье атом станцияси яна хавф остида
БМТ Атом энергияси агентлиги раҳбари Украинанинг Запорожье атом электр станцияси сўнгги ҳужумлар ортидан потенциал ядровий фаолокат хавфи ҳақида огоҳлантирди ва станция текширилиши зарурлигини билдирди..
Европадаги энг йирик атом электр станцияси яна ҳужумга учради. Украина жанубидаги Запорижье атом станцияси Россия назорати остидадир.
Атом энергияси бўйича халқаро агентлик маълумотларига кўра, шанба ва якшанба оқшомида станция ўндан ортиқ портлаш таъсирида ларзага келган.
Агентлик раҳбари Рафаель Гросси портлашларни ким қилган бўлса "олов билан ўйнашяпти" деди.
Россия ҳам, Украина ҳам ҳужумларда бир-бирини айблаган.
Россия Мудофаа вазирлиги Киевни АЭСнинг таъминловчи электр узатиш линияларига снарядлар отишда айблаб чиқди.
Украинанинг Энергоатом ширкати Россияни Украинанинг энергия таъминотини янада чеклаш мақсадида инфратузилмани нишонга олганликда айблади.
Станциянинг қайта-қайта хужумга тутилиши 1986 йилдаги Чорнобиль фожиаси содир бўлган жойдан атиги 300 чақирим узоқликда оғир авария содир бўлиши мумкинлиги ҳақида хавотирларни ўртага чиқарди.
Херсондан чекинган рус қўшинлари бир қанча қишлоқларни ҳужумга тутди
Украина Қуролли кучлари Бош штаби маълумотига кўра, сўнгги 24 соат ичида энг шиддатли жанглар Луганск вилоятидаги Стелмаховка қишлоғи, Бахмут, Соледар, Весёлое ва бошқа бир қатор шаҳарларда бўлиб ўтган.
Донецк вилоятида Россия қўшинлари ҳужум операцияларини ташкил этишга ҳаракат қилмоқда, Украина армияси ҳужумларни қайтармоқда.
Запорожье вилоятида ташаббус, аксинча, Украина томонига ўтган. Херсон вилоятида Днепрнинг чап қирғоғига чекинаётган рус қўшинлари Антоновка, Зеленовка, Комишани ва бошқа аҳоли пунктларини ҳужумга тутмоқда.
Россия Украинага қарши уруш бошлаганидан бери 8300 дан ортиқ тинч аҳоли, шу жумладан 437 нафар бола ҳалок бўлди. Бу маълумотни Украина Бош прокуратураси эълон қилди.