Президент администрациясида энергетик коллапсдан чиқиш йўллари муҳокама этилди
Ўзбекистонда энергетик коллапсдан чиқиш йўллари президент администрацияси раҳбари Сардор Умрзоқов 7 декабрда ўтказган йиғилишда кўриб чиқилди.
Йиғилишда президент маслаҳатчилари ва бош вазир ўринбосарлари вилоятларга бириктирилди ва уларга газ, электр энергияси, кўмир таъминотини яхшиланишини назорат қилишга кўрсатмаси берилди.
Бундан ташқари Энергетика вазирлиги, Иқтисодий тараққиёт ва камбағалликни қисқартириш вазирлиги, Инвестициялар ва ташқи савдо вазирлигида кун-у тун ишлайдиган штаблар ташкил этиш топширилди. Уларга аҳоли ва иқтисодиёт тармоқларини энергия ресурслари билан мутаносиб таъминлаш масалаларини тезкор ва тизимли ҳал этиш топширилди.
Йиғлишида вилоятларга қўшимча табиий газ, суюлтирилган газ, электр энергияси ва кўмир етказиб бериш масаласи ҳам муҳокама қилинди.
Энергетика тармоғида юзага келган вазиятни енгиллаштириш учун товар газ етказиб бериш ҳажмини суткасига 5 миллион куб метрга оширишга қарор қилинди.
Шунингдек, 2023 йил 1 мартга қадар давлат идоралари тасарруфидаги сиқилган газда ҳаракатланадиган автомобиллардан фойдаланишни тақиқлаш, уларни бензинга ўтказиш;
хорижий давлатлар билан қўшимча табиий газ, электр энергияси, кўмир, мазут харид қилиш бўйича музокараларни жадаллаштириш;
2 ой муддатга Аи-80 бензини импорти учун акциз солиғи ва уни чакана сотиш учун акциз солиғини ҳисоблаш ва ундиришни тўхтатиб туриш;
биржа сотувларига қўйилаётган Аи-80 бензининг кунлик ҳажмини ошириш;
Аи-80 бензини нархининг асоссиз оширилишига йўл қўймаслик, нарх ошиши бошланғич нархнинг 5 фоизидан ортиқ бўлмаслигини таъминлаш.
Тегишли соҳа ва тармоқлар раҳбарларига шу ва бошқа топшириқлар ижросини сўзсиз таъминлаш, қилинган ишлар юзасидан кунлик ҳисобот киритиб бориш топширилди.
Энергия муаммосини ҳал этиш учун Бош вазир раислигида ишчи гуруҳ тузилди
ЎзАнинг 8 декабрда хабар беришича, президент Шавкат Мирзиёев топшириғига асосан, Бош вазир Абдулла Арипов раислигида энергия муаммоларини тезкор ўрганиш ва ҳал қилиб бориш бўйича ҳукумат ишчи гуруҳи тузилади.
Ишчи гуруҳга энергия тақчиллиги муносабати билан юзага келган вазиятни қисқа муддатларда чуқур таҳлил қилиш ва аниқланган камчиликларни бартараф қилиш бўйича тезкор чоралар кўриб бориш вазифаси юкланди.
Бундан ташқари гуруҳ электр ва газни биринчи навбатда аҳолига етказиб бериш заруриятини эътиборга олган ҳолда, мавжуд энергия ресурсларини мувозанатли тақсимлаб боради ва назорат қилади.
Гуруҳга муқобил энергия билан аҳолини ва ижтимоий соҳа объектларини узлуксиз таъминлаш ишларини жадаллаштириш, ижтимоий объектларнинг барқарор фаолият юритишини таъминлаш учун зарур маблағларни ажратиш, уларнинг мақсадли ишлатилишини назорат қилиш, энергия тақчиллиги ва унинг оқибатида юзага келадиган салбий оқибатлар, айниқса иқтисодиётга таъсирини камайтириш мақсадида, комплекс чора-тадбирлар кўриш юзасидан асосланган таклифлар ишлаб чиқиш ва кўриб чиқиш вазифаси ҳам юклатилди.
Қишлаш усулларидан бири: Кўмирли таппи
Мамлакатда энергетик бўҳрон кузатилаётган бир пайтда одамлар қишдан чиқиш йўлларини изламоқда. Печкачи тахаллуси билан танилган Дима Қаюм кўмир аралаштириб тайёрланган таппи суратларини эълон қилди. Постга ёзилган изоҳлардан маълум бўлишича, одамлар таппининг бу турини кўпроқ маъқуллашар экан.
Кимдир кўмирли таппини "прогресс" дея таърифласа, бошқаси бу каби таппининг "роса зўр ёниши"га эътибор қаратган.
Беш кундирки, Ўзбекистонда газ ва электр тақчиллиги кучайган. Одамлар исиниш учун турли усулларни қўлламоқда.
"Тўрт болам билан совуқдан қийналмоқдамиз"
Озодлик ўзбекистонликларнинг энергетик бўҳронга оид вазият акс этган хабарларини ZIMISTON-UZ блогига жамламоқда.
Самарқанд вилояти Каттақўрғон тумани Пайшанба шаҳарчасида яшовчи Сарвиноз исмли аёл свет ва газ муаммоси сабаб арз қилиб, ҳокимликка борган пайти тасвирга олган видеосини Озодликка йўллади.
“Шикоятим шундаки, свет ва газ 24 соат давомида 1 соат ҳам берилмаяпти, қиш жуда совуқ келгани сабабли роса қийналиб қолдик”, дейди Сарвиноз.
Сарвиноз тўрт нафар вояга етмаган болалари борлиги, айниқса шу болалари совуқдан қийналаётганини айтади.
У ҳокимлик биносига тўрт фарзанди билан борган. Видео тасвирларда болаларнинг ҳокимлик ходимларидан бирининг кабинетида югуриб, ўйнаб юришгани акс этган.
Сиз яшаётган худудда вазият қандай?
Қандай қишлаяпсиз?
Газ ва свет борми?
Хабарларингизни Озодликка Телеграм орқали + 420 724971539 рақамига йўлланг. Вазиятни биргаликда кузатамиз!