Сурхондарёда қорда ётган эркак тасвирланган видео тарқалди
Тармоқларда тарқалаётган видеода бир эркакнинг кўчада қор остида ётгани акс этган.
Тасвирга олган аёл видеони шарҳларкан, бу ҳолат Сурхондарё вилояти Жарқўрғон тумани Сурхон соҳил маҳалласи Алишер Навоий кўчасида юз берганини айтади.
"Ташқарида минус 3-4 даража, бу ерда бир инсон қорда ётибди", дейди тасвирга олаётган аёл.
Тасвирларда эркакнинг оқ мато билан тўсиб қўйилган девор тагида ерда ётгани акс этган. У устига афтидан эски бир кўрпани ташлаб олган. Унинг ёнидаги дарахтга осилган пакет, сумкалардан эркакнинг анчадан бери шу ерда яшаётгани англашилади.
Видеодаги эркакнинг кимлиги, унинг нима сабабдан кўчада қорда ётгани ҳозирча номаълум.
Тармоқларда бу видео кенг муҳокамага сабаб бўляпти. Кўпчилик қаҳратон қишда кўчада ётган бу эркакнинг соғлигидан хавотир ҳам билдирган.
“Ўзтрансгаз”: Хитойга газ экспорти 100% тўхтатилган
Мамлакатда газ тақчиллиги давом этаётган бир пайтда “Ўзтрансгаз” компанияси бошқаруви раиси Беҳзод Норматов янги баёнот билан чиқди.
Норматов Sevimli телеканалига берган интервьюсида Ўзбекистон Хитойга газ экспортини 100 фоиз тўхтатганини иддао қилди:
“Ҳозирги кунда (ҳаво) совиб кетганини инобатга олиб, асосий мақсадимиз аҳоли хонадонларига етказиб бериш кераклигини инобатга олиб, ҳамма экспортларимиз, ўша ҳамманинг оғзида бўлган Хитойга қилинаётган экспорт тўхтатилган. 100 фоиз. Ҳамма газ аҳолига йўналтирилган”.
Бу баёнотига Норматов бирор ҳужжат тақдим қилганича йўқ. Бироқ гапини қуйидаги кўринишда исботлашга ҳаракат қилди:
“Олдинги рақамлар билан бу йил қилинган экспорт ҳажмини солиштирадиган бўлсак, камида 3 баробар кам”.
Ўтган ой Энергетика вазири ўринбосари Шерзод Хўжаев ҳам айни кўринишдаги баёнот билан чиққанди.
“Тез кунда чекловлар масаласи 80 фоизга ҳал этилади. Бунинг учун табиий газ ва электр энергияси экспорти тўхтатилди. Ташқи импорт 20 фоизга оширилди”, – деганди 16 ноябрдаги матбуот анжуманида Хўжаев.
Расмий маълумотга кўра, СOVID-19 пандемияси бошланиши ортидан Ўзбекистон Россияга табиий газ экспортини тўхтатган ва бу қайта тикланмаган. Кейинги пайтда ўзбек гази фақат Хитойга эскпорт қилинган.
Беҳзод Норматов жорий йил ёзида “Интерфакс” агентлигига берган интервьюсида Ўзбекистонда қазиб олинаётган табиий газнинг қарийб 10 фоизи Хитойга сотилаётганини маълум қилган.
Ўша интервьюсида Норматов Ўзбекистон 2025-2026 йилларда газ экспортини тўхташи мумкинлигини айтган.
Айни пайтда мамлакатнинг деярли барча жойида, жумладан, пойтахт Тошкентда ҳам газ тақчиллиги давом этаётгани кузатилмоқда.
5 кунда 10 киши ис газидан ўлди
Бугун Хоразм вилояти Янгибозор тумани Боғолон қишлоғида яшовчи 64 яшар қария ва унинг 13 яшар невараси ис газидан вафот этди.
Бу хабарни Хоразм вилояти Фавқулодда вазиятлар бошқармаси тасдиқлади.
Хоразм ФВБ маълумотига кўра, воқеа 8 декабрь эрталаб содир бўлган. Боғолондаги хонадонда жами 9 киши бўлган. Улардан 2 нафари ўлган, 7 нафари эса туман шифохонадан биринчи тиббий ёрдамни олгач, уйига қайтган.
Янгибозор тумани прокуротураси воқеа юзасидан тергов олиб бораётгани хабар қилинди.
4 ва 5 декабрь кунлари яна икки оиланинг 8 аъзоси ис газидан вафот этган эди.
5 декабрь куни Бухоро вилоятининг Жондор тумани “Охших” маҳалла фуқаролар йиғини, "Охших" қишлоғида тунда ёнғин оқибатида келиб чиққан ис газидан эр-хотин ва уларнинг 2, 7, 11 ёшдаги уч фарзанди вафот этди. Бу маълумотни вилоят прокуратураси тасдиқлади.
Расман билдирилишича, Охших қишлоғидаги уйлардан бирида 36 ёшли эр, 34 ёшли хотин ва уч боланинг жасади топилган.
Тошкент вилоятининг Чиноз туманида ҳам 4 декабрь куни «Хўжа» маҳалласида 28 ёшли эр, унинг 20 ёшли хотини ва 2022 йилда туғилган боласи ис газидан заҳарланиб вафот этгани қайд этилган эди.
Дастлабки текширув натижасида 3 декабрь куни 7,5 миллион сўм қарздорлиги бор мазкур хонадон газдан узиб қўйилган. Уй эгаси ўзбошимчалик билан газ таъминотига уланиб олгани айтилди.
Ўзбекистонда қиш мавсуми бошланиши билан “ис газидан заҳарланиш” ҳолатлари кўпайишини кузатиш мумкин. Бунинг натижасида мамлакатда ҳар йили юзлаб одам нобуд бўлади.
10 ноябрдан 5 декабргача бўлган даврда маҳаллий матбуотдаги хабарлардан келиб чиқилса, камида 19 киши ис газидан заҳарланиб вафот этган.
Мутахассислар бу каби ҳодисаларга фуқаролар томонидан газ ва муқобил ёқилғи турларидан фойдаланишда хавфсизлик чораларига риоя этмаслик, қўлбола ясалган печлардан фойдаланиш сабаб бўлаётганини билдиришган. Аммо йиллар ўтгани сари бу муаммо бартараф этилиши ўрнига кучайиб бормоқда.
9 февраль куни Фавқулодда вазиятлар вазирлиги ахборот хизмати бошлиғи ўринбосари Самандар Ҳикматуллаев Ўзбекистонда 2022 йилнинг 1 январидан 8 февралигача ис гази билан боғлиқ 21 ҳолат қайд этилгани, уларда жами 36 киши ҳалок бўлгани ва 19 киши заҳарлангани тўғрисида билдирган.
Вазирлик расмийси ўтган йили ис гази билан боғлиқ жами 74 та ҳолат аниқланганини, ис газидан 128 киши ўлгани ва 67 киши заҳарланганини айтди.
2020 йилнинг 16 декабрида ўтган йиғилишда президент Шавкат Мирзиёев бир йилда 56 та ис газидан заҳарланиш ва 106 та чақнаш ҳолати оқибатида 106 нафар фуқаро вафот этгани, 190 нафари заҳарлангани ва куйиш тан жароҳатини олганини таъкидлаган.
Ўша йиғилишда президент Мирзиёев Бош вазир зиммасига ФВВ Ёнғинга қарши курашиш бошқармаси фаолиятини танқидий кўриб чиқиб, уни тубдан ислоҳ қилиш ва янги тизим яратиш юзасидан таклиф бериш вазифасини юклаган эди.
Вазир: Ўзбекистонда ҳудудларни электр таъминотидан узишнинг мукаммал графиги ишлаб чиқилади
Ўзбекистонда 11 декабргача ҳудудларнинг электр таъминотидан узишнинг мукаммал графиги ишлаб чиқилади ва жамоатчиликка эълон қилинади. Бу ҳақда бош вазир ўринбосари, энергетика вазири Жўрабек Мирзамаҳмудов «Газета.uz»га берган интервьюсида маълум қилди.
Унга кўра, ҳудудларни эълектр таъминотидан узиш графиги вилоят ва туман ҳокимлари, маҳаллий электр таъминоти корхоналари билан ҳамкорликдла ишлаб чиқилади. Вазирнинг айтишича, айни пайтда ҳам бу каби график мавжуд ва унга амал қилинмаяпти, чунки у мукаммал эмас.
Жўрабек Мирзамаҳмудов ўзи ишлаб чиқараётган электр энергиясидан ташқари Туркманистондан ҳам қўшимча электр сотиб олинаётганини айтган.
“Буларнинг барчасини эҳтиёжни қоплашга сарфлаяпмиз. Биз 20 млн кВт·соат электр энергиясини хориждан сотиб олаяпмиз, бунинг учун кетган валютанинг бир қисмини қоплаш учун 5−6 млн кВт·соатга яқин электр энергиясини Афғонистонга сотаяпмиз”, деди вазир.