Портлаш тафсилотлари
Тошкентнинг Сергели туманидаги "Қурувчилар" даҳасида жойлашган омборхонада юз берган портлаш оқибатида 16 ёшли ўсмир ҳалок бўлди ва 163 киши жароҳатланди.
Соғлиқни сақлаш вазирлигининг билдиришича, улардан 24 нафари Республика шошилинч тиббий ёрдам илмий маркази ва унинг Тошкент вилояти филиали, Тошкент шаҳар тез тиббий ёрдам шифохонаси, 1-сонли Республика ва 1-сонли шаҳар клиник шифохоналари ҳамда 1-сонли шаҳар туғуруқхонасига ётқизилди.
Қолган 138 нафар жабрланувчининг саломатлиги яхши бўлганлиги учун амбулатор тиббий ёрдам кўрсатилиб, уйига жавоб берилган.
Айни пайтда юқоридаги шифохоналарда даволанаётган беморлар орасида ўта оғир тан жароҳати олганлар йўқ. Уларнинг саломатлиги қониқарли.
Ҳодиса оқибатида 2006 йилда туғилган бир нафар ўсмир бола воқеа жойида вафот этган .
“Газета уз”нинг хабар беришича, боланинг устига портлаш пайтида дераза роми қулаб тушган. У Тошкентдаги 305-мактабда ўқиган.
Тошкент шаҳар Сергели тумани "Қурувчилар" даҳасида жойлашган Interlogistics МЧЖга қарашли омборхонада 28 сентябрь куни соат 02:43 кучли портлаш юз берган. Бу ҳақда Фавқулодда ҳолатлар вазирлиги хабар тарқатди.
Портлашга кучли чақнаш сабаб бўлган. Портлаш ортидан ёнғин чиққан.
“16 та ёнғин-қутқарув экипажи ва 3 та автонарвон соат 02:48 да ҳодиса рўй берган ҳудудга етиб бориб, ҳозирда ёнғинни ўчириш ишлари амалга оширилмоқда”, дейилади хабарда.
Ижтимоий тармоқларда бу воқеанинг ввидеоси тарқалмоқда. Уларда кучли портлаш овозини эшитиш мумкин. Яқин атрофдаги хонадонлар, савдо ва бошқа марказларнинг ойналари портлаш оқибюатида сингани айтилмоқда. Айрим хонадонларга тез ёрдам машиналари етиб борган.
ФВВ ижтимоий тармоқларда тарқалган ҳодиса “Самолёт қулаши оқибатида содир бўлган” мазмунидаги хабарларни рад этди. Шунингдек, ижтимоий тармоқларда ёнғинни ўчиришга вертолётлар жалб қилингани тўғрисидаги видеолар ҳам пайдо бўлди.
Uzbekistan Airports портлаш Тошкент аэропорти фаолиятига таъсир қилмаганини ва аэропорт чекловларсиз одатий режимда ишлаётганини маълум қилди.
Тошкент шаҳар ҳокими вазифасини бажарувчи Шавкат Умурзоқов портлашда жабрланган уй эгаларига етказилган зарар икки-уч кун ичида қопланишини ваъда қилмоқда.
Расман маълум ыилинишича, фавқулодда ҳодисани ўрганиш, кўрилган талофатларни бартараф этиш ва жабрланганларга ёрдам кўрсатиш бўйича Ўзбекистон президенти Шавкат Мирзиёев топшириғи билан бош вазир ўринбосари Очилбой Раматов бошчилигида Ҳукумат комиссияси тузилди.
Комиссия томонидан ҳудудда олиб борилаётган ишлар юзасидан ахборот бериб борилади.
Мудофаа вазирлиги эса портлаш оқибатларини бартараф этиш ва ҳудудни тозалаш ишларига Тошкент ҳарбий округи, Қуролли Кучлар академияси ҳамда Тоифаланган объектларни қўриқлаш қўшинлари қўмондонлигининг мингга яқин ҳарбий хизматчиси жалб қилинган.
Портлаш оқибатида яқин атрофдаги мактаб ва турар-жой биноларига зиён етган
Сергели тумани, Қурувчи мавзесида жойлашган 305-мактаб ҳам портлаш натижасида жиддий талофат кўрди. Ўқиш жараёни вақтинчалик тўхтатилган.
Сергелидаги портлаш юзасидан ИИВ Тергов департаменти жиноят иши қўзғатди
Тошкентнинг Сергели туманидаги омборхонада 28 сентябрга ўтар кечаси чиққан ёнғин ҳодисаси бўйича Ўзбекистон ИИВ Тергов департаменти мамлакат Жиноят кодексининг 259-моддаси (Ёнғин хавфсизлиги қоидаларини бузиш) 2-қисми "а” ва ”б" бандлари билан жиноят иши қўзғатган. Бу ҳақда вазирлик ахборот хизмати маълумот тарқатди.
Қайд этилишича, "Interlogistics" МЧЖга қарашли 18,4 гектар ер майдонда жойлашган омборхонада чиққан ёнғин тахминан 10 000 квадрат метр майдонни қамраб олган.
Аввалроқ ФВВ алангани ўчириш учун 16 та ёнғин-қутқарув экипажи жалб қилинганини билдирган эди.
ИИВ ёнғиннинг зарба тўлқини натижасида омборхона атрофида жойлашган бир нечта кўп қаватли уйларга, биноларга ҳамда траспорт воситаларига шикаст етган ҳамда фуқаролар жароҳатлангани, олинган жароҳатлар туфайли 16 яшар ўсмир нобуд бўлганини тасдиқлаган.
“Ҳозирда жиноят иши юзасидан тегишли идораларнинг мутахассисларидан иборат тергов-тезкор гуруҳи тузилган бўлиб, ёнғин келиб чиқиш сабабларини аниқлаш мақсадида судга оид тегишли экспертизалар тайинланган ҳамда кечиктириб бўлмайдиган тергов ҳаракатлари амалга оширилмоқда”, дейилган вазирлик хабарномасида.
Сергелидаги портлашда BYD расмий дилерига тегишли деб айтилаётган машиналар ҳам зарар кўрган
Портлаш зарбаси ён-атрофдаги кўплаб ҳусусий уйлар , мактаб, савдо ва бошқа бизнес иншоотлари, автомобилларга зиён етказган.
Портлаш пойтахтдаги халқаро аэропортга яқин жойда бўлган, лекин парвозлар жадвалига таъсир қилмаган. Рейслар одатдагидек амалга ошмоқда, дея билдирди Тошкент халқаро аэропорти маъмурияти.
Фавқулодда вазиятлар вазирлигининг маълум қилишича, ҳодиса жойида портлашни ўрганиш учун махсус лаборатория ташкил этилган.