Ҳарбий ҳаракатларда ўлганлар сони 1200 га, яраланганлар 5 мингга яқинлашди
Исроилда ҲАМАС билан уруш оқибатида ўлганлар сони 700 кишига етди. Kan агентлигининг хабар беришича, улар орасида Украина, Литва, Британия, Германия, Франция ва АҚШ фуқаролари бор. Бу давлатлар ҳалок бўлганлар тўғрисидаги маълумотларни ўрганаётганини маълум қилди.
Исроил полицияси ҲАМАС билан урушнинг биринчи кунида 30 ходими, армия эса 44 аскар ҳалок бўлганини билдирди.
Исроил соғлиқни сақлаш вазирлигининг маълум қилишича, яраланганлар сони 2243 кишини ташкил қилмоқда, улардан 338 нафарининг аҳволи оғир.
ҲАМАС эса Ғазо ҳудудида 413 фаластинлик, жумладан, 78 бола ҳалок бўлганини хабар қилди. Ғазода 2300 киши яраланган, улардан 213 нафари бола.
Иордания ва Миср ҲАМАС билан гаровга олинганлар масаласида музокара олиб бориши мумкин
ҲАМАС бир неча соат ичида гаровга олинган исроилликлар рўйхатини эълон қилиши мумкин, деб хабар берди Би-Би-Си. Jerusalem Post нашрининг ёзишича, ҳозиргача 750 исроиллик бедарак. Улар ҲАМАС томонидан гаровга олинган бўлиши эҳтимол.
Исроилдаги телеграм каналлар эса Иордания ва Миср ҲАМАС билан гаровга олинганлар масаласида музокара олиб бориши ҳақида хабар тарқатди. Бу хабарларда таъкидланишича, музокараларда гап гаровга олинганлар орасидаги кекса ёшдаги кишиларни ва ярадорларни озод қилиш ҳақида боради.
Сўнгги маълумотларга қараганда ҲАМАС гаровга олган одамлар орасида юзга яқин чет эл фуқаролари ҳам бор.
The Wall Street Journal Исроил Мисрдан ҲАМАС билан музокарада воситачи бўлишни расман илтимос қилган.
The Washington Post музокаралар муваффақиятсиз якунланганини ёзмоқда. Бироқ бу хабар ҳозирча расман тасдиқланган эмас.
АҚШ ҳарбий кемалар ва қирувчи самолётларни Исроил чегарасига яқин ҳудудларга кўчирмоқда
АҚШ мудофаа вазири Ллойд Остин Исроилга яқин соҳиларга "Джеральд Форд" авиаташувчи кемасини, "Норманди" крейсерини ва жанговар ҳарбий авиация таркибига кирувчи бир нечта эсминцни Исроил чегарасига яқин ҳудудларга кўчиришини маълум қилди.
Вазирга кўра, Исроилга қўшимча ҳарбий техника ва ўқ-дори етказилади. Жумладан, “Темир гумбаз” ҳаводан ҳимоя қилиш тизмига ҳам ракеталар берилади. Кучни намойиш этиш ва исроилни қўллаб-қувватлаш мақсадида АҚШ минтақадаги авиабазаларида зарба берувчи самолётлар сонини кўпайтиради.
Аввалроқ қурол етказиб бериш масаласини АҚШ президенти Жо Байден Исроил бош вазири Бинямин Нетаняҳу билан телефон орқали икки марта муҳокама қилди. Исроил бош вазири матбуот хизматинининг билдиришича, Байден Нетаняҳуга “муқаррар ғалаба” ваъда қилган.
"Ал Жазира" телеканалининг хабар беришича, ҲАМАС Вашингтон томонидан Исроилга кўрсатилаётган ёрдамга муносабат билдирган. “Авиаташувчи биз томонга йўллангани бизни қўрқита олмайди ва Америка маъмурияти бу қадамнинг оқибатлари ҳақида ўйланиб кўриши лозим”, дейилади ҲАМАС баёнотида.
Исроилда қурбонлар сони 600дан ошди
Якшанба куни эрта тонгда Исроил расмийлари Ҳамаснинг мамлакат жанубидаги шанба кунги ҳужуми оқибатида 600 дан ортиқ киши ҳалок бўлгани ва 1500 дан ортиқ киши яраланганини маълум қилди.
Ғазо Соғлиқни сақлаш вазирлиги Фаластин томонидан 250 дан ортиқ киши ҳалок бўлгани ва 2000 га яқин одам яраланганини маълум қилди. Иерусалим Пост хабарига кўра, 750 га яқин исроиллик бедарак йўқолган.
Исроилликлар гаровга олинган, улар орасида ҲАМАСнинг билдиришича, ўнлаб Исроил ҳарбийси ҳам бор.
Исроилда расман уруш ҳолати ва фавқулодда вазият эълон қилинди. Исроил армияси “Темир қиличлар” амалиётини бошлаб, Ғазо бўлгасига қарата жавоб зарбалари йўлламоқда. Исроилнинг ўнлаб ҳарбийлари ва тинч фуқаролари ўлдирилган ва гаровга олинган, юзлаб ярадорлар бор.
Исроил Бош вазири Бенямин Нетаняху якшанбага ўтар кечаси ХАМАС гуруҳининг ҳарбий ва ҳукумат салоҳиятини йўқ қилишга қарши ҳарбий кампания бошлаш учун хавфсизлик кенгашидан рухсат олганини айтди.